Ileqquusumik ataatsimiinneq

Immikkoortortaqarfiit
Najukkami ataatsimiititaq Nuuk
Date
6. May 2019 -
Qulequtaq
Saqqaa

Suliassamik saqqummiussaq

Ileqquusumik ataatsimiinneq

Nuummi Najukkami Ataatsimiititaliaq

 

Oqaluuserisassat

 

Ataasinngorneq, ulloq 6. maaji 2019 nal. 16.30-18.30

 

Ilaasortat

Nivi Katrine Christensen

Arnarissoq Fleischer

Moses Masik Marcussen- Mølgaard

Ujammiugaq Engell

Poul Petersen

Finn Meinel

Aviaq Brandt

Nadia Aviaq Olsen

”Ari” Hansine P Rasmussen

Naleraq Eugenius

 

Pisinnaanatik nalunaartut

Nivi Katrine Christensen

Nadia Aviaq Olsen

Naleraq Eugenius

 

Aggersarneqarput

Esmar Bergstrøm

Arnannguaq Thiessen

Ullormut oqaluuserisassat akuerineqarneri

Suliassamik saqqummiussaq

Oqaluuserisassat taamatut isikkoqartillugit akuerineqarput.

Nalunaarutit

Suliassamik saqqummiussaq

 

  • Allatseqarfik Nuuk Snow Festimit Najukkami Ataatsimiititaliat ilaasortaannut nioqqutissanik agguaapput.
     
  • Allatseqarfik maajip ulluisa 27-t nal 14.00 ataatsimiinnissamut qaaqqusissummik nassitsivoq Aqqaluup Aneerasaartarfiata ineriartortinneqarnissaa pillugu.  Qaaqqusissut Najukkami Ataatsimiititaliat ilaasortaannut tamanut kiisalu sinniisunut siullernut tulliinullu nassiunneqarpoq.
     
     
  • Juunimi Najukkami Ataatsimiititaliap nalinginnaasumik ataatsimiinnissaraluat juunip ulluisa 11-anit pisussaagaluaq juunip ulluisa 4-anut nuutsinneqarpoq Najukkami Ataatsimiititaliat juunip ulluisa 10-11-t isumasioqatigiinnissaat pissutigalugu.  juuni 2019. Najukkami Ataatsimiititaliat ilaasortaannut ukiumut ataatsimiiffissat nutartikkat nassiunneqarumaarput.
Ilisimatitsissutit

Suliassamik saqqummiussaq

2019-imi aningaasaliissutit atugassanngortinneqarsimasut pillugit killiffik

Suliassamik saqqummiussaq

2019-imi aningaasaliissutit atugassanngortinneqarsimasut pillugit killiffik

 

Nuummi Najukkami Ataatsimiititaliaq 2019-imi katillugit 4.225.000 koruuninik atugassinneqarpoq. Tamatuma saniatigut inunnut qulinut qaammammut 2.124 koruuninik akissarsiaqartitsinissamut taakkunannga ilanngaasoqartassaaq, tassa ukiumut 255.000 koruuniussapput.
Taamaalilluni Najukkami Ataatsimiititaliaq 2019-imi 3.970.000 koruuninik aningaasaliissutinik atuisinnaavoq.


2019-imi aningaasaliissutit atugassanngortinneqarsimasut pillugit maajip aallartinnerani killiffiat imaappoq:

 

Aningaasartuutit

Aningaasat akuerisat koruuninngorlugit

 

Aningaasat atorneqartut/kr.[1]

 

Ataatsimiinnermi sutugassaqartitsineq

 

 

2710

Nuummi apummik ilusilersuineq.

 

120.000 koruunit tungaannut aningaasaliissutigineqarput

120.000

Oqaluttuarisaaneq pillugu allagartalersuutit

 

20.000 koruunit tungaannut aningaasaliissutigineqarput

6.000

Qiajuk Studio – Nuummi innuttaasunut qitittarfimmik pilersitsinissaq pillugu filmimik takutitsineq oqallinnerlu

 

10.000

10.000

René Design – paasissutissanik naqiterinermut

 

8.762

8.762

Arsaattarfiit eqqaanni qullilersuineq ungalulersuinerlu

(Maluginiagassaq Suliassaq naammassippat aatsaat tunniunneqassapput)

 

152.990 kr.

