Inuiattut Ullortunersiorneq 2021

07.30 Inuiattut ullorsiorneq nal. 07.30 aallartissaaq, peqatigiiffiit kommuneqarfiup allaffiata eqqaaniit Nuutoqqamut ingerlaaqatigiinneq. Erfalasulerlutit/si ingerlaaqataanissamut tikilluaqqusaavutit/si.  

07.55 Nuutoqqami scenemi Erinarsoqatigiit NIPE Nunarput Erfalasorlu erinarsussavaat.

08.00 Puisimik pisaqaqqaanniunneq! Puisimik pisaqaqqaanniunneqanngitsumik inuiattut ullorsiortoqassanngilaq. Naalakkersuisut Issittumilu Sakkutooqarfiup qamutilittarlutik puiseqqaanniunneq aallartissavaat, taamaalillutik qamutilittarujussuarnermik piniartut aallartinneqassapput!

08.05 Tikilluaqqusineq. Scenemiit tikilluaqqusisoqassaaq.

08.10 Erinarsoqatigiit – Nuna Asiilasooq.

08.15 Borgmesteri Charlotte Ludvigsen takkussimasunut oqalugiassaaq.

08.25 Erinarsoqatigiit – Nunarput utoqqarsuanngoravit.

08.30 Ingiulik.

08.35 Annaassisitta Oqaluffianut ingerlaaqatigiinneq. Peqatigiiffiit siulliullutik erfalasulerlutik ingerlaassapput, kikkullu tamarmik Annaassisitta Oqaluffianut ingerlaaqatigiinnermi malinnaasinnaapput.

09.00 Annaassisitta Oqaluffiani naalagiaqatigiinneq.

10.00 Assilitinneq. Tamat Annaassisitta Oqaluffiata saavani kalaallisoorlutik katersuutissapput, tassani assiliisartumit assilineqarnissaq periarfissaavoq – akeqanngitsumik. Tamatuma kingorna kommunip Facebookimi nittartagaanut assit ikkussuunneqassapput, tassanngaanniillu aaneqarsinnaallutik.

10.30 Ingerlaaqatigiinneq. Annaassisitta Oqaluffianit ataatsimoorluta Biologstationip Jens Kreuzmannip aqqutaa isulillugu Sana saneqqullugu inissisimasup tungaanut pisunnitsinni, assuutit, erfalasut inuillu nuannaartut aqqusinermi takuneqarsinnaassapput.

Biologstationip eqqaani:
11.30 Nunarsuarmi Paggannerit annersaat! Nunarsuarmi Paggannerit annersaat pilersinniarsarissavarput ikiorneqarnissarpullu pisariaqartipparput. Kikkulluunniit peqataanissamut tikilluaqquneqarput. Tamanna Biologstationip eqqaani pissaaq neriuppugullu amerlasuujullusi takkutissasusi paggatassallu nammineq nassassagisi.

11.45 Grillereqatigiinneq. Ataatsimut grilleriffissaq piareersassavarput ikinnissaalu isumagalugu. Tamatuma kingorna nerisassat nassatasi nerisinnaasasilu grillersinnaavasi.