Eqqagassat avatangiisinut ulorianaatillit eqqaavimmut eqqarneqassanngillat imikullu kuuffiinut kuineqassanatik.

Eqqagassat avatangiisinut ulorianaatillit tassaapput eqqagassat pinngortitamut pissangaluarunik annertuumik ajoqusiisinnaasut. Eqqagassat avatangiisinut ulorianaatillit annerpaartaat akuutissanik arriitsuaqqamik asiujartortartunik imaluunniit asiusinnaanngitsunik akoqarput. Avatangiisini katersuuttarput assersuutigalugulu aalisakkanut piniakkanullu allanut pisarlutik. Avatangiisinut toqunartut taamaasillutik naggataatigut inummut pisinnaasarput. Akuutissat taakku uumasunik inunnillu ajoqusiillutillu napparsimalersitsisinnaapput. Assersuutigalugu inuit uumasullu kinguaassiorsinnaanerannut, meerartaarnissamut piarartaanissamut, sunniueqarsinnaapput kiisalu kræfteqalissutaasinnaallutik.

Eqqagassat avatangiisinut ulorianaatillit aamma toqqaannartumik ajoqusiisinnaapput, soorlu uutsiteralutik imaluunniit nerisooraanni toqunartuullutik, taamaammat meeqqanit uumasunillu pallinneqatsaaliorlugit inissinneqartassapput.

Eqqagassat avatangiisinut ulorianaatillit ilaatigut tassaapput:

Akkumulatorit, batteriit, sakkut innaallagiatortut, sakkut nalunaaquttalluunniit batteriitallit, imerpalasut assinik ersersaanermut atortakkat, lysstofrørit, pærit innaallagissamik atuinikitsut, qalipaatit, lakki, liimmi, uuliamit pisut, arrorsaatit (soorlu ass. benzin, acetone aamma terpentin), eqqiaanermut qaqorsaatit kimittuut, qillertuusat seqqalittaatitallit, uumasuaqqanik naasupilunnillu toqoraatit, kiassiutit. Aamma atortussiat qulaani taakkartorneqartut poorisimasaat, soorlu ass. siparni qalipaatip sinnikuinik imalik, eqqagassatut ulorianaatilittut isigineqassaaq.

Nillataartitsiviit qerititsiviillu aammalu eqqakkat elektronikkitallit akuutissanik imaqarput avatangiisinut ulorianaatilinnik, taakku aamma eqqagassatut ulorianartutut suliarineqartariaqarput.

Eqqagassat avatangiisinut ulorianaatillit akuleruteqqusaanngillat puuiniitiinnarlugillu imaluunniit sumik imaqarnerinik ersarissumik nalunaaqutserlugit tunniunneqassapput. Kommuneqarfiup tigooraaviinut/inissiiviinut immikkoortillugit tunniunneqassapput.

Eqqagassat avatangiisinut ulorianaatillit pillugit apeqqutissaqaruit Pinngortitamut Piujuartitsinissamullu Immikkoortortamut oqarasuaatikkut 367400-ikkut imaluunniit e-mailikkut sai@sermersooq.gl allallutit saaffigisinnaavutit

Quppernerup imarisaa qanganitsersimava?

Quppernermut naqqiutissaqarpit?