Innuttaasunut

Nunaqarfinni aqutsisut isumasioqatigiinnerat 2022 aallartippoq

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kommuneqarfik Sermersuumi Nunaqarfinni Aqutsisut ukiumoortumik isumasioqatigiittarnerat ullumikkut maajip 23-ani aallartinneqarpoq, taanna ulluni marlunni Nuummi ingerlanneqassaaq.

Isumasioqatigiinnerup ingerlanneqarnerani ullormi siullermi qulequttat pingasut sammineqarput, taakku nunaqarfinni innuttaasut ataatsimiitinneqarneranni sammineqarsimapput.

Nunaqarfinnut pilersaarut 2022-2025 aqagu maajip 24-ani sammineqassaaq, taassani ilaatigut eqqartorneqassaaq aningaasast nunaqarfinnut atugassat qanoq atorneqassanersut.

Ullummikkut isumasioqatigiinneq aallartippoq Kommuneqarfik Sermersuumi borgmesterip Charlotte Ludvigsenip tikilluaqqusineranik. Tassani borgmesterip isumasioqatigiittussat isumasioqatigiilluarnissaannik kissaallugit kiisalu innuttaasut nunaqarfinnilu aqutsisut pilersaarutaat, takorluugaat kissaataallu tusarnissai qilanaaralugit oqariartorluni.

Ukioq manna isumasioqatigiinneq qulequtserneqarsimavoq ”Nunaqarfinni sunniuteqaqataaneq politikkikkullu anguniakkiat”. Isumasioqatigiinneq sioqqullugu Nunaqarfinni Aqutsisut innuttaasunik ataatsimiititsisimapput, tassani quleqquttat pingasut eqqartorneqarsimallutik;

  • Nunaqarfimmi ingerlalluartut pingasut
  • Nunaqarfimmi unammillernartut pingasut
  • Nunaqarfik inuummarissarniarlugu suut suliarineqassappat?

Qulequttat pingasut eqqartorneqarsimasut nunaqarfinni aqutsisunit saqqummiunneqarput, qulequttanik saqqummeereernerup kingorna nunaqarfinni ataasiakkaani politikkikkut anguniakkat saqqummiunneqarput.

Tassani nunaqarfiit tamarmik immikkut anguniagaat oqallisigineqarput. Kissaatit assiginngitsut saqqummiunneqarput, qinikkaniit atorfilittaniillu tikeraarneqarnissamik kissaatiniit paaqqinnittarfinni neqeroorutit pitsaanerulernissaannut aammalu sukisaarsartarfinni sulisunut pikkorissaanissaanut kissaatit, iliveqarfimmik nutaamik aammalu arsartarfiit pitsanngorsarneqarnissaat saqqummiunneqarlutillu oqallisigineqartut ilagaat.

Ulloq naammissineqarpoq inuummarilluartumik eqimattakkaarluni eqqartuinermik, tassani ullup ingerlanerani saqqummiunneqarsimasut eqqartorneqarput. Nunaqarfinnut pilersaarut aqagu sammineqartussani ilaavoq, tassani aningaasat nunaqarfinnut atugassat qanoq atorneqarsinnaaneri eqqartorneqartussani ilaallutik.