Thinkinuk 2018-imi nutarsarlugu inerisarneqarpoq, siornatigut tassaalluni ”Tatitussuseq”. ”Tatitussuseq” nakorsamit Poul Lundgaard Bak-imit pilersinneqarpoq, maannalu perorsaasoq Louise Lundgaard peqatigalugu ”Thinkinuk”-mik atserlugu ingerlanneqarluni.

Kommuneqarfik Sermersuumi Thinkinuup ingerlanneqarnerata anguniagaraa kommuneqarfiup iluani innuttaasut pingaartumik meeqqanut inuusuttunullu sullissisut ataavartumik tarnikkut eqqarsartaatsikkullu peqqissumik inissisimalernissaat, taamaasillutillu imminut sullitaminnullu inuunermi unammilligassanut aniguisinnaanissamut ikiuussinnaanngussammata.

Tamassuminnga ikiuussinnaalernermut ilaatigut ilaapput assigiinngissutsinik inissaqartitsisinnaalerneq, tassa suleqatinut, sullitanut – ataatsimut isigalugu inoqatinut qanoq ikkaluartunut akuersaartuuneq, taamatullu inuttut inissisimasoqartillugu sumiiffigisaq toqqissisimanarnerusarpoq – akuerineqarluni!

Tamassumunngali aallaaviupput eqqarsaatit ulorianarsinnaasut pitsaasumut saatsinniarnissaat. Tassa Thinkinuk tamassumunnga tunngassuteqarpoq.

Pikkorissarneq

Ukiut tamaasa Thinkinuk Kommuneqarfik Sermersuumit pikkorissaavigineqarnissamik neqerooruteqartarpoq, neqeroorfigineqartut tassaakkajullutik atuarfiit, inuusuttut ornittagaanni sulisut, inuusuttut angerlarsimaffii assigisaannillu sullissallit. Kiisalu pisariaqartitsineq aallaavigalugu saqqummiussinernik assigisaannilllu aggersarneqarnissamut piareersimasarput. Uanili inersimasut meeqqanut inuusuttunullu sullissisut sakkussaannik tunniussaqarnissaq eqqarsaataavoq, meeqqanut toqqaannartumik saqqummiussisarneq sammisaqartitsinerluunniit ingerlanneqarneq ajorluni.

Paasissutissat allat

Thinkinuup imarisaa tamakkiisumik paasisaqarfigerusukkukku nittartagaq thinkinuk.com iserfigalugu misissuiffigisinnaavat.

Quppernerup imarisaa qanganitsersimava?

Quppernermut naqqiutissaqarpit?