Kalaallit meerartaannit angajoqqaavi imertartunit eqqarsaatersuutit: 

”Niaqqut tunummut malartikkukku sukkasuumillu imerlutit, taava eqqarsaatinniilissaanga?”

”Imertillutit paarisarakkit nalunngiliuk?”

”Immiaararsinak taarsiullugit atisarsiinnannga.”

”Anaana, ataata … Paarisinga.”

”Ilissi imertillusi sumunnarfissaqarneq ajortunga ilisimavisiuk?”

Asasakka ullorsiutikka: Kikkut tamarmik qinngarsorpaannga – Niviarsiaqqamit danskiusumit nakkarsarneqartartumit piviusumik oqaluttuaq. 

12. oktoberi. 

Asasakka ullorsiutikka: Utoqqatserpunga taama sivisutigisumik allaffigisimannginnakkit. Piffissaqannginnama. Aamma peqqippallaannginnama. Ukiup atuarfiusup aallartinnerani ajunngikkaluarpoq. Massakkulli allat ajorsinermik! Niviarsiaqqat oqaluunnerluunniit ajorpaannga! Arlaannaataluunniit naamik.

Assut aliatsannarpoq. Suna kukkussutigisimanerlugu nalulluinnarpara. Immaqaana tamakku tamarmik aqqalussannut attuumassuteqartut. Eqqaamassajunnarsivat atuaqatimini pitsaanngitsumik ingerlagami atuarfimmut allamut nuuttoq allakkama. Aamma atuaqatima qatanngutai nukarliit atuaqatigigamigit.

Angajoqqaat ataatsimiisinneqarput allakkanillu angerlaassassaminnik tunineqarlutik, tassami nakkarsaaqataasoqarsimammat. Kisianni uanga pisuussutiginngilara! Ajoraluartumik nukappiaqqat oqaloqatigaannga. Atualernitta kingorna qaammatip aappaa avillugu qaangiuttoq aallartipput. Ingammik nukappiaraq Kenimik atilik assut nuanniippoq. Tassa ajortumik pisuttarnera eqqartorlugu pisarput. Aamma klassip iluani assatik siaarlugit eqeqqortillugu tikkortillugu nulorsorlutillu angalaarlutik illaruaatigisarpaannga.

Soorlu nalunngereerit matematikkimut pikkorippallaanngilanga. Ilinniartitsisuttalu Torbenip tabelini tusarusukkaangatigut akissutikka kukkujuaannartarpakka. Taava klasseqatima tamarmik illaatigisarpaannga. Sofieli kukkugaangat illarneq ajorput. Naammaginanngik ilaa?  Nerilerpunga.

Mariaativit kunippaatit.

22. oktobari. 

Asasakka Ullorsiutikka. Sapaatip akunnera tamaat aalajangersimasumik suliaqaratta, uanga kisimiippunga. Arlaannaataluunniit ilagiumanngilaanga. Sammisaq sammerusutarput allattussaagatsigu. Klassimi kaajallaagatta uanga kingullersaavunga. Sarahp Josefinellu sammisaannut peqataarusullunga oqarpunga, taava ilinniartitsisutta allakkaanga taakku marluullutik isussullutik holdiminni inissaaruttoqartoq aalajangersimapput.

Klassimi ilinniartitsisussat, Lisbethip, soqutiginngilaa oqarlunilu suleqatigiinnik allanik nassaarniartariaqartunga. Kisianni arlaannaataluunniit ilagerusunngikkaannga qularutiginnginnakku Sorsunnersuit aallartinnginneranni Tysklandimut tunngasunik kisimiillunga sammisaqarusullunga oqarpunga. Ilumut. Sammisaq sammisani nuanniinnerpaaq. Suleqatigiittussanik toqqartuisugut Helene napparsimareerluni takkukkami ingerlaannaq allanngortiteriumasoq, tamannalu Sarahmit Josefenemillu akuerineqarmat ajornersaavoq. Helene napparsimanini pissutigalugu sammisamut peqataaffigerusutaminut peqataasinnaanngimmat nalliginninnertik utoqqatsissutigaat. Qullilivunga.

Piffissami matumani aliasunnermik. Ataatakkut anaanagalu Hansi pillugu assortuupput aamma uanga soqutiginngikkaannga isumaqarpunga. Taava aamma atuarfik, tassani niviarsiaqqat suli isiginngitsuusaarpaannga. Aamma arlaat, immaqaaku nukappiaqqat, SMS-kkut nuanniitsorujussuarnik nassittalerpaannga. Ullumi imatut taamaallaat allassimassumik allagarsivunga: ”Arnapalaaq.”

Ippassaq imatut allassimasoq ”Pinneeqigavit ukioq naanngitsoq toqussaatit.” Tamanna kimik oqaloqatigiissutigissanerlugu naluara, ataatakkut anaanagalu Hansi pillugu suliassaat naammapput, marluinnik ajornartorsiuteqarniarunik nallinnarpallaassaqaat. Taamaattormi minnerpaamik uannik ingerlalluarneraammata nuannaraakka. Taava atorsinnaanngitsutut misigivallaanngilanga. Klassimi ilinniartitsisuma aasit soqutiginavianngilaa. Torben, matematikimi ilinniartitsisora, pitsaasuuvoq, kisianni oqaloqatiginissaanut ittoorpallaarpunga.

Mariaativit kunippaatit.

3. novembari

Asasakka Ullorsiutit:

Maaniippunga. Sapilerpunga.

Parallelklassitsinni niviarsiaqqat marluk eqaarsaaqatigigatsigit, taakku iluarinngilakka. Klassitsinni niviarsiaqqat amerlanersaasa assut nuannarivaat aamma oqaloqatigisartorujussuuaat. Klassitsinni isiginngitsuusaarneqartarnera taanna, ingatsikkaluttuinnarpoq. Kisimiivillunga kisimiippunga. Qaammatini kingullerni pingasuni arlaannik naapeqateqarnissannik isumaqatigiissuteqarnikuunngilanga! Ullumi Evalu parallelklassitsinneersoq assortuuppugut. Rundboldimi suna pinerpoq suunngitsoq isumaqatigiinngissutigigatsikku. Taava imannak oqarpoq: ”Ilaa nalunngilat kikkut tamarmik qinngarigaatsit? Taamaattuminguna niviarsiaqqat klasseqativit oqaluukkumaneq ajoraatsit. Tassa arnaqquassaajungaaravit tamanna isumaqatigiissutigisimavaat. Kikkut tamarmik nalunngilaat.”Taamanili atuarfimmiit angerlaraangama qiajuaannalerpunga, kiisa qiajunnaarneq ajulersarpunga. Qanoq iliussanerlunga naluara. Massakkut toqorusullunga eqqarsarpunga, allaanngilarmi maanngaanniit aniguiffissaqanngitsoq…