Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00-15:00
  2. sis. 12:00-17:00
  3. tall. 10:00-12:00

Asasara Kommunalbestyrelsimut ilaasortaq, Laura Taunâjik.

Siullermik apeqqutinnut qujanarujussuaq.

Januaarip 16-ianni 2019 Allaffeqarfimmut apeqquteqarputit Isumaginninnermut Suliffeqarnermullu Ingerlatsivimmit saaffiginnissutit allakkatigut akineqartarnerat pillugu.

Isumaginninnermut Suliffeqarnermullu Ingerlatsiviup apeqqutit imatut tunngavilersorneqarsimasoq tiguaa:

”Tasiilami nunaqarfiinilu inunnik Isumaginnittoqarnikkut saaffiginnittaraluarnerit kinguneqarneq ajortut pillugit innuttaasut arlaleriaqalutik naammagittaalliuuteqartarput. Allakkatigut saaffiginnissutit Kommuneqarfik Sermersuumut ingerlanneqartarsimagaluarput allakkatigulli saaffiginnissutit akineqartannginneri pillugit nalorninerit allatigullu iliuusissaaruttutut misigisarnerit pillugit qinikkatut saaffigineqartarnerit ataasialinngillat. Tamanna uggornartuuvoq, inuit pisinnaatitaaffii naapertorlugit kinaluunniit allakkatigut saaffiginnissimasoq sapaatit akunneri sisamat ingerlaneranni akineqartussaatitaavoq.

Ajornartorsiutinut ilaasorinarpoq suliat arlallit inunnik Isumaginnittoqarfimmut tunngassuteqartut qitiusumut (Nuummut) ingerlateqqaarneqartariaqarmata. Saaffiginnissutit inunnik kiinarsisimanngisamik sullissiniarnikkut sullinniarneqarnikkullu ilungersunartuusoq ilisimaneqareerpoq.  Attaveqaatillu nittartakkatigut pitsaanerpaanngitsut ilaatigullu kipiluttunarluinnarsinnaasut naluneqanngilaq.  Naluneqanngilaq attaveqaatit nittartakkatigut pitsaanerpaanngitsut ilaatigullu kipiluttunarluinnarsinnaasut.  Uggornartuuvoq allakkat Kommuneqarfik Sermersooq-mut qitiusoqarfimmut nassiunneqartartut tamatigut akineqarsimanngimmata.  Taamaattumik paaserusunnarsivoq aaqqissuussinikkut eqaannerulersitsiniaanikkullu Inunnik Isumaginnittoqarnikkut qanoq aaqqiiniartoqarniarnersoq.  Imaluunniit piffissami aggersumi arlaatigut allannguisoqarniarnersoq.

  1. Kommuneqarfik Sermersooq ataani Inunnik Isumaginnittoqarnikkut allakkatigut saaffiginnissutit ukioq 2018 qassiusimappat? Taakkunani qassit akineqarpat? Qassillu akineqarsimanngillat?
  2. Suna tunngaviua Inunnik Isumaginnittoqarfimmut allakkatigut saaffiginnissutit tamatigut akineqartannginnerat?
  3. Kommuneqarfik Sermersooq qitiusoqarfiani Inunnik Isumaginninnikkut sullissisut qassiuppat? Sullissisup ataatsip inuit qassit amerlanerpaamik sullissinnaasarpai?
  4. Kommuneqarfik Sermersooq Inunnik Isumaginnittoqarnikkut pitsanngorsaanissamut periuutsiminik allannguissamaarpa?
  5. Inuit allakkatigut Inunnik Isumaginnittoqarfimmut saaffiginnissimagaluarlutik akineqarneq ajortut allatut qanoq iliornissaannik siunnersorneqarsinnaappat?”

Administrationens svar

Isumaginninnermut Suliffeqarnermullu Ingerlatsiviup akissutigisinnaavaa Ingerlatsivik allakkatigut saaffiginnissutinik amerlasuunik ataatsimoortumik allaffigineqarsinnaasunut nassiussanik tigusaqartarmat, imarisaallu tamarmik assigiinneq ajorput pimoorussaniit assigiinngitsunik siunertalinnut tunngasuusarlutik. Assersuutigalugu ingerlatsivik ussassaarutinik assigiinngitsunik allakkatigut elektroniskimik saaffiginnissutinik amerlasuunik tigusaqartarpoq. Saaffiginnissutit qassiusarnersut maannakkut naatsorsorneqarneq ajorpoq, aammalu ingerlatsivimmi sulisut saaffiginnissutinik kisitsisissallugit naleqquttuusinnaanngilaq.  Taamaattumik Isumaginninnermut Suliffeqarnermullu Ingerlatsivimmut allakkatigut saaffiginnissutaasartut tamakkerlutik qassiuneri nalunaarutigineqarsinnaanngilaq. Aamma allakkat qassit akineqartarnersut akineqarnerlu ajortut paasissutissiissutigiuminaappoq, ingerlatsivik qulaani oqaatigineqareersutut allakkatigut saaffiginnissutit tamakkerlutik qassiunerinik naatsorsugaateqanngimmat.

Allakkatigut saaffiginnissut assigiinngitsorpassuarnik siunertaqarsinnaasarpoq. Assersuutigalugu Ingerlatsivik pikkorissartitsinissamut neqeroorutit ilisimatitsissutiginerinik pissarsisarpoq, suleqatigisanit ilisimatitsissutinik, suleqatit saaffiginnissutaannik aammalu innuttaasut saaffiginnissutaannik. Saaffiginnissutip suunera apeqqutaatillugu tamanna naapertorlugu ingerlatsivik akissuteqartarpoq.

Inersimasunut ikiorsiissuteqartarnermut tunngasunik suliallit Nuummiittut 13-iupput. Paamiuni Tasiilamilu tamarmik immikkut arfineq pingasunik sullissisoqarput. Paamiuni Tasiilamilu sullissisut aamma ingerlatsivinni allani suliassanik suliaqartinneqartarput.

Ingerlatsivik innuttaasut sapinngisamik qanillugit pitsaasumik sullissinissaq anguniartuarpaa. Taamatut anguniagaqarnerup ikorfartorneqarnissaanut maannakkorpiaq ineriartortitsinermik suliaqartoqarpoq.

Aamma taamaappoq, Isumaginninnermut Suliffeqarnermullu Ataatsimiititaq qaammatit pingasukkaarlugit ikiorsiissuteqartarnermut tunngasuni angusat sullissinermilu anguniagassat ilisimatinneqartarpoq.

Innuttaasut Ingerlatsivimmut oqarasuaatikkut, nammineq saaffiginninnikkut, nalinginnaasumik allakkatigut e-mailikkullu saaffiginnissuteqartarsinnaapput.

Inussiarnersumik inuulluaqqusillunga

Isak Nielsen Kleist

Pisortaq

Isumaginninnermut Suliffeqarnermullu Ingerlatsivik