Marrarmi Qeqertarsuatsiaat avannaaniittumi Amerikamiut sakkutooqarfigisimasaanni saliinermik suliassaq



TAMANUT AMMASUMIK SULIARIUMANNITTUSSARSIUUSSINEQ

Kommuneqarfik Sermersooq Marrarmi Amerikamiut sakkutooqarfigisimasaanni saliinissamik suliassamik matuma ataani taaneqartumik matumuuna tamanut ammasumik suliariumannittussarsiuussivoq.


Suliassat suliamut piffissamik atuisimaneq aallaavigalugu akiligassiinikkut suliariumannittussarsiuunneqarput:


Sulisunut atortunullu akunnermut akigititat.
Sulisunik atortunillu assartuinermut akit.


Kitaani Kommuneqarfik Sermersuumi Amerikamiut ajornartoornermi timmisartoqarfigisimasaanni Marrarmi sorsunnersuup kingulliup nalaani atorneqartumi saliinermik suliassat pineqarput.


Suliassami pineqarput sulisunik atortunillu assartuineq kiisalu saliinermik suliamut atatillugu akunnerit killeqartumik amerlassuseqartut.


Saliinermik suliassat suliariumannittussarsiuunneqartut Amerikamiut Kalaallit Nunaanni sakkutooqarfigisimasaanni saliinermik ataatsimoorluni suliaqarnissaq pillugu Danmarkip Kalaallit Nunaatalu akornanni politikkikkut isumaqatigiissutip 11. Januar 2018-imeersup piviusunngortinneqarneranut ilaapput. Marrarmi saliinermik ataatsimoortumik suliassami, Kommuneqarfik Sermersuumit ingerlanneqartussami, atortut qimaannakkat annertuumik amerlassuseqartut, taakkununnga ilanngullugit nappartakut 50.000-it tungaannut amerlassuseqartut nunap qaavani toqqorsivinni arlalinniittut piaarneqarnissaat pineqarpoq.


Tigussaasumik saliinermik suliassanut suliariumannittussarsiuunneqartunut atatillugu sumiiffimmi suliniummut aqutsisup innersuussutai naapertorlugit qimaannakkanik
katersisoqassaaq, sissamut assartuisoqassalluni, nappartakunik qumartiterisoqassalluni umiarsuarmullu assartuummut usilersuisoqassalluni. Tamatuma saniatigut sumiiffinni nappartakunik atortunillu qimaannakkanik allanik saliivigineqartuni nunagissaanermik suliassanik (patajaallisaanermik) suliaqartoqassaaq.


Tunniussinissamut tunngavigineqassaaq aki appasinnerpaaq.


Suliassamik tunineqarsinnaassagaanni neqeroorusiamut Upperisaq Inatsisillu tunngavigalugit uppernarsaat ilanngunneqassaaq, tassanilu allassimassalluni neqerooruteqartoq pisortanut akilerneqareersimasussanik annerpaamik 100.000 kr.-nik akiitsoqartoq.


Suliassat 2019-imi juulip qeqqanit 2019-imi septembarip aallaqqaataanut suliarineqarnissaat pilersaarutigineqarpoq.


Neqeroorusiornermut atortussat maajip 16-ianit inniminnerneqarsinnaalissapput uunga: RAMBØLL Grønland A/S - Boks 850, 3900 Nuuk Mail aqqutigalugu: ramboll@ramboll.gl

Kommuneqarfik Sermersuumi Avatangiisinut Pisortamut Frank Rasmussenimut (frra@sermersooq.gl) nalunaarutiginnereernikkut.


Sanatitsisoq neqeroorutit takkussimasut arlaannaannilluunniit akuerinninnginnissamut imminut pisinnaatippoq.


Suliariumannittussarsiuussineq juunip 25-ani nal. 14.00 pissaaq uani: Rambøll Grønland, Imaneq 32, 2. sal.


Juunip 18-iani nal. 13.00 tungaanut aperinissamut periarfissaqartitsisoqassaaq, tamatumalu kingorna apeqqutit akineqarnissaat naatsorsuutigineqarsinnaassanani.


Inussiarnersumik inuulluaqqusilluta
Sanaartornermut Avatangiisinullu Ingerlatsivik