Kommuneqarfik Sermersuumi sulisuuguit nalunaaruteqarniarlutillu, nalunaaruteqarnermi immersugassaq ataaniittoq tamatigut atussavat. Immersugassami paasissutissat Kommuneqarfik Sermersuumi nalunaarutit sukkasuumik suliarinissaannut iluaqutaasussat suunerannik ilitsersorneqassaatit.

Nalunaarut pisortannit atsiorneqartariaqarpoq. Pisortavit ilimaginngisannik nalunaarut atsiorusunngippagu, nalunaarutip nassiunnissaanut pisussaaffeqarputit.

Nalunaaruteqarnermi immersugassamut iserfissaq

Nalunaaruteqarnermi suleriaatsit, nalunaaruteqareeruillu qanoq pisoqarnissaa pillugit atuagaaqqami ataaniittumi annertunerusumik atuarit.

Pisortani sulisunut, suliassanik suliaqartartunut suleqatigisanullu atuagaaqqamut iserfissaq

Sakkortusisamik nalunaaruteqartussaatitaaneq

Suliassanik suliaqartartutut meeraq atugarliortoq immaqalu annersagaasimasoq allatigulluunniit sumiginnagaasoq pasitsaassaqaruit isumaginninnermi oqartussanut sakkortusisamik nalunaaruteqartussaatitaavutit.

Pisussaaffik pisortani sulisunut, nakorsanut inunnut paaqqinnittarfinni sulisunut, ornittakkani sulisunut, ilaqutariinnut paaqqinnittartunut, paaqqinnittarfinnut, katsorsaanissamik neqeroorutiniittunut imaluunniit namminersortunut allanut neqeroorutinik pisortat sinnerlugit ingerlatsisunut atuuppoq.

Isumaginnittoqarfimmi, atuarfeqarfimmi peqqinnissaqarfimmiluunniit kiisalu ulluunerani paaqqinnittarfinni sulisoq sulinerminut atatillugu Inatsisartut Inatsisaat una malillugu meeqqamik ikiorserneqarnissamik pisariaqartitsisumik ilisimasaqaleruni, kommunalbestyrelsimut ingerlaannartumik nalunaaruteqarnissaminut sakkortunerusumik pisussaaffeqarpoq. Taamatuttaaq nalunaaruteqartussaatitaanermut pisussaaffik innuttaasunik qinikkanik imaluunniit inuiaqatigiinnik sullissinermik tunngaveqartumik suliaqartunut atuuppoq, tak. Meeqqat tapersersorneqarnissaannut Inatsisartut inatsisaanni nr. 20, 26. juni 2017-imeersumi § 16. tassa pisortani sulisut taakku qinikkallu, meeraq atukkani meeqqap peqqissusaanik ineriartorneranillu navianartorsiortitsisumik inuusoq paasigunikku sakkortusisamik/annertusisamik nalunaaruteqartussaatitaapput.

Nalunaaruteqareeruit qanoq pisoqassava?

Nalunaarutivit tiguneranit kingusinnerpaamik sapaatip akunnera ataaseq qaangiuppat tamanna pillugu uppernarsaammik tigusaqassaatit. Kommuneqarfik Sermersuumi Nalunaaruteqartarnermi Sulisumit nalunaarummik nassitsisimaninnik uppernarsaammik kingusinnerpaamik sapaatip akunnera ataaseq qaangiuppat tigusaqanngikkuit, uunga attaveqarfigisinnaavatsigut tlf: 36 60 60

Kommuneqarfik Sermersuumi Nalunaaruteqartarnermi Sulisup nalunaarutit tamaasa tiguneqarnerisa kingorna tiimit 24-t iluanni nalilersortarpai. Nukinginnartumik iliuuseqartoqassanersoq nalilersuinermi siullermi paasiniarneqassaaq. Tamanna pisarpoq ingerlaannartumik iliuuseqartoqanngippat meeraq inuusuttorluunniit annertuumik ajoquseriaannaasoq nalilerutsigu. Tulliullugu isumaginninnermik suliaqarnermi misissuineq aallartinneqassanersoq isummerfigisarparput. Isumaginninnermik suliaqarnermi misissuineq meeqqamut inuusuttumulluunniit pissutsit sukumiinerusumik misissorneqarnerannik kinguneqartarpoq. Tamanna pisarpoq atuarfimmit, paaqqinnittarfimmit allamiilluunniit oqaaseqaammik piniarnikkut aammalu meeqqap inuusuttulluunniit angajoqqaallu oqaloqatiginerisigut. Meeqqamut inuusuttumulluunniit ilaqutariinnullu ikiuinermik aallartitsisoqarneranik isumaginninnermik suliaqarnermi misissuineq kinguneqarsinnaavoq.

Quppernerup imarisaa qanganitsersimava?

Quppernermut naqqiutissaqarpit?