Inersimasunut suliassaqarfimmi pillorissaasumik timimillu sungiusaasumik inersimasunik utoqqarnillu sullissaqartunik sulisoqarpoq.

 

Kikkut sullinneqarsinnaasut  

  • Innuttaasut inuit innarluutillit tapersersorneqarnissaannut Inatsisartut inatsisaat nr. 13, 12 juni 2019-imeersoq naapertorlugu ilaatinneqartut
  • Utoqqaat 65-it sinnerlugit ukiullit. Utoqqalinermi pensionisiat pillugit Inatsisartut inatsisaat nr. 20, 23 november 2015-imeersoq
  • Siusinaarlutik pensionisiallit angerlarsimaffimminni najugaqartut tarnip nakorsaqarfianit nappaatilittut nalilerneqanngitsut. Siusinaartumik pensionisiat pillugit Inatsisartut inatsisaat nr. 40, 9. december 2015-imeersoq
  • Inersimasut 18-ileereersimasut
  • Innuttaasut utoqqaat illuini najugaqatigiiffiinilu najugallit

Qanoq attaveqartoqassava

  • Innuttaasoq nammineq, qanigisaasut, peqqinnissaqarfimmit sulisut kiisalu sullissisut saaffiginnissinnaapput
  • Timimik sungiusaasut pillorissaasullu saaffiginnissummik tigusaqareeraangata innuttaasoq saaffigineqartarpoq siumullu pilersaarusiorneq aallartittarluni
  • Timimik sungiusaasut pillorissaasullu ataasiakkaarluni imaluunniit sungiusaqateqartarnermik aallartittoqassanersoq nalilersorlugulu innersuussutigissavaa


Pillorissaasut timimillu sungiusaasut qanoq neqerooruteqarsinnaappat?

 


Sungiusarneq

Sungiusarneq ulluinnarni piffissami 08.00 – 16.00 ingerlanneqartarpoq aamma innuttaasoq, angajoqqaat, pillorissaasut timimillu sungiusaasut tapersersorteqarpallu taakku akornanni suleqatigiissutigalugu pilersaarusiorneqartarpoq.

Ataatsimut sungiusarnerit Ippiarsummi Utoqqaallu Illuanni, innuttaasup angerlarsimaffiani imaluunniit illoqarfiup naluttarfiani Malimmi ingerlasarput.

Nappaatit ajornakusoortitallu malillugit ataatsimoortut immikkoortinneqarsinnaapput. Innuttaasut qaratsakkut aanaartoorsimasinnaapput (qaratsami aanaartoorneq/qaratsami taqqatigut milittoorneq), seeqqukkut- siffissakkulluunniit ajornartorsiuteqarneq, makittarissaarsinnaanikkut assanilluunniit atuisinnaanermik annikillisitsisimanerminngaanniit. Sungiusarneq aamma innuttaasunut sungiusarusuttunut sungiusaanerusinnaavoq.

Ataasiakkaarluni sungiusarneq angerlarsimaffimmi, sungiusartarfimmi imermiluunniit ingerlanneqartarpoq. Sungiusarneq innuttaasup ulluinnarni unammillernarnerutitai tunngavigalugit sungiusaaneruvoq. Assersuutigalugu immaqa innuttaasoq pisiniarfilerisinnaanngilaq, uppikkajuttuusinnaalluni imaluunniit ulluinnarni sammisassat soorlu errorsineq, uffarneq nerinerluunniit isumagissallugit ajornarnerulersimappata.


Iluaqusersuutit

Timimik sungiusaasut pillorissaasullu iluaqusersuutinik inigisamiluunniit allannguisoqarnissaanik pisariaqartitsisoqarnersoq nalilernissaat akisussaaffigaat.

Innuttaasup piginnaasai allanngoriarujussuarsimappata timimik sungiusaasut pillorissaasullu pulaartarput ulluinnarni oqilisaataasussanik iluaqusersuutinik aamma/imaluunniit inigisap allanngortinneqarnissaanik pisariaqartitsisoqarnersoq ulluinnaat oqinnerutinniarlugit nalilersorniarlugu. Imaassinnaavoq rollatorinik, kørestolinik, uffarfimmi tigutsivik, uffarluni issiaviit imaluunniit nerinermut atortunik immikkut ittunik ikiuuteqartoq. Timimik sungiusaasut pillorissaasullu iluaqusersuutit inniminnernissaat, naleqqussarnissaat, misilittarnissaat tunniunnissaallu akisussaaffigaat.


Siunnersuinerit ilitsersuinerillu

Timimik sungiusaasut pillorissaasullu innuttaasunut, qanigisaasunut suleqatigisartakkanullu siunnersuineq aqqutissiuussinerlu ingerlattarpaat, taassuma ataani kørestolit, pisunnermi ikiuutit, nuutsinermi ikiuutit ulluinnarnilu sammisassanik naammassinninnissamut ikiuutit. Timimik sungiusaasut pillorissaasullu ilitsersuinermik nuutitsinermi ilitsersuinerit, sungiusarneq, issiariaatsini inissiilluarnernilu ikiuuttarput.


Suleqatit

Timimik sungiusaasut pillorissaasullu innuttaasut qanigisaasullu, utoqqaat illuini immikkoortortani sulisut, angerlarsimaffimmi ikiortit, ikorfartoqatigiit kiisalu Dronning Ingridip Napparsimavissuanit nakorsat qanimut suleqatigisarpaat. Suleqatit tamarmik malinnaatinneqartarput innuttaasullu piginnaanerisa attatiinnarnissaanut iliuuseqaqataallutik.

Taakkua saniatigut innuttaasup pisariaqartitsinera naapertorlugu ataavartumik avataanit suleqatinit ilisimasassanik paasiniaasoqartarpoq.


Sulinermut atatillugu angalanerit

Pillorissaasut timimillu sungiusaasut inersimasunut tunngasunik suliallit suleqatigiiupput angalasartut. Pillorissaasut timimillu sungiusaasut Paamiunut, Qeqertarsuatsiaanut, Kapisilinnut, Tasiilamut Ittoqqortoormiinut taakkulu nunaqarfiinut angalasarput. Illoqarfiit ukiumut ataasiarlutik tikinneqartarput saaffiginnissutillu amerlassusaat malillugit tikeraarneq ingerlasarpoq. Nunaqarfiit tikeraarneqartarput taakkunannga saaffiginnittoqarsimagaangat. Paamiuni timimik sungiusaasumik atorfeqartoqarpoq sungiusaaneq, ikiuutit, naliliinerit, siunnersuineq aqqutissiuinerlu pillorissaasut aamma timimik sungiusaasut suleqatigalugit suliaqartartut.

Pillorissaasut timimillu sungiusaasartut Nuummisut sungiusarnissamik pisariaqartitsinermik nalilersuisarput, inuit isumassuisut ilitsersorlugit kiisalu iluaqusersuutinik pisariaqartitsisoqarneranik inillu allanngortinneqarnissaanik nalilersuisarput kiisalu illunik paaqqinniffinnik utoqqaallu najugaqatigiiffiinik pulaarnerit. Pillorissaasut timimillu sungiusaasut sinerissami Nuummiluunniit suliassaasa pingaarnersaraat innuttaasoq ulluinnarni nammineernerulertinniarlugu.



Saaffiginnissutissatit tamarmik uunga mailimut ingerlatinneqartassapput:

terapeut@sermersooq.gl


Quppernerup imarisaa qanganitsersimava?

Quppernermut naqqiutissaqarpit?