Nalunaaruteqarneq tassaavoq innuttaasumit pisortaniluunniit sulisumit, meeqqamik inuusuttumilluunniit 18-it ataallugit ukiulimmik atugarliortutut pasisaqarluni saaffiginninnera.

Saaffiginnissutit meeqqat inuusuttulluunniit ernumanartumik pissusilersuuteqarneranik, pissutissaqaratik atuanngitsoortarnerannik paarinerlunneqarsimanerannilluunniit imaqarsinnaapput.

Meeqqanik inuusuttunilluunniik sumiginnakkanik, nakuuserfigineqarsimanerannik allatigulluunniit atornerlunneqarsimanerannik (timikkut, tarnikkut kinguaassiutitigulluunniit).

Innuttaasut (inunnut ataasiakkaat) Kommuneqarfik Sermersuumut qanoq saaffiginnittassanersut aalajangersimanngilaq. Allakkatiguusinnaavoq, oqarasuaatikkuusinnaavoq namminerluunniit ornigulluni saaffiginninnikkut.

Pisortani sulisut pisussaatitaapput allakkatigut nalunaaruteqarnissaminnik.

Illit meeqqap inuusuttulluunniit inuuneranik, peqqissusaanik ineriartornerataluunniit navianartorsiorsinnaaneranik ernumagisaqaruit Kommuneqarfik Sermersooq nalunaarfigissavat.

Pisortani sulisut pasittaassaqarunik meeraq inuusuttorluunniit immikkut ittumik tapersersortariaqartoq, tamanna kommunimut nalunaarutigissuaat.

Qaqugukkut nalunaaruteqartoqassava?

Assersuutigalugu manna ilisimagukku ernumassuteqarsinnaavutit:

  • Meeraq inuusuttorluunniit annersarneqartoq
  • Meeraq inuusuttorluunniit kinguaassiuutitigut innarlerneqartoq
  • Meeraq inuusuttorluunniit nammineertitaasorujussuaq inersimasuniillu naammanngitsumik tapersersorneqartoq
  • Meeraq inuusuttorluunniit atugarissaannginnermik takussutissaqartoq
  • Meeraq inuusuttorluunniit meeqqanit inuusuttunillu allanit annertuumik qinngasaarneqartoq, annersarneqartoq il.il.

Ilisimagukku meeraq inuusuttorluunniit 18-it ataallugit ukiulik isumaqarfigisat ilisimasalluunniit meeqqap inuusuttulluunniit pissutsini peqqissusianik ineriartorneranillu navianartorsiortitsisumik inuusoq kommunimut nalunaaruteqartussaatitaavutit.

Oqarasuaatikkut, mailikkut namminerluunniit takkunnikkut Kommuneqarfik Sermersuumut nalunaaruteqarsinnaavutit.

Meeraq inuusuttorluunniit pillugu nalunaaruteqaruit sapinngisamik tamakkiisuunissaa pingaaruteqarpoq. Nalunaaruteqarneq sapinngisamik pissusivinnik takusanillu aalajangersimasunik tunngaveqassaaq (takusatit, tusakkatit il.il.)

Nalunaaruteqaruit kinaassusersiornak pisup isummerfiginissaa. Pissusiviit oqaluttuarikkit aamma tusakkatit takusatilluunniit isumalersornaveersaakkit.

Eqqarsarluaqqaarluni tamatigut nalunaaruteqartoqartariaqarpoq, kisiannili meeqqap inuusuttullu inuunera, atugarisai siunissaalu pineqartillugit nalornissuteqarnermi meeraq inuusuttorlu tamatigut eqqarsaatigineqassapput.

Nalunaaruteqarnermi siunertaq:

Meeqqap inuusuttulluunniit ilaqutaasullu sukkasuumik ikiorneqarnissamik neqeroorfiginissaasa qulakkeernissaanut tapersiissaaq.

Pissusivinnut uppernarsaataasinnaavoq.

Suliassamik suliaqarnermi atortuuvoq.

Attaveqarfissaq

Nalunaaruteqarneq
Meeqqanut Ilaqutariinnullu Immikkoortortaqarfik
Imaneq 20, Postboks 1005
3900 Nuuk

Oqarasuaat: (+299) 36 72 81
Mail: meeqqavut@sermersooq.gl

Quppernerup imarisaa qanganitsersimava?

Quppernermut naqqiutissaqarpit?