Atuarfinnut ulluuneranilu neqeroorutinut Immikkoortortaqarfik Nuussuup Atuarfia suleqatigalugu misiliutigalugu Nuussuup Atuarfiani atuartunut angajullernut ilinniakkerisarfimmik aallartitsivoq.
Nuussuup Atuarfiani atuartut angajulliit sapaatip-akunnerani akunnerit marluk ilinniakkerinerminni ikiorneqarnissaannut misiliutitut ingerlasussamut neqeroorfigitipput.
Atuartimmi ilinniartitsisut marluk ilinniakkerisarfimmut pilersaarusiorlutillu ingerlattassavaat, tassani ilinniakkerinermi ikiuinerup saniatigut atuartut ilinniakkeriffigisinnaasaannik, atuakkanik atuarfigisinnaasaannik spillerfigisinnaasaannik ualikkullu tamulugassanik neriffigisinnaasaannik neqerooruteqarfigineqarput. Ilinniakkerisarfimmut najoqqutassiaq ilinniartitsisut atuartullu akornanni ineriartortinneqarpoq, taamaaliornikkut sapinngisamik atuartut amerlanerit ornigunnissamut soqutiginnilersinniarlugit. Tamanna pillugu atuartut skemat sivitsorlugit Ilinniakkerivik ingerlanneqartarpoq, tamannalu atuartut skemanut ilanngunneqarpoq atuartut periarfissaat ersarinnerulersinniarlugu.
”Ilinniakkerisarfimmik pingaartitsinerput FN-ip nunarsuarmut anguniagaanut qanittuuvoq. Pingaartumik nunarsuarmut anguniakkat sisamassaat, tamanut assigiissumik pitsaassusilimmik ilinniartitaaneq inuunerlu tamaat ilinniarsinnaanermut periarfissaqarneq,” oqaluttuarpoq Michael Rosing, Meeqqanut Atuarfeqarnermullu Ataatsimiititami siulittaasoq.
Inuit Ataqatigiit Demokraatillu akornanni suleqatigiinnissamut isumaqatigiissut tunngavigalugu misiliut aallartinneqarpoq, tassani atuareernerup kingorna ilinniakkerisarfinnik/ilinniagassanut ikiorsiinissamut neqerooruteqartarnissaq anguniarneqassasoq aalajangersarneqarpoq. Misiliut kommunimi atuarfinni sinnerini qanoq ilinniakkerisarfiit aallartinneqarsinnaaneranut killiliussassanut toqqammavigineqassaaq.