Imminut toqunnerit imminullu toqoriaraluartarnerit pillugit upalungaarsimaneq

Qanigisanni, kammalaatinni assigisaanniluunniit imminut toqunnermik imaluunniit imminut toqoriaraluarnermik misigisaqaruit taava kommune upalungaarsimasoqarpoq atorsinnaasannik.

Ajornartorsiornermi upalungaarsimaneq eqqartorneqartoq tassaavoq imminut toquttoqarsimatillugu, imminut toqoriaraluartoqarsimatillugu assigisaanilluunniit ajornartorsiornermi ikiuuttussat.

Upalungaarsimasut tassaapput katsorsaasut isumaginninnermilu siunnersortit imminut toquttoqarsimatillugu imminulluunniit toqoriaraluartoqarsimatillugu ilaqutaasut ajornartorsiorneranni tapersersuillutik pisumi ikiuuttut. Soorunami meeqqani inersimasuniluunniit imminut toquttoqarsimatillugu imminulluunniit toqoriaraluartoqarsimatillugu upalungaarsimasut atuupput. Amerlanertigut ikiuinerit siunnersuinerillu assigiinngitsut pisariaqartinneqartarput, imminut toqunnissamut ulorianartorsiortup/toqusimasup ukiui ilaqutaasullu/qimagaasullu pisariaqartitaat apeqqutaallutik, taamaammat sapinngisarput tamaat ammasunik tikikkuminartunillu upalungaarsimasuuteqarnissarput pingaartipparput.

Upalungaarsimasut:

Siullertut aggersaasarpugut imaluunniit nammineq angerlarsimaffimmut ornigulluta tamanna pisariaqartinneqassappat. Ilaqutaasunut piffissaq artornartuummat toqqissisimaffiginerpaasami oqaloqatigiinnerup ingerlanneqarnissaa pisariaqartinneqarpat paasilluarsinnaavarput.

Tassanngaanniit ingerlaqqinnissamut ilaqutariit immikkut pisariaqartitaat nalilerneqartarput – Tamannalu pisarpoq ilaqutariit peqatigalugit, amerlanertigut ilagisaasut ataasiakkaarlutik immikkut assigiinngitsunik pisariaqartitsigajuttarnerat peqqutaalluni. Aallaqqaammut ilai sakkortuumik qisuariarsinnaasarput ikiorserneqarnissamik pisariaqartitsinerusoqartarlutik naak ilai nipaarluunertik ilutigalugu takkuitsoorneqarsinnaasartut. Amerlanertigut imaakkajunneruvoq nipaannerit sivisunerusumik ikiorneqarnissamik pisariaqartitsisuusartut naak killormoortua issorinarsinnaagaluartoq. Tamanna immikkut nalilerneqartarpoq.

Attaveqarfissaq:

Upalungaarsimasut atulerneqarsinnaapput Isumaginninnermi pigaartumut saaffiginnilluni imaluunniit Meeqqanut Ilaqutariinnullu immikkoortortaqarfimmut saaffiginnilluni

Isumaginninnermi pigaartoq ulloq unnuarlu saaffigineqarsinnaavoq.

Kommuneqarfik Sermersuumi Meeqqanut ilaqutariinnullu immikkoortortaqarfimmut ulluinnarni saaffiginnissinnaavutit nal 8.00 aamma 16.00 akornanni, oqarasuaat 36 72 81.

Pinaveersaartitsiniutitut iliuusissat.

Pinaveersaartitsinerunermut tunngasuuppat soorlu imminut toqunnissamut atatillugu pinaveersaartitsinermi taava ammasumik siunnersortinnissamut Meeqqanut Ilaqutariinnullu Sullissivimmut saaffiginnittoqarsinnaavoq imaluunniit Meeqqanut Ilaqutariinnullu Immikkoortortaqarfimmut saaffiginnilluni.

Meeraagaanni inuusuttuugaanniluunniit Inuusuttunut siunnersorteqartoqarsinnaavoq taakkua aamma ikiorneqarnissamik aallartitsisinnaammata. Upalungaarsimasut assigiinngitsunik suliaqartuupput taamaalillutillu meeqqamut/inuusuttumut attuumassutillit aamma akulerussinnaallugit.