Piginnaanngorsaanermi suliassaqarfimmi pillorissaasumik timimillu sungiusaasumik inersimasunik utoqqarnillu sullissaqartunik sulisoqarpoq.

Kina sullinneqarsinnaava:

  • Inuit innarluutillit tapersersorneqarnissaannut Inatsisartut inatsisaat nr. 13, 12 juni 2019-imeersoq naapertorlugu ilaatinneqartut
  • Utoqqaat 65-it sinnerlugit ukiullit. Utoqqalinermi pensionisiat pillugit Inatsisartut inatsisaat nr. 20, 23 november 2015-meersoq
  • Innuttaasut timimikkut piginnaasaasa qaffasissusaat allanngorsimasut ikiortariaqartullu imaluunniit ikiorserneqartut
  • Innuttaasut Utoqqaat Illuannut oqilisaassisarnermut innersuunneqarsimasut

 

Qanoq saaffiginnittoqassava

  • Innuttaasoq nammineq, qanigisaasut, peqqinnissaqarfimmit sulisut, oqilisaassisarfimmi sulisut, angerlarsimaffimmi ikiortit, innersuussisartut, kiisalu sullissisut saaffiginnissinnaapput
  • Timimik sungiusaasut pillorissaasullu saaffiginnissummik tigusaqareeraangata innuttaasoq saaffigineqartarpoq siumullu pilersaarusiorneq aallartittarluni
  • Timimik sungiusaasut pillorissaasullu ataasiakkaarluni imaluunniit sungiusaqateqartarnermik aallartittoqassanersoq nalilersorlugulu innersuussutigissavaa


Pillorissaasup timimillu sungiusaasup suna neqeroorutigisinnaavaa?


Paaqqutarineqalernissaq sioqqullugu sungiusarneq

Innuttaasunut timimikkut piginnaassaminnit piginnaasakinnerulersimasunut angerlarsimaffimmilu ikiorteqarnissamut pisariaqartitsisunut ikiorteqartunulluunniit Paaqqutarineqalernissaq sioqqullugu sungiusarneq ingerlanneqartarpoq. Sungiusarneq innuttaasut angerlarsimaffianni ingerlanneqartarpoq.

Timimik sungiusaasut pillorissaasullunniit sungiusarnerup pillorissaanikkut timimik sungiusarnikkulluunniit ingerlanneqassanersoq nalilersortarpaat. Sungiusarnerit innuttaasup ulluinnarni sammisassaminnik naammassinninniarneranut unamminartitsisunut periutsinik ilitsersuussinernillu imaqarsinnaapput. Soorlu imaasinnaavoq atisaajarnermi atisalersornermi, iganermi, uffarnermi imaluunniit ulluinnarni isumagisassanik nalinginnaasunik innuttaasumut unamminartut pillugit piginnaanngorsagassaasoq. Imaasinnaavoq aamma illup iluani/silami pisunneq pillugu, makittarissarneq imaluunniit nukiit pillugit nalilersortinnissaq pisariaqartinneqartoq. 
Paaqqutarineqalernissaq sioqqullugu sungiusarneq angerlarsimaffimmi ikiortit angerlarsimaffimmilu sungiusaasut qanimut suleqatigiinnerannik ingerlanneqartarpoq.


Pillorissaavik – Utoqqaat Illuanni oqilisaasisarneq

Timimik sungiusaasut pillorissaasullu suleqatigiit piginnaanngorsaanermi suliassaqarfimmiittut oqilisaassisarnermut attuumassuteqarput, utaqqiisaasumik innuttaasut oqilisaassisarfimmiittartut piginnaasaasalu inissisimaffiinik nalilersuiffigineqartarlutik. Tassa imaappoq inuttaasup sapinngisai sapigaalu. Innuttaasup timimikkut eqqarsartaatsimikkullu inissisimavia tunngavigalugu angerlarsimaffimminiiginnassanersoq imaluunniit allamut inissinneqassanersoq nalilerneqassaaq. Innuttaasoq Oqilisaassisarnissamut allatsissappat kommunimit innnersuuneqaqqaassaaq.

Timimik sungiusaasut pillorissaasullu ulluinnarni sammisassanut nalinginnaasunut naammassinninnissamut iliuusissanik sungiusaatinillu ikiuisinnaapput. Imminut isumaginerusinnaavoq, sunngiffimmi sammisassaasinnaapput, timimik sungiusarnerusinnaavoq aalanermullu tunngasuusinnaapput. Tunngaviusumik innuttaasoq atisaajarnissaminut atisalersornissaminullu, sunngiffimmi sammisartakkanut, ulluinnarni pilersaarusiornernut, iganermut, errorsinermut illup iluani silamilu pisuttarnermut kiisalu tummeqqakkoortarnermut piginnaaneqalernissamut ikiorneqarsinnaavoq. Tamanna oqilisaassisarfimmi sulisut qanimut suleqatigalugit pissaaq.


Iluaqusersuutit

Timimik sungiusaasut pillorissaasullu iluaqusersuutinik inigisamiluunniit allannguisoqarnissaanik pisariaqartitsisoqarnersoq nalilernissaat akisussaaffigaat.

Innuttaasup piginnaasai allanngoriarujussuarsimappata timimik sungiusaasut pillorissaasullu pulaartarput ulluinnarni oqilisaataasussanik iluaqusersuutinik aamma/imaluunniit inigisap allanngortinneqarnissaanik pisariaqartitsisoqarnersoq nalilersorniarlugu. Imaassinnaavoq rollatorinik, uffarfimmi issiavimmik, nerinermut atortunik immikkut ittunik, kørestolenik iggavimmilu atortorissaarutinik pisariaqartitsisoqartoq. Timimik sungiusaasut pillorissaasullu iluaqusersuutit inniminnernissaat, naleqqussarnissaat, misilittarnissaat tunniunnissaallu akisussaaffigaat taamaasilluni innuttaasoq namminersorsinnaanerulerniassammat angerlarsimaffimminilu toqqissisimalluni najugaqaannarniassammat.


Siunnersuisarneq ilitsersuisarneq nuussinissamullu ilitsersuussisarneq

Iluaqusersuutit pillugit innuttaasoq, qanigisaasoq suleqataasorluunniit innuttaasumut periarfissai pillugit nalornilissagaluarpata timimik sungiusaasut pillorissaasullu siunnersuisarput ilitsersuillutillu. Timimik sungiusaasut pillorissaasullu angerlarsimaffimmi ikiortinut, Ippiarsummi, Utoqqaat illuanni Sammisassaqartitsivinnilu sulisunut nuussinissamut ilitsersuisarputtaaq.


Suleqatit

Timimik sungiusaasut pillorissaasullu innuttaasut qanigisaasullu, oqilisaassisarfimmilu sulisut, angerlarsimaffimmi ikiortit, innersuussisartut kiisalu Dronning Ingridip Napparsimavissuanit timimik sungiusaasut pillorissaasullu aammalu nakorsat qanimut suleqatigisarpaat. Suleqatit tamarmik malinnaatinneqartarput innuttaasullu piginnaanerisa attatiinnarnissaanut iliuuseqaqataallutik. Taakkua saniatigut innuttaasup pisariaqartitsinera naapertorlugu ataavartumik avataanit suleqatinit ilisimasassanik paasiniaasoqartarpoq.

 



Saaffiginnissutit tamarmik mailimut uunga nassiunneqassapput:

terapeut@sermersooq.gl


Quppernerup imarisaa qanganitsersimava?

Quppernermut naqqiutissaqarpit?