0

Qinnuteqarneq – Meqqaanut sumiginnakkanut angalatitsineq, Meeqqat Ikiortigit

 

12.025

12.025

Nordisk Koncertkor (Nunani Avannarlerni Erinarsoqatigiit)

 

34.000

34.000

Nunani Tamalaani Katersugaasiviit Ulluat

 

26.000

26.000

Nuuk Nordisk Kulturfesitval 2019 (NAPA)

 

300.000

300.000

Uanga Timera – Teaterprojekt på skolerne

 

100.000

100.000

Suliniut Law Shifters, Nuummi Eqquiitsulianik Saqqummersitsivik

 

60.000

60.000

Katillugit

843.777 kr.

669.570 kr.

 

 

Aningaasat atorsinnaasat

Atuineq:

Atorsinnaasat:

 

Kr. 3.970.000

 

Kr. 669.570

 

Kr. 3.300.430

 

Inassuteqaatigineqarpoq

Inassuteqaatigineqarpoq:

  • Ilisimatitsissut tusaatitut tiguneqassasoq

 


[1] Suliniutinut ataasiakkaanut inaarutaasumik naatsorsuusiat sillimaffigineqassaaq. Aningaasat atorneqanngitsoortut Najukkami Ataatsimiititamut utertinneqassapput

 

Aalajangerneq

Ilisimatitsissut tusaatitut tiguneqassasoq

Aalajangiiffigisassat

Suliassamik saqqummiussaq

Qinnuteqaat– Digitalimik nalinginnaasumik ilisimasaqarneq, Youtube

Suliassamik saqqummiussaq

Qinnuteqaat– Digitalimik nalinginnaasumik ilisimasaqarneq, Youtube

 

Ataasinngorneq apriilip 8-aat 2019 Nuummi najukkami ataatsimiititaliaq Nuummi suliniummik aningaasaqarnermut qinnuteqaammik tigusaqarpoq, workshoppertitsinikkut oqalugiarnikkullu digitalimik nalinginnaasumik ilisimasaqarnermik inuusuttut Youtube-mik atuinerat qitiutillugu. Katillugit 130.790 koruunit qinnutigineqarput.

Suliniut 2019 ukiakkut piviusunngortinnissaa kissaatigineqarpoq

Suliniutip allaaserinerani ilaatigut allaqqavoq:

”(…) YouTube qanoq attaveqaatitut sulinermullu atorneqarsinnaava? Attaveqaatinut nutaanut qanoq ileqqorissaassaagut aamma qanoq atorsinnaavarput? Attaveqaatit nutaat qanoq ilumoorutsigissavagut, qanorlu meerartavut, inuusuttavut pilersitsisullu pikkorillutik atuisuulluarnissaannik piareersassavagut. Workshoppertitsinikkut oqalugiarnikkullu, eqqarsarluarnikkut ullormullu oqaluuserisassaliornikkut taamaaliorsinnaavugut.

Influencers/malinnaatitsisunik Qallunaat Nunaannit Kalaallillu Nunaannit YouTube pillugu eqqartuisinnaasunik ataatsimoortitsisinnaavugut. Attaveqaatit aliikkusersuinermut atorsinnaapput, aammali atoruminartutut sulillunilu sakkutut ajornanngitsutut atorsinnaalluni, nassiussisumit tigusisumut ataqatigiisitsisinnaasoq. Nittartakkamiinneq ukioq 2019-imi ilisimaarilluarnerussammassuk angajoqqaanut pilersitsisunullu, atuarfinnut inuusuttunullu ammasumik oqallitsitsisinnaavugut. Internetsi tamaaniittuartussaalluni takkunnikuuvoq, inuunermi, ulluinnarni Kalaallit Nunaannilu takornariaqarneq qitiutillugu pilersitseqataasinnaavoq.

 

Kina

Lisbeth Karline Poulsen

Århus Kunstakademimi assilialiortutut ilinniarluni naammassinikuuvoq. Nuummi aaqqissuusisarnerni attaveqaatitut suliassanillu ingerlatitsisutut ataqatigiisitsisutut atorpugut. Uummannameersuuvoq.

Mia Ben-Ami

Podcasti digitalimi nalinginnaasumik ilisimasaqarneq, youtuberi, radiomi tusagassiortoq, kulturimik ingerlatitseqqiinermik, saqqummiinernik oqallinnernillu pilersitsisoq. Aammattaaq Mia Thy-mi Youtube-festivaalimi Youtuobia advicory boardedimi ilaanikuuvoq (ukiaq 2018) www.miabenami.dk

 

Rasmus Kolbe, Lakserytterenitut ilisimaneqartoq

Influencer, youtuber, snapchatteritut akissarsisinneqarnikoq. Inuit attaveqaataanni 1 millioninit amerlanerusunik malinnaaffigineqartoq. Rasmusi inuit attaveqaataanni aaqqissuussani nunarsuarmi tamarmi assigiinngitsuni arlaqartuni peqataasarpoq, assigiinngitsutigullu youtubemi inuit oqallittarfiini soorlu Folkemøde, Deadline DR2-mi, radiomi 24syv-imi allanilu oqallitsitsisarluni.

 

Natachap (Natascha Petersen)

Kalaallit Nunaanni YouTube-mi tusaamasaq.

Instagrammimi 114.000-nit amerlanerusunik malinnaaffigineqarluni aamma 10.000-nik youtubemi malinnaaffigineqarluni inuit attaveqatigiiffianni angusaqarluarluni suliffimminik pilersitsinikuuvoq.

 

Johan S Jensen

Assiliisoq aamma youtuberi. Johan angalanerminik vlog-iliortarnermini ilisimaneqarluarpoq. Johan nunarsuarmi allanngueqataarusuppoq youtubekanalinilu paquminartunik atuutsitsiunnaarniarluni atortarlugu.

 

Programmi (missingiut)

Ilinniarnertuunngorniarfik meeqqallu atuarfii:

Ilinniarnertuunngorniarfimmi saqqummiineq, oqallissaarummik saqqummiineq oqallinnerlu. Oqallinneq inuiaqatigiilerinermi, kulturilerinermi, qallunaatoornermi, attaveqaatilerinermi, filosofimi faginilu atuartitsissutini oqaatsinut tunngasuni ilassutitut naleqquttuussaaq.

Atuartunut naleqqussakkamik programmi taama ittoq Nuummi Katuamilu ingerlanneqassaaq. Atuarfinnilu.

 

Ammasumik aaqqissuussineq:

Illoqarfiup innuttaanut pilersitsisunullu inuit attaveqaataat pillugit aaqqissuussineq. Maani digitalimik nalinginnaasumik ilisimasaqarneq inuillu attaveqaataat oqallissaarutinik saqqummiinikkut oqallinnikkullu qitiutissavagut.

 

Workshoppit qallunaanik influencerillit sullinniakkanut assigiinngitsunut (Youtopia: (http://www.thy360.dk/kalender/youtopia-festival--en-youtube-festival-ithy.7952.aspx-ikkut isumassarsianit)

 

Tikeraarnermittaaq qallunaat influencerinut Kalaallit Nunaat taassumalu pigisai misigitikkusuppavut. Taamaattumik piffissaliisoqarumaarpoq angalaarlutik takuniaallutik filmiliornissaannut, tikeraarnerminillu videoliatik assilisatillu siammartersinnaanissaannut. Taamaalilluta Kalaallit Nunaat oqaluuserissassanut ilanngukkusupparput qallunaajaqqallu ilisimasassaqalaarnerunissaat qanillinerullugu. Neriuutaavoq Kalaallit Nunaanniittut amerlanerit isumassarsitinnissaat imaqarnerusumillu inuit attaveqaataanni pilersitseqataanissaat, kiisalu digitalimik nalinginnaasumik ilisimasaqarnissaq qitiutillugu.

 

Allatseqarfimmiit oqaaseqaatit

Meeqqanut Atuarfeqarnermullu Ingerlatsivik atuartut inuit internetsikkut attaveqatigiittarfianik atuinissamut tunngasumik kiisalu tassani periarfissat unammilleruminaassinnaasullu pillugit pikkorissaanissamut suliniummi aqutsisumik oqaloqatiginnileruttorpoq.

Meeqqanut Atuarfeqarnermullu Ingerlatsivik suleqatiginninnissamut ammavoq, isumaqarlunilu tassunga tunngasumik qaqitsinissaq pisariaqarluinnartuusoq, meeqqammi inuusuttullu akornanni atugaalluinnarpoq, taamaattorli taakku silarsuaat aamma atuarfimmiit ilinniartitsisuniillu paasiuminaassinnaallunilu angujuminaassinnaasartoq.

 

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiunneqassasoq

 

Ilanngussat

1. Qinnuteqaat

2. Suliniutip allaaserineqarnera missingersuutillu

Aalajangerneq

Nuummi Najukkami Ataatsimiititaliap qinnuteqaat itigartitsissutigaat oqaasertalerlugu, qinnuteqaatip pilersaarusiornerata allaaserineranik ilanngussaq peqqissaartumik suut tamaasa ilanngussorsimannginneri patsisaallutik.  Ingammik immikkut progammi sukumiinerusoq kissaatigineqartoq innersuussutigineqarpoq kiisalu saqquummiussassap imaata tigussaasunik sukumiinerusunik paasissutissaqarnissaa innersuussutigineqarluni aamma workshoppit taassumallu ilusilersornera. 

Qinnuteqaat – Saqqummersitaq Pinnersaat, Nuummi Eqqumiitsulianik Saqqummersitsivik

Suliassamik saqqummiussaq

Qinnuteqaat – Saqqummersitaq Pinnersaat, Nuummi Eqqumiitsulianik Saqqummersitsivik

 

Nuummi Najukkami Ataatsimiititat pingasunngormat ulloq 24. april Nuummi Eqqumiitsulianik Saqqummersitsivimmit nunat avannarliit pinnersaasioriaasiannik saqqummersitsinissamut tapiissutinut qinnuteqaat tiguaat. 65.000 koruunit qinnuteqaatigineqarput.

 

Qinnuteqaat naapertorlugu missingersuutit katillugit 342.000 koruuniupput, kisianni pingaartumik qullernut ikkussuinissamut, ilinniartitsinermi atortussanik ineriartortitsinissamut aamma Nuummi eqqumiitsuliortut katersorneqarnissaannut Najukkami Ataatsimiititaliaq tapersiilluni tunniussivoq.

 

Qinnuteqaat malillugu suliniummi siunertarineqartut ilaatigut ukuupput:

”(…) Nuummi annertuumik saqqummersitsinermi pinnersaasioriaatsikkut killinik nikisitsineq - suliniut pinnersaasioriaatsimut paasinnittaatsikkut annertusitsisinnaasoq neriuutiginarlunilu Nuummi tamakkulerisartunut isumassarsititsisinnaallunilu qaffatsitsissasoq. Saqqummersitsineq pilersaarutigineqarpoq oktoberimiit december 2019-ip tungaanut pissasoq.

 

Pinnersaatit kulturimut tigumminnittuupput inuttullu inuiaqatigiittullu kikkuunitsinnik takutitsisuullutik. Taamaattoq Nuummi Eqqumiitsulianik Saqqummersitsivimmi Nuuk Nordisk Kulturfestival 2019 ingerlanerani nutaarluinnarnik aammalu Kalaallit Nunaanneersunik pinnersaatinik qanganitsanik saqqummersitsinersuarmi ilanngussinissarput kissaatigaarput. Saniatigut saqqummersitsinermi nunani avannarlerniit pinnersaasioriaaseq saqqummersissavarput, aammalu Nunatta Katersugaasivia / Nunatta Katersugaasivia Allagaateqarfialu suleqatigalugu pinnersaatit qanganitsat saqqummersinneqassapput.

Nuummi Eqqumiitsulianik Saqqumersitsivimmi saqqummersitavut atuartunut ilinniutitalinnik sapinngisamik najukkatsinnut naleqquttut saqqummersittarpavut, ilaqutariinnullu meerartalinnut suliassartalinnik, sisamanngornerit tamaasa saqqummersitsivimmut iserneq akeqanngilaq, pulaarfigilluarneqartarlunilu.

 

(…) Kulturikkut Isumassarsiorfiup akisussaaffigisaanik meeqqat atuartut atuartitaanikkut peqataatinneqassapput.

 

 

Aningaasaqarnermut Allatseqarfimmit oqaaseqaatit

Kulturi Aaqqissuussisarnermullu immikkoortortaqarfimmit oqaatigineqarpoq pilersaarusiaq pissanganartuullunilu allaasoq, eqqumiitsuliortut akornanni attaveqaatit nukittunerulernissaannut aamma isumassarsioriaatsimik nutaamik annertuumik pilersitsissasoq. Saniatigullu Eqqumiitsulianik Saqqummersitsivik ilinniutissanik pitsaalluinnartunik suliaqartarneranik ilisimaneqarluartuuvoq, atuarfiup avataani kommunip atuartuutigisaanut nuannersunik misigisaqartitsisartumik.

 

Kulturi Aaqqissuussisarnermullu immikkoortortaqarfik isumaqarpoq pinnersaasioriaaseq inuuniutitut atorneqarsinnaasoq, avammut tunisisarnissamut aammalu inoqarfimmut isumassarsititsisinnaanissaa eqqarsaatigalugu.

 

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiunneqassasoq

 

Ilanngussat

1 Qinnuteqaat

2. Suliniummik nassuiaat

3. Missingersuut

4 Missingersuut, eqqumiitsuliortut

Aalajangerneq

Nuummi Najukkami Ataatsimiititaliap qinnuteqaat akuersissutiginiarlugu aalajangerpoq siunertamullu aningaasanik 65.000 koruuninik tunniussilluni.

Qinnuteqaat – suliniut Narsarsuaq/Sletten. Blok 1-10 my home is where my heart is (angerlarsimaffiga uummatinniippoq)

Suliassamik saqqummiussaq

Qinnuteqaat – suliniut Narsarsuaq/Sletten. Blok 1-10 my home is where my heart is (angerlarsimaffiga uummatinniippoq)

 

Nuummi Najukkami Ataatsimiititaliaq pingasunngornermi apriilip ulluisa 30-anni Teater Freeze Productions-ip suliniummut Narsarsuaq/Sletten aningaasanik tapiiffigineqarnissamik qinnuteqaataa tiguaa . Blok 1-10 my home is where my heart is(angerlarsimaffiga uummatinniippoq). Siunertarineqarpoq Nuummi Nordisk 2019 ingerlanneqalerpat blok 2 aamma 6 kiisalu 10-mi isiginnaartitsinerit 6-it, ukiuni kingullerni 30-ni blokkini oqaluttuassartat tunngavigalugit isiginnaagassiaasup takunneqarnissaa.

Katillugit 200.000 koruunit qinnuteqaatigineqarput.

Qinnuteqaat malillugu suliniummi siunertarineqartut ilaatigut ukuupput:

”(…) Nuummi innuttaasunit namminneq illoqarfigisamik "uummataa" allatut oqaluttuarineqartoq misigineqarnissaa. Nuuk Nordisk-imut pulaartut tamarmik Nuup aamma Kalaallit Nunaata oqaluttuassartaa nutaajunerusoq paasisaqarfigissavaat.

(…) isiginnaartitsisartut peqatigalugit aamma peqataasut tamaasa ilagalugit Nuummi innuttaasut aallaqqaammulli blokkiniissimasut (1-10) eqqaaniluunniit inuusimasut oqaluttuassaannik katersuissapput. Meeqqerivinni angisuuni atorneqanngitsuni marlunni blok 2-mi aamma 6-imiittuni kiisalu najugaqartut katerisimaartarfiini isiginnaartitsisassaagut, initai inissiami initut aaqqissorlugit.

Isiginnaartitsinerit minutsit 30-t missiliorlugit sivisussuseqassapput, taakkulu ullut tamaasa sapaatip akunnerata ingerlanerani piffissani assigiinngitsuni Nuuk Nordisk festivaleqarnerani takutinneqartassapput, taamaalilluni kikkut tamarmik isiginnaartitsinermik takusaqarsinnaaniassammata. Isiginnaartitsisoqarnerit tamaasa inunnut 35-40-t missaannut inissaqartassaaq.

Suliniut Nuummut tassanilu najugalinnut assorsuaq asanninnermik tunngaveqartumik pilersinneqarpoq,- kissaatigalugulu neriuutigivarput taamatut toqqaannartumik akuutitsinitsigut immitsinnut ilisarisimanerulissasugut aamma sumiiffimmi isiginnaartitsisussaanerput pillugu. Festivaleqarnerata nalaani avataaniit tikeraartut Nuup aamma Kalaallit Nunaata allatut misigisaqarfigissagaat neriuutigivarput.

Isiginnaartitsisartut innuttaasut akornannukartissavagut illoqarfiullu ilaani taakku immikkoortumi najugaqarfiini naapillugit oqaloqatigissavagut. Innuttaasut peqatigalugit aamma ornillugit eqqumiitsuliornikkut takutitsinitsigut, isumaqarpugut ataatsimoornermik misigissuseqartitsisinnaassalluta – immikkuullarissumik misigisaqarnikkut nutaamik eqqaamasaqaqatigiinnermik nutaamillu oqaluttuariaaseqarnermik pilersitsisumik misigisaqartitsisinnaavugut - immaqalu - pitsaanerusumik inuuneqalerluta.

Tamannalu siunissami suliniutinik assingusunik, misigissutsinut allanullu tunngasunik, pilersitserusulernermik kinguneqarsinnaavoq. Immikkoortuni, ilaatigut sakkortuuni tujorminartunilu, eqqumiitsuliornermik pilersitsisarnissarput pingaaruteqartuuvoq. Inoqarpormi kusanartunik aammalu sakkortuunik oqaluttuassalinnik. Ataatsimoorluta misigisimaqatigeeqqilernitsigut eqqaamasat nutaat aamma pilersinneqassapput,- Nuuk aamma Kalaallit Nunaat pillugit ataatsimut eqqaamasassavut.”

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussaq

1. Qinnuteqaat missingersuutitalik

Aalajangerneq

Nuummi Najukkami Ataatsimiititaliap qinnuteqaat akuersissutigineqassasoq aalajangerpoq siunertamullu aningaasanik 200.000 koruuninik tunniussisoqassasoq aalajangerlugu.

Taasariaqartut allat

Suliassamik saqqummiussaq

  • Aviaq Brandt: Aasamut illoqarfiup meerartaanut tamanut aqqusinermi nalliuttorsiortitsinissaq aaqqissuunniarlugu eqqarsaatersuutigineqarpoq.

 

  • Arnarissoq Fleischer: Issiavinnik takisuunik eqqaavinnillu allaanerulaartunik ikkussuinissamut pilersaarusiornissamut  aallartisaasoqarsinnaanersoq misissuiniarpoq.

 

  • Moses Masik Marcussen-Mølgaard: Ilinniartut illussaannik suli pilersitsiniarluni suliniuteqarpoq Hotel Nuummilu misileraalluni aallarnisarnissaq kissaatigaa.  Moses isumasioqatissaminik pisariaqartitsivoq suliniutillu ingerlateqqinnissaanut ikiortissamik pisariaqartitsilluni ilaatigut aningaasaqarnermut ingerlatsinissamullu aaqqiissutissamut tunngatillugu.

 

  • Sammisassaqartitsinermut pilersaarut:Najukkami Ataatsimiititaliaq piffissamut ungasinnerusumut pilersaarusiornissaq pillugu oqallinnissamut piffissamik ujartuissaaq tassani Najukkami Ataatsimiititamit namminneq suliniutiminnit aallaavillit pineqassapput (sammisassaqartitsinissamut pilersaarut). Taassuma eqqartornissaanut tulliani nalinginnaasumik ataatsimiinnissaq juunip ulluisa 4-maat pisussaq sivitsorlugu pinissaa siunnersuutigineqarpoq, akunnermik ataatsimik sivitsorlugu taamaalillunilu aatsaat nal 19.30 ataatsimiinnissaq naammassillugu.
     
  • Allatseqarfiup unnukkorsiutinik nerinissaq isumagissavaa. 
     
  • Esmar Bergstrøm: Ikaartarfinnut tulattarfinnullu inoqarfinni inuerunnikunut nunaqarfinnullu tunngasut Najukkami Ataatsimiititaliap pitsanngorsaaqataarusunnini pillugu periarfissanik misissuinissaq eqqarsaatersuutigaa. Innuttaasut utoqqaanerusut pitsorluttullu nunamut ikaarsinnaajunnaarnikuupput atuisunullu tamanut pissutsit ajorluinnartut isumannaallisaanermut ulorianartorsiortitsipput taakku ilagaat meeqqat lejerskolerniartut/aasarsiorniartullu.
Imaqarniliap akuerineqarnera

Suliassamik saqqummiussaq