Mary Fondenip Red Barnetillu meeqqerivinnut atualerlaanullu (1. klassiniit 3. klassinut) nikassaasarneq akiorniarlugu suliniut ineriartuaartissimasaat ”Kammagiitta – Fri for Mobberi”-p kuffertiinik marlunnik kinguneqarpoq. Sungaartoq / qorsuk meeqqerivinnut aamma tungujortoq / aappaluttoq atuarfinnut.

Danmarkimi atuarfiit meeqqeriviillu 2007-imili nikassaasarneq akiorniarlugu suliniutit aallartippaat, tamatumali kingorna pitsanngorsarneqarlutillu atortussanik nutaanik pilersitsiortortoqarsimavoq. Maanilu Kalaallit Nunaanni atortussat assigiinngitsut 2011-mi kalaallisuunngorsarlugit suliareqqinneqarput.

“Kammagiitta – Fri for Mobberi”-mut kuffertit nikassaasarnerup piaartumik akiorniarneqarnissaa kiisalu meeqqerivimmiit atualerlaaniillu aallartilluni pitsaaliuinermik aallartitsinissaq meeqqallu pitsaanerusumik ataatsimoortarnissaat eqqarsaatigalugit suliarineqarput.

”Kammagiitta – Fri for Mobberi” meeqqat akornganni qinngasaaruttarnerup annikillisinniarlugu meeqqanut paasissutissanik, sungiusaatinik qanorlu kinguneqarsinnaaneranik iliuuseqarnissamut kiisalu taakkua angajoqqaavi aamma ”Kammagiitta – Fri for Mobberi”-mut peqataatinneqarnissaat siunertaavoq.

Suliniummi anguniagaq

Anguniagaavoq meeqqat akornganni ilaluarisaqarnani ataavartumik inuuneqalernissaq, taamalu nikassaanermik pitsaaliuilluni. ”Kammagiitta – Fri for Mobberi”-p meeqqat meeqqerivimmiittut atualerlaallu akornganni akaareqatigiilluni ataqqeqatigiillunilu pitsaasumik ataatsimoortarnissaq anguniagaraa. Tassa meeqqat imminnut isumassoqatigiillutik kiisalu sapiissuseqarlutik nikassaanermut qisuariartarnissaat kammalaatiminnillu imminnut illersorsinnaanngitsunik illersuisarnissaat anguniarlugu.

”Kammagiitta – Fri for Mobberi”-p suliniutaa naleqartitanik tallimanik tunngaveqartoq, meeqqerivimmi meeqqat imminnut pissusilersornerannut sunniuteqarluartumik siaruarsinnaavoq. Tamatuma saniatigut meeqqeriviup iliuusissatut pilersaarusiaani perorsaanermilu ilikkagassatut pilersaarutini ilanngunneqarsinnaavoq.

Taamaattumik ”Kammagiitta – Fri for Mobberi” piffissap killillip iluinnaani suliniutissatut suliaanngilaq, meeqqerivimmiinnerli tamakkerlugu atuuttuartussatut takorluugaalluni.

Mary Fondenip Red Barnetillu nikassaasarneq pitsaaliorniarlugu pilersaarusiaani tunngaviupput:

  • Meeqqat akornganni nikassaasarneq inersimasut akisussaaffigaat
  • Pitsaaliuinermi periusissiat
  • Nikassaasarnerup pitsaaliorniarnerani sunnerniagassat nutaat tassaapput nikassaanermi isiginnaaginnartut
  • Meeqqat akuersaaqatigiillutik, ataqqeqatigiillutik, isumassuillutik sapiissuseqarlutillu peqatigiittarnerisa ineriartortinnissaa

Naleqartitat tallimat

Nikassaanermik pitsaaliuineq Danmarkimi inuttut naleqartitanik sisamanik tunngaveqarpoq. Kalaallit Nunaannili ataatsimik ilasimavagut, tassaalluni Toqqissisimaneq. Sulisut namminneq naleqartitat taakku meeqqerivimmi atuarfimmiluunniit ulluinnarni meeqqat akornganni, inersimasut akornganni kiisalu meeqqat inersimasullu akornganni qanoq isumalimmik atugaassanersut oqaasertalersussavaat. ”Kammagiitta – Fri for Mobberi”-p tunngaviusumik naleqartitai aallaavissatut ima nassuiarneqarput:

  • Akaarinninneq

    Meeqqat assigiinngitsuunerat akunnerminnilu naligiittut pissusilersorfiginissaat takussallugu akuerissallugulu. Meeqqani ataasiakkaani meeraqatigiillu akornganni assigiinngissutsit nakooqqutitut isigissallugit.

  • Ataqqinninneq

    Meeraqatigiinni meeqqat tamarmik akuerineqarlutillu eqqarsaatigineqarnissaat. Tamanut kammalaataalluarneq. Assigiinngissutsinut inissaqartitsineq allallu assigiinngissusaannik pissusaannillu ataqqinninneq.

  • Isumassuineq

    Meeqqanut tamanut soqutiginninnermik, misigeqatiginninnermik, ernumanermik ikiuukkusussutsimillu takutitsineq – minnernut, annernut peqatigiiaanullu.

  • Sapiissuseq

    Meeqqat ilaat ilamik killissaannik qaangiisut takugaanni itigartitsisinnaaneq killiliisinnaanerlu. Sapiitsuullunilu kammalaataalluarneq, naapertuilluanngitsumik iliortoqartillugu qisuariartartoq.

  • Toqqissisimaneq

    Illersorneqarluarluni peroriartorneq. Inersimasut tatigineqarsinnaatillugit ulluinnaap qanoq ingerlanissaa meeqqap naatsorsorsinnaavaa, taamaasillunilu inuuneq nalorninarneq ajorpoq.

Quppernerup imarisaa qanganitsersimava?

Quppernermut naqqiutissaqarpit?