Kommuneqarfik Sermersooq Kalaallit Nunaanni kommuniuvoq 22.738-nik innuttaqartoq (2018), taamaattumillu Kalaallit Nunaanni innuttaasut amerlassusii tunngavigalugit kommunini anginersaasoq. Kommunimi illoqarfiit anginersaraat Nuuk, Kalaallit Nunaanni illoqarfiit pingaarnersaat 17.796-inik innuttaqartoq. Kommunimi illoqarfiit nunaqarfiillu allat Kitaani Tunumilu sinerissami siammarsimapput. Kommune tamakkerlugu 635.600km2-nik angitigaaq. Kommunimi aqutsisuni qullersaavoq borgmesteri Asii Chemnitz Narup, Inuit Ataqatigiit.

Kommuneqarfik Sermersooq 2018--imi 1.7 mia kr.-nik missingersuuteqarpoq.

Allaffissornikkut oqaluttuassartaa

Kommune maannakkut ilusilersorneqarnermigut ingerlalerpoq 2008-mi kommuninik iluarsartuusseqqittoqarmalli, taamanikkut Kitaani Nuuk Kommune aamma Paamiut Kommune Tunumi Ittoqqortoormiit Kommune aamma Tasiilaq Kommune kattuteqatigimmatigit.

Kommuneqarfik Sermersuumi politikki

Kommuneqarfik Sermersuumi Kommunalbestyrelse 19-inik ilaasortaqarpoq. Kommunalbestyrelsip ataaniipput ataatsimiititat tallimat ingerlatsivinnut qulaani taaneqartunut naapertuuttut. Aamma sisamanik nunaqarfinni aqutsisoqarpoq: Arsummi Nunaqarfimmut Aqutsisut, Nunaqarfinnut Aqutsisut Kapisillit aamma Qeqertarsuatsiaat, Nunaqarfinnut Aqutsisut Kulusuk, Tiilerilaaq aamma Isertoq, kiisalu Nunaqarfinnut Aqutsisut Kuummiit aamma Sermiligaaq.

Paamiut, Tasiilaq aamma Ittoqqortoormiit tamarmik immikkut najukkami ataatsimiititaliaqarput, taakkulu siunertaraat najukkami oqartussaaqataanerup nukittorsarneqarnissaa, najukkami innuttaasut, peqatigiiffiit, kommunimi qinikkat oqartussaasullu suleqatigalugit sulianik siuarsaanikkut najukkami inuunermik taakkulu timitaasigut, kulturikkut oqartussaaqataanikkullu periarfissaannik naleqartitaannillu ingerlatsiinnarnissaq ineriartortitseqqinnissarlu suliarissallugu.

Illoqarfiit ikinngutigineqartut

Kommuneqarfik Sermersooq aalajangersimasunik tallimanik illoqarfinnik ikinnguteqarpoq. Danmarkimi Aalborg, Herlev aamma Gentofte. Islandimilu Kopavogur aamma Dalvik.

Quppernerup imarisaa qanganitsersimava?

Quppernermut naqqiutissaqarpit?