Angerlarsimaffeqanngikkuit illoqarfiup immikkoortuani inissisimaffigisanni isumaginnittoqarfik aqqutigalugu inissarsiorsinnaavutit.

Ilinnut piumasaqaatit.

  • Qinnuteqartutut uppernarsassavat nammineq illoqarfigisanni pisinikkut attartornikkulluunniit, imaluunniit pisortat inissiaataannut kissaatigisamik nuukkusunneq aqqutigalugu naleqquttumik inissarsinissannut periarfissaqannginnerit.
  • Qinnuteqartutut assersuutigalugu najukkami tusagassiorfiit allallu nutaarsiassaqartitsiviit aqqutigalugit imaluunniit tamanut allagarsiisarfiit aqqutigalugit inissarsioqqullugu kaammattorneqassaatit.
  • Qinnuteqartutut nammineq inissarsiortuussaatit Kommuneqarfik Sermersuumilu inissiaatileqatigiiffimmi inissarsiorlutik utaqqisut allattorsimaffianni allatsissimassallutit.

Isumaginnittoqarfik aqqutigalugu inissarsiortunut utaqqisunut allatsinnissannut inuttut atugarisatit immikkut aalajangiisuusussaapput. Pingaarnersiuineq imatut pissaaq:

  1. Qinnuteqartutut nammineq inissamik tunineqanngikkuit meeqqamut, inuunerminik, peqqissutsikkut ineriartornikkullu aarlerinartorsiortutut nalilerneqartumik angajoqqaatut oqartussaassuseqartuullutit, inissamillu tunisinnissaq iliuusissatutpilersaarusiamut ilaatinneqarpat, utaqqisut allattorsimaffianni tulleriiaarinermi salliutinneqartutut tunineqassaatit.
  2. Qinnuteqartutut meeqqamut nammineq imaluunniit pisortanit ulloq unnuarlu angerlarsimaffimmut inissinneqarsimasunut angajoqqaatut oqartussaassuseqaruit, utaqqisut allattorsimaffianni pingaarnersiuinermi aappaatut inissinneqassaatit, inissamik tunisinnissaq iliuusissatut pilersaarusiamut ilaatinneqarpat.
  3. Inuusuttuuguit 18-it 23-llu akornanni ukioqartoq, ulloq unnuarlu angerlarsimaffimmit/angajoqqaarsiannit imaluunniit isumaginnittoqarfik aqqutigalugu sullinneqarnermi nuunnissamik piareersarlutit, utaqqisut allattorsimaffianni pingaarnersiuinermi pingajuattut inissinneqassaatit.
  4. Qinnuteqartutut, nakorsamit uppernarsaateqarlutit sivisuumik imaluunniit inuunermik navianartorsiutaasumik napparsimasutut nalunaarsorsimaguit, imaluunniit nakorsamit uppernarsarneqartumik tarnikkut nappaateqartutut imaluunniit annertuumik piginnaasakillisimaguit utaqqisut allattorsimaffianni pingaarnersiukkat sisamaattut inissinneqassaatit.
  5. Qinnuteqartutut, inatsisit sukkulluunniit atuuttut naapertorlugit utoqqalinersiaqartoq, Kommuneqarfik Sermersuumi illoqarfiit ilaanni namminerisamik ineqanngitsoq, isumaginnittoqarfik aqqutigalugu inissamik tunineqartariaqarnermik pisariaqartitsillutillu, utaqqisut allattorsimaffianni pingaarnersiuinermi tallimaattut inissinneqassaatit.
  6. Qinnuteqartutut, iliuusissamik piginnaanngorsaqqinnissamullu pilersaarusiorfigineqarsimaguit, atornerluinermilluunniit katsorsartikkuit pinerluuteqarsimasunullu inissiisarfimmit aninissamut piareersarlutit utaqqisut allattorsimaffianni pingaarnersiuinermi arfinilissaattut inissinneqassaatit.
  7. Qinnuteqartutut, katissimasap/inooqatigisap toqunerata kingunerisaanik suliffimmut atatillugu inigisamik, pigalugu inigisamik attartukkamilluunniit annaasaqaruit, inissiamik kingornussisinnaanak, utaqqisut allattorsimaffianni pingaarnersiuinermi arfineq-aappaattut inissinneqassaatit.

Qulaani piumasaqaatit taakkartorneqartut ilaat arlaqartulluunniit eqquutikkukkit isumaginnittoqarfik aqqutigalugu inissamik innersuuneqarnissamut qinnuteqarnissamut sullissisut saaffigiuk.

Kommuneqarfik Sermersuumi isumaginnittoqarfik aqqutigalugu inissamik innersuussisarnermi malittarisassat uani takukkit.

Quppernerup imarisaa qanganitsersimava?

Quppernermut naqqiutissaqarpit?