Borgmester peqatigalugu, immikkut ittumik Tasiilami Najukkamik Ataatsimiititaliaq

3A. Najukkami ataatsimiititap suliaasa killiffii.

Siorna inuiattut ullorsiornermi 21/6-2019 kiisalu Tasiilaq ukiuni 125-ni nalliuttorsiorneranut atatillugu, qiperukkamik Georg Qupersimat Najukkamik ataatsimiititaliaq tunniussinikuuvoq. Jens Kjeldsen-ip qiperugaanik taannalu uleerneqarluni katersugaasiviuk eqqannguani. Kiisalu Tasiilaq ukiuni 125-liinerani nalliuttorsiornerani 25. Kiisalu 26. August 2019 ulluni marlunni ingerlanne-qartumi, Najukkami ataatsimiititaliaq peqataasarnikuupput Peqqinnermut Sammisassaqartitsine-rmut Kulturimullu Immikkoortortaqarfik suleqatigalugu meeqqanut inuusuttunullu sammisaqarti-tsisarnikuullutik.

Illuaraliassaq Stark-imi pisiaralugu Tasiilap qinnguani sanatinneqarpoq sanasumit. Illuaqqap ilua pequtserneqarnera qalipanneralu Inuusuttuaqqat Kulturikkut illuaniit ittuat peqatigalugu suliarineqarpoq naammassingajalerluni. Illuaraq innuttaasut kikkulluunniit atorsinnaasaat.  

Ukioq manna illoqarfimmi pingasoriaq saliisitipput innuttaasut peqataatillugit peqataaffigineqarluartarpoq. Inuusuttuaqqat Kulturikkut Illuaniit suleqataalluarlutik peqataasarput.

Kalaaliarassaq pillugu Tasiilami suleqatigiippugut-mi suliaqartut Sustainibel Now illunik titartaasartoq Erik peqatigalugit kiisalu Aalisartut piniartullu peqatigiiffianiit kiisalu Erhvervsråd-imiit, sumi inissisimaffissaa il.il. eqqartorneqarpoq. Neriuutigineqarluarpoq naammassineqarnissaa.

Tasiilami suleqatigiippugut aamma ataatsimeeqatigineqarnikuupput, taakku maani Tasiilami suut amigaatigineqarnersut kissaatigineqarnersut paasiniarneqarlutik sulissutiginiarpaat. Tassani internetikkut attaveqaatit pitsaanerusut arriinnera pissutigalugu kiisalu Tidlig indsats, inissaaleqinerit, kinguaassiutitigut kannguttaattuliornermi pinaveersaartitsinerit. Lokalradio-taarnissaq. Natteravn-it siornatigut Røde Kors-iniit ingerlanneqartartut, arnat marluk nammineq piumassutsiminnik saaffiginninnikuusimapput soqutiginnillutik. Kaammattorneqarput arlaatigut amigaateqarunik qinnuteqarsinnaasut. Akikinnerusunik anginerusunillu inissianik ilaqutariinnut. Tassanilu illu ataaseq misiliutitut sananeqartussaq, tassanilu initaarnissaminnik utaqqisuniittut aperalugit inissiaq qanoq ittoq piumaneqarnersoq. Immaqa aatsaat siullerpaamik taamatut aperisoqarpoq.

Inuusuttuaqqat Kulturikkut illussaat nappaanersiorneqarmat august-imi peqataapput.

Bænk-it qulit piniarneqarput, illoqarfimmi ikkussuuttussanik.

Sanaaluttartut Stunk-imi suliaannik gaveæske-nik tunissuteqarneq. Ukioq manna sanaaluttartoq Bent Kuitse-p nammineq piumassutsiminik qisuk 1 ½ meter missaani, maani pisiniarfeeqqap qulaani napparpaa. Sanaaluttartunut qiperukkanik pikkorissaasoqaraluarpat iluaqutigineqarsinnaagaluarpoq, tamakku takornarialerisullu suleqatigiinnikkut anguniarneqarsinnaavoq.

Illuaqqamik Tasiilap silatinnguani upernaakkut aasakkut sikorsuaqatillugu qimaaffissatut isersimaarfissatut amigaatigineqarpoq, aappaagu illuaralioqqinnissaq takorloorneqarpoq. Siornatigut qaammat november-imi innuttaasunut nerersuartitsisaraluarput inut 300-400 peqataasarnikuullutik, ukioq manna ilimananngilaq, kisianni utoqqarnik ukiortaarsiortitsineq nereqatiginneq peqataaffigineqarluartartoq ingerlatinneqarnissaa takorloorneqarpoq. Utoqqaat nuannisartarmata angerlarusunnaartarlutik nuannisangaarmata.

Ukioq manna innuttaasunik iluamik ataatsimiititsisoqanngilaq covid-19 pissutaalluni.

Qanittukkut Peqqinnermut Sammisassaqartitsine-rmut Kulturimullu Immikkoortortaqarfimmiit peqatigiiffiit il.il. ataatsimeeqatigineqarput peqataaffigineqarluartumik.

Borgmesterip najukkami ataatsimiititaliap suliarpassuanut nersualaarinnippoq covid-19 killilersuigaluarluni, ilaasortanngortullu nutaat tikilluaqqullugit. Kiisalu illuaraq facebook-imi takusimallugu nuannerunartillugu. Inissianut tunngatillugu aningaasaliissutissanik tusarniaasoqarneranik, ukiut qulit iluani Tasiilami inissianik sanaartortoqarnissaa eqqaavaa. Taamaattumik Tasiilami suleqatigiippugut-mi illumik sanasoqarnissaanik soqutiginartippaa. Natteravn-it ukioq marluk matuma siorna ataatsimeeqatiginikuuai, nammineq piumassutsiminnik suliaqartussanik pissarsinissaq ajornakusoortorujussuuvoq. Taamaammat tusarluarnarpoq inuit marluk saaffiginnissimasut soqutiginnillutik.

3B. Kalaaliarassaq

Sumut killinnersoq paasiniarneqarpoq, borgmesterillu nassuiaavoq illunik titartaasartoq kiisalu Pernille ataatsimeeqatigisimallugit saqqummiillutillu. Soqutiginartorujussuuvoq arealtildeling-itassaa pappialarsornerillu suli ingerlapput.

Kiisalu Najukkami ataatsimiititaliap Kalaaliarakoq atorluarneqaqqinnissaa siunnersuutigivaat. Tassanilu borgmesterip eqqaavaa, tassunga pilersaaruteqartoqanngitsoq, kisiannili siunnersuutinik kommunalbestyrelse-nut ingerlatissiisinnaasut.

3C. Attertup Nuuata imartaani wire-mik ikkussinissaq

Umiatsialivimmi angallatit amerlasoorujussuusarput maani Tasiilami. Angallatit tattoqittaattorujussuupput ikuallattoqalissagaluarpat amerlasuut ikuallalersinnaagamik. Ukiorpaaluit qaangiupput taamatut pisoqarmat. Taamaattumik Attertup Nuua-ta angallatinik inissisimaffissatut atorneqarnissaanik, imartaani wire-mik ikkussisoqarnissaa sikunik illersuutaasussamik kissaateqarput. Tassanilu akissutigineqarpoq tusarniaanermi sektorplan-imi suli akuersissutigineqanngitsut. Kommunalbestyrelse-p tamakkiisumik pilersaarut suliarisussaavaat, suut amigaatigineqarnersut pitsanngorsarneqassanersullu tusarniaavigineqassallutik. Tassanilu ingerlatsinermi aqutsisuugallartup misissorumavaa nalilersortussaallugulu.

3D. Majuartarfiliassat Prs. Benediktip aqqulaani

Majuartarfiliortitsinissamik sanasunik suliarinnittussarsiornermi ajoraluartumik takkuttoqarsimanngilaq. Taamaammat aappaagumut upernaamut sanatitsinissaq kinguartinneqartariaqassaaq. Aamma tamakkiisumik pilersaarummi takuneqarsinnaapput ilanngunneqarsimasut.

3E. Tinitsitsivissaq iffiorfiup eqqaani

Ukiuni kingullerni angallatinik tinitsitsivissaq amigaatigineqalerpoq. Angallatip motooriata olie taarsernissaanik, angallammik qaqitseqqaarluni taamaaliortoqartarpoq taamaaliornerlu 10 minutsiinnaagaluaq 700 kr.-inik akeqarpoq akisugineqarlunilu. Tinitsisivissaq suliarinissaanik atortussat stål-itassai Kulusumiipput, maanga assartorneqaqqaartussaapput suliaritinnissaannut suliarineqarumaarporlu.

3F. Arsaattarfiup eqqaani illuaqqanik issiavinnik sanatitsinissaq

Maani Tasiilami aasakkut arsaattarfik arsartartunik atorneqartorujussuusarpoq. Issiavinnik amigaateqartoqartarpoq. Kiisalu illuaqqanik marlunnik sanatitsisoqaraluarpat ajussanngikkaluaqaaq. Najukkamik ataatsimiititaliaq tamakkununnga tamakkiisumik akissaqanngilaq, ukiumut aningaasaliissutit pisartagai annertunnginnamik. Tassani siunnersuutigineqaraluarpoq aningaasaliisussanik ujaasisoqarsinnaagaluartoq, kisianni maani Tasiilami suliffeqarfiit ikittuinnaagamik ajornakusoortorujussuuvoq taamaaliornissaq. Tamakkiisumik pilersaarummi takuneqarsinnaavoq, arsaattarfiup eqqaani issiaviit aamma ilanngunneqarsimasut. Taamaattumik kommunalbestyrelse-miit akuerineqassappata suliaritinneqarumaarput.

3G. Aningaasat atukkat qaammatikkaartumi killiffii

Najukkami ataatsimiititaliap aningaasanik ukiortaamiilli atuinera, sumut bogførerneqartarnersut takuneqarsinnaaneq ajorpoq. Qaammat kingulleq aningaasat killiffii tigunerani, taamaallaat pingasuinnaat bogførerneqarsimapput. Sinneri aningaasaqarnermut ingerlatsivimmut paasiniarneqarput sumut bogførerneqarsimanersut. Massakkut taakku Christina-p misissorpai.

3H. Aningaasaliissutit ukiumut mikivallaarnerat

Anguniarusutat arlaqartaraluartut ukiumulli aningaasaliissutit 350.000 kr.-nit mikivallaarnerat pissutaalluni, suliat annikitsuinnaasarput. Tassanilu borgmesterip nassuiaappai innuttaasut amerlassusii aallaavigalugit aningaasaliissutit tunniunneqartartut. Arlaatigut annertuumik aningaasanik pisariaqartitsisoqassappat kommunalbestyrelse-mut qinnutigineqarsinnaasut. Soorlu aamma 3I-mut taamatut qinigaasussat 2021-imi nutaat nalilersoriarlugit, kommunalbestyrelse-mut isertussanut nutaanut qinnutigineqassapput.

3I. Aningaasarsiat qaffannissaat

Heidi Jerimiassen-imut siorna aningaasarsiat qaffannissaannik allagaqaat nassiunnikuuvoq, taannalu kommunaldirektør-imut ingerlateqqinneqarsimavoq. Kiiisalu 3Hmi allaqqasoq takuuk.

3J. Isumasioqatigiinnissaq 2022-imi

Aningaasaqarnermut Ingerlatsinermullu Ataatsimiititaliap aalajangernikuusimavaa isumasioqatigiinneq pisassasoq ukiut pingasukkaarlugit, taamaammat isumasioqatigiinnissaq pissaaq 2022-imi. Tassungalu Luvisa ataqatigiissaarisoq nassiussivoq Heidi-mut Marie-mullu.

Utoqqalinersialinnut siusinaarlutillu qaammamusialinnut ulloq ataaseq sioqqullugu ikineqartalernissaat kissaatigineqaraluarpoq. Maani Tasiilami pisiniarfik ataasiinnaavoq, inuppassuillu pisiniartarlutik taamaalillutik utoqqaat utaqqikatattarlutik. Ulloq ataaseq sioqqullugu utoqqalinersiai ikineqartaraluarpata eqqissillutik pisiniartassagaluarput.

Tamanna tusaatissatut tiguneqarpoq, taamaaliortoqarnissaanillu pilersaaruteqartoqarnani.

Maani Tasiilami Kommuneqarfik Sermersooq covid-19 corona pissutaalluni, killilimmik innuttaasunik ammaqqasarnera innuttaasut killilersorneqarnerat isersinnaaneri, sila nillertimmat innutaasut silami utaqqisarnerat qiiallutik allanngortinneqarnissaa kissaatigineqarpoq.

Tamannalu iliuuseqarfigineqarusuppoq.