Pinartumik ilimaginngisamillu toraarneqassagaluaruit Kommuneqarfik Sermersuumit ikiorneqarsinnaavutit tapersersorneqarlutillu.

Kommuneqarfik Sermersuumi innuttaasunut ikiungasuarnissamut tapersersuinissamullu, Kommuneqarfik Sermersooq pinartumik nalaataqarnerluttunut ikiuigasuarnissamut upalungaarsimavoq.

Innuttaasoq nalaataqarnerlunnerni annikinnerusunit sunnertittoq Siunnersuisarfimmut Ammasumut Meeqqanut Ilaqutariinnullu Sullissivimmut saaffiginninnikkut ikiorneqarsinnaavoq oqaloqatiginnillunilu, tassuunalu ingerlariaqqinnissamut isumaqatigiissuteqarsinnaalluni.

Pisut ilaanni innuttaasup nammineq isumaginissaat akisussaaffigai, tamannalu ilaatigut ilaquttat peqatigalugit pisinnaavoq. Inuunerup ilagaa alianartunik nalaataqarnernillu aqqusaagaqarneq.

Qaqugukkut ikiuigasuartoqassava?

Ikiuigasuarnissamut upalungaarsimaneq annertuumik pinartumik nalaataqarnikkut, innuttaasumut kingunerlutsitsinermik pilersitsisinnaasumik allanilluunniit pisoqareernerata kingorna sunniutaasunik ersiuteqartoqartillugu aatsaat aallartinneqassaaq. Innuttaasoq pisumut peqataasimasinnaavoq, soorlu annattuulluni pisumilluunniit takunnittuulluni. Pisut ataani allassimasut ikiuigasuarnermut upalungaarsimanermik aallartitsissutaasinnaapput:

  • Biilinik/umiatsiamik ajutoornerit pinarluinnartut, imminut toquttoqarnerata kingorna, toqutsisoqarnerata kingorna, annertuumik ikuallattoqarnerata kingorna assigisaanillu.
  • Meeqqanut angajoqqaamik tassanngaanartumik toqukkut qimaguttoqarnerata kingorna soorlu uummammik unittoornikkut il.il. ikiugasuarnermik aallartittoqassaaq.

Qaqugukkut ikiuigasuartoqassanngila?

Ikiuigasuartussatut upalungaarsimasut ulluinnarni kommunimi piffissaq tamakkerlugu sulisarput, nalaataqarnerlunnerlu pinartuunngikkaangat inuunermilu aqqusaagassatut isigisassaappat Kommuneqarfik Sermersuumi katsorsartinnissamut neqeroorutit aqqutigalugit ikiorneqarnissaq periarfissaavoq.

Innuttaasullu ilaatigut nammineq qinikkamik kingorna kingunerlutsitsisarput, soorlu isiginnaagassiamik isiginnaareernermik kingorna. Innuttaasut taamatut nalaataqartut Meeqqanut Ilaqutarinnullu Sullissivimmi Siunnersuinermi Ammasumi  ataasinngornikkut ingerlanneqartartumi saaffiginnissinnaapput.

Ikiuigasuarnissamut upalungaarsimaneq katsorsartinnissamut neqeroorutaasut avaqqullugit tarnip pissusaanik ikiorneqarnissamut periarfissaanngilaq akeqanngitsoq. Ikiuigasuartussatut upalungaarsimasut pinartumik nalaatsortumillu nalaataqartunoortuuvoq.

Ikiuigasuarneq ingerlanneqassanngilaq imatut pisoqartillugu:

  • Isiginnaagassiat – sammisap oqimaassusaa apeqqutaatinnagu.
  • “Pissusissamisut” toqusoornerit/ napparsimasoqareernermi toqusoornerit.
  • Angerlarsimaffimmi nakuuserneq (qimarnguimmi malittarisassat tassani atuutilissapput, pinartuugaluarpalluunniit)
  • Sumiginnaaneq (Inunnik isumaginnittortaqarfimmi pigaartup malittarisassai atuutilissapput/MII)
  • Inuttut atukkat unamminartut (Kommuneqarfik Sermersuumi malittarisassat nalinginnaasut atuupput)

Ikiuigasuarnissamut upalungaarsimasut qanoq attavigineqassappat?

Oqartussanit ukua ikiuigasuarnissamut upalungaarsimasunut ikioqqullutik sianersinnaapput:

  • Politiit
  • Peqqinnissaqarfik
  • Qatserisartoqarneq
  • Peqatigiiffinni (soorlu qamuteralattartut klubbii, timersoqatigiiffiit, assigisaaluunniit) pisunik pinartumik nalaataqartoqassagaluarpat.

Maluginiaruk, ikiuigasuarnissamut upalungaarsimasut nalinginnaasumik pisoqarnernut namminneq takkunneq ajormata. Peqatigiiffiit assigisaalluunniit ikiorneqarnissamik atorfissaqartitsissagaluarpata fagchefi sumiiffimmiluunniit aqutsisoq saaffigineqassaaq (ataani saaffiginniffissat takukkit).

Kommuneqarfik Sermersuup aggersarneqaqqaarani aggernera inuit ilaannut killissamik qaangiinerusinnaavoq, inuillu nalaataqarnerluttut ataqqisariaqarpavut. Inuit ilaat nalaataqarnerlunnerminik ikiorneqarnissamik pisariaqartitsineq ajorput taamaattoqaraangallu kommunimit ikiorneqarnissamik noqqaangikkaluarluni pinngitsaalineqartutut misigisoqarsinnaavoq.

Suliassaq

Ikiuigasuarnissamut upalungaarsimasussat tunngaviusutut innuttaasoq/-sut ajutoornermik/nalaataqarnerluttoq oqaloqatigissallugu suliassaraat. Tassungalu atatillugu innuttaasup pisariaqartitai malillugit oqaloqateqaqqinnissamik neqeroorfigineqassaaq. Annertunerusumik ajutoortoqarnermi eqimattanngorluni pisoq pillugu oqaloqatigiinnissamik neqeroortoqassaaq.

Ajutoornermut tunngasut suliassaasut isumagisassallu ( soorlu toqutsisoqarpat, ajutoortoqarpat ikuallattoqarpat), politiinit/peqqinnissaqarfimmit/qatserisartunillu akisussaaffigineqarput.  Ikiuigasuarnermi upalungaarsimasut nalaataqarnerlunnermik eqqugaasut akisussaaffigaat.

Nalaataqartunik ikiuisussat tassaakajunnerupput kommunimi inunnik isumaginnittortaqarfimmi sullissisut tarnikkullu ikiueqqaarnissamik pikkorissarnermik naammassinnissimasut. Immikkut ittumik pisoqarnerani ikiuigasuartussanit fagchefimiillu pisariaqartinneqartutut isumaqartoqarpat tarnip pissusaanik ilisimasalimmik aggersaasoqassaaq.

Ikiuigasuarnermi upalungaarsimaneq innuttaasunik pinartumik, nalaataqarnerlunnermi neqeroorutaavoq killeqartoq, katsorsarneqarnissamut neqeroorutaangitsoq.

Ikiuigasuartut nipangiussisussaatitaapput ikiuigasuartullu avataaniittunut ajutoortoqarneranik ingerlatitseqqiisussaanngillat saqqummiussillutilluunniit, ilaatigut politiiniit akuersissutigineqarsimanngippat.

Ittoqqortoormiini annertuumik ajutoortoqarsimaneratigut Nuummiit Tasiilamiilluunniit ikiuigasuartussanik tikisitsisoqassaaq


Quppernerup imarisaa qanganitsersimava?

Quppernermut naqqiutissaqarpit?