190430 – Aqqaneq Sisamat ileqquusumik ataatsimiinneq

Lone R. Pedersen (IA) Asii C. Narup (IA) ataatsimiinnermi sinniisuuffigaa.

Borgmesterip peqannginnerani borgmesterip tullersortaata siulliup Randi Vestergaard Evaldsenip (D) ataatsimiinneq aquppaa.

Oqaluuserisassat akuerineqarput.

2a.

1. Ullumi 2019-imi apriilip ulluisa 30-anni ataatsimiinnermi oqaluuserisassani, kommunalbestyrelsimut ilaasortat siunnersuutaat piffissami aalajangersimasumi misiliutitut allaffeqarfimmit oqaaseqaateqarfigisarlugit aallartinneqarpoq. Taamatut iliortoqarpoq ilaasortat siunnersuutaat pitsaaninngortikkusullugit aammalu aallaqqaataaniilli allaffeqarfiup nalilersuisimanera nalunaarumallugu, taamaalillutik siunnersuutit ilaat kommunalbestyrelse inaarutaasumik aalajangiitinnagu oqaaseqaammik taperserneqartalissapput. Massakkut periusiusartoq sivitsortoortitsisarpoq aamma politikerit ilaasa naatsorsuutigisarpaat kommunalbestyrelse tapersiissuteqarmat taava siunnersuutitik piviusunngortinneqarlutik aallartinneqassasut, piviusorli unaavoq, allaffeqarfiup siunnersuut piviusunngortinneqarsinnaanersoq nalilersortarpaa tamatumalu kingornatigut Kommunalbestyrelsimit akuersissutigisassanngorlugu imaluunniit itigartitsissutigisassanngorlugu ingerlateqqinneqartarpoq. Siunnersuutilli amerlasuut aningaasartuuteqarfiungaatsiartarput, siunnersuutinullu aningaasanik immikkoortitsisoqarsimanngikