Sanarfinermut Avatangiisinullu Ingerlatsivik

Siunnersuut: Kommunimut pilersaarummut tapiliussaq 1A6-3, Qaqortoq & Avannarliit, Nuuk

6 years tilbage

Kommunimut pilersaarummut tapiliussatut 1A6-3 Qaqortoq & Avannarliit Nuuk siunnersuut pillugu

Aninagasaqarnermut Inuussutissarsiornermullu Ataatsimiititap decembarip 15-ianni 2017 aalajangerpaa, kommunimut pilersaarummut tapiliussatut siunnersuut 1A6-3 tamanut tusarniaassutigineqassasoq.

Siunertaa

Kommunimut pilersaarummut tapiliussatut siunnersuut suliarineqarpoq Nuummi oqaluttuarisaanermut tunngassuteqartut naleqquttumik ineriartortinnissaat qulakkeerumallugu. Sumiiffik najugaqarfiuvoq, ilaqutariit ataatsit illui amerlanerullutik ilaatigut eriagisariaqartortallit. Pingaartumik Qaqortoq illoqarfimmi innuttaasunut tikeraanullu pingaaruteqarluinnartuuvoq, illuliortaatsit illullu inissisimaffii tunngavigalugit. Taamaattumik ingerlatsiviup nalilerpaa, illoqarfiup tamassuma ilaata ineriartortinneqarneranut ilutigitillugu illuliortaatsimi naleqartitat allanngutsaaliorneqarlutillu illersorneqassasut. Taamaasillutik naleqartitat ullutsinni siunissamilu qulakkeerneqassapput.

Kommunimut pilersaarummut tapiliussaq imaattunik siunertaqarpoq:

  • Sumiiffimmi oqaluttuarisaanermut naleqartitat kingulissatsinnut takusassanngorlugit allanngutsaalineqarnissaat qulakkeerneqassasoq. Kommunimut pilersaarummut tapiliussami qulakkeerneqassaaq, sumiiffiup immikkuullarissumik isikkua pigiinnarneqassasoq, aammalu illut sumiiffiillu eriagisariaqartut Nuummi illut illuliortaatsillu oqaluttuarisaaneranut pingaarutilittut qulakkeerneqassasut.
  • Sumiiffik Nuummi najugaqarfigiuminartuaannarlunilu inuuffigiuminartuaannassasoq, ullumikkut siunissamilu qanittumi.
  • Illut pioreersut tamaaniittut erseqqissumik malittarisassaliorfigineqarlutillu aalajangersaaffigineqarnissaat, tamatumunnga ilanngullugu allaffissaqarnissaannut periarfissat
  • Isaterinermut atatillugu nutaamik illuliornissamut malittarisassaliornissaq

Tamanut oqallisissiaq

Siunnersuut sapaatip akunnerini arfineq-pingasuni tamanut tusarniaassutigineqarpoq piffissami januaarip pingajuaniit – februaarip 28-ata 2018-ip tungaanut.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput februaarip 28-at 2018 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut

Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani takuneqarsinnaavoq

Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.