Suliffeqarfimmi Kiffartuussineq

+299 36 70 00
kommuneqarfik@sermersooq.gl

Kuussuaq 2, PO 1005
3900 Nuuk

  1. at. - ping. 10:00-15:00
  2. sis. 12:00-17:00
  3. tall. 10:00-12:00

Asasara Kommunalbestyrelsimi ilaasortaq, Laura Taunâjik.

Siullermik qujanarsuaq apeqqutinnut.

Februaarip ulluisa 13-t 2019 allatseqarfimmut FamilieCenterimi sulisut akissarsiaat annertuumik assigiinngissuseqarnerat nikigassuteqarnerujussuallu pillugit apeqquteqarputit. Sullissivimmi Kiffartuussivimmi Ingerlatsiviup apeqqutit ukuusut tiguai:

  1. Tasiilami familieCenterimi sulisut akisussaaffiit ataasiusut paarigaluaraangassuk, sooq akissarsiaasa nikinganerat sumik aallaaveqarpat?
  2. Suna tunngaviua akissarsiatigut assigiinngissitaarneq taamak nikingatigineranik?
  3. Kommuneqarfik Sermersooq qitiusumiit angalasoqarnissaanik Tasiilamut familieCenterimut pilersaanngila arlaatigut sulisut apeqqusigaannut qanimullu paasiumasaannut nassuiaajartortoqarnissaanik?

Tasiilami FamilieCenterimi sulisut aalaakkaasuupput, suliffimmut tunniusimasut piukkunnartut aalajaalluinnartullu.  Suliffimminni tunuluaqutatik aallulluarpaat sapinngisamillu sullinneqartut pisariaqartitaat aallaavigalugu sulinertik ingerlallugu.

Taamaakkaluartoq suliat assigiikkaluaraangasa akissarsiaasa nikinganerat sulisuusunit naammagisimaarneqaranilu ippinnartoqartinneqarpoq.  Tamanna pissusissamisoornersoq sulisuusunit ujartorneqarlunilu paasiumaneqarpoq.

Akisussaaffiit assigiit akissarsiatigulli assigiinngitsut ilumut naapertuunnersut sulisut eqqumiigaat. Tamatunami sunarpiaq peqqutaanersoq tunngaviunersorlu assut paasissallugu soqutigineqarpoq. Suliassat akisussaaffiillu ataasiusut qanoq isillutik akissarsiaasa taamak nikingatigisinnaanerat ersarissumik paasititsiniutigalugu tunngavilersorneqartariaqarpoq.


Administrationens svar

Asasara Laura,

Apeqqutigisannut qujanaq.

Siullermik naqissusissavara, uagut Kommuneqarfik Sermersuumi sulisugut 2300-t naleqartutut isigigatsigit aamma sapinngisartik tamaat maani kommunimi suliassatik suliarisaraat.  Tamanna aamma FamilieCenterini illoqarfinni atuuppoq aamma Tasiilami.

1 pillugu: Allatseqarfimmi isumaqatigiissutinik malitassaqarpugut taakku piumasaqaatinik pissutsinullu tunngasunik imaqarput.  Akissarsiat assigiinngissinnaapput apeqqutaalluni soorlu sulinermut peqatigiiffiit tunuliaqutarineqartut, ilinniagaqarneq, pikkorissarsimaneq, misilittakkat,atorfeqarnerup sivisussusia  aammali  tapeqartitaaneq.

Ima isumaqarpoq naak akisussaaffeqatigiikkaluarluni nalinginnaavoq, isumaqatigiissutit malillugit assigiinngitsumik akissarsiaqarneq.

2 pillugu: Kommunimit sulisut akissarsiaat piviusut ingerlateqqeqqusaanngillat kisianni nalinginnaasumik akissarsianut tunngasut oqaaseqarfigineqarsinnaapput.  Assigiinngitsunik akissarsiaqarneq assigiinngitsorpassuarnik patsiseqarsinnaavoq.  Soorlu taaneqareersutut assigiinngitsunik akissasiaqarneq assigiinngitsorpassuarnik patsiseqarsinnaavoq soorlu assersuutigalugu atorfeqarsimanerup sivisussusia malillugu susassaqarfimmi tapeqartitaaneq.  Nalinginnaasuuvoq isumaqatigiissutit patsisaallutik assigiinngitsumik akissarsiaqarneq naak akisussaaffeqatigiikkaluarluni,  taamatut malittarisassaqarmat.  Soorlu assersuutigalugu assigiinngitsunik ilinniagaqarsimaneq imaluunniit atorfeqarsimanerup sivisussusia pineqartillugu ukiut qassit sulisimanerup isumaqatigiissutaasup atuuttup malunnaatilimmik sunniutaasarpoq.

3 pillugu: Kiffartuussigasuartarfik februaarip ulluisa aallaqqaataanit Kiffaartuussigasuartarfimmi siunnersortimik atorfinititsivoq ilaatigut sulisunut kiffartuussineq suliaralugu akisussaaffigissallugu taamaalilluni Tasiilami aqutsisut sulisullu suliffimmut tunngasunut assigiinngitsunik saaffiginnissinnaanngorlugit.  Tamassuma saniatigut sulisut peqatigiiffiminnut saaffiginninnissaminnut periarfissaqartuaannarput kommunimi sinniisortik aqqutigalugu imaluunniit toqqaannartumik peqatigiiffik saaffigalugu.  Peqatigiiffiup ilaasortami sulinermi pissutsit misissortussaavaat paasiniarlugu ilumut isumaqatigiissutit atuuttut naapertorlugit akissarsiaqartitsisoqarnersoq.

Naggataatigut innersuussutigiinnassavara sulisut atorfitsik pillugu apeqqutissaqarunik qullersarisani aqutsisoq saaffigisinnaagaa paasissutissanik qulaajaaqqullugu tamannali naammanngippat aqutsisorisap qullersaa saaffigineqarsinnaavoq.

Inussiarnersumik inuulluaqqusillunga

Lars Møller-Sørensen

Kommunaldirektøri

Kommuneqarfik Sermersooq