Iserit A/S Kommuneqarfik Sermersuup inissiaatileqatigiiffiutigivaa, nammineq inissiaatiminik aamma Kommuneqarfik Sermersuup kiisalu Siorarsiorfik – Nuuk City Development A/S-ip inissianik attartortittagaanik aqutsisoq. Inissiat Nuummi, Paamiuni, Tasiilami aamma Ittoqqortoormiini inissisimapput.
Iserit A/S 2005-imi pilersinneqarpoq, inissiaatileqatigiiffiup sumiiffimmiitinneqarnissaanik kommunimit kissaateqartoqarnera tunngavigalugu. Ullumikkut sulisut Iserit A/S-imi sulisorineqartut 30-upput, taakkulu allaffinni pingasuni Nuummi, Paamiuni aamma Tasiilami agguataarsimasuupput, inissiallu Iserit A/S-imit aqunneqartut 2.400-t missaanniittut agguataarsimapput Nuummi 1.800-t missaanniillutik, Paamiuni 110-t, Tasiilami 420-t kiisalu Ittoqqortoormiini 70-iullutik.
Eqqarsaammi inissiaatileqatigiiffik sumiiffimmi pissutsinnik ilisimasaqartoq tunngavigineqarpoq. Suliassaqarfiup taama pingaaruteqartigisup sumiiffimmi kommunimi innuttaasut qanillugit aqunneqarnissaa kissaatigineqarpoq, aaqqiissutigineqartup sumiiffiup pisariaqartitaanut naleqquttunngorlugu.
Inissianik aamma inissialiortiternernik aqutsinerup saniatigut Iserit A/S aamma allanik suliassaqarfeqartiterpoq, taakkulu soorunami Iserit A/S-ip suliassaqarfiinut allanut pingaarutilinnut assingusuupput. Matumani ilaatigut makku taaneqarsinnaapput:
• Kommunip sulisuinut inissiat aamma inissiat utaqqiisaasut ingerlanneqarneri
• Kommunip isumaginnittoqarfik aqqutigalugu inissianik agguaassisarneranik aamma inissiigallartarneranik ingerlatsineq.
• Inissianik pisineq tuniniaanerlu
• Inuussutissarsiuteqarnermut atatillugu inimik attartortitsinermik aqutsineq
• Errorsiveqarnermik ingerlatsineq
• Kommunip inissiaataanik aamma suliffeqarfiutaasa illutaanik aserfallatsaaliuinermi ikiuineq.
Kiisalu kommunimik isumaqatigiissuteqareerluni suliassanik assigiinngitsunik takkussortunik isumagisaqarneq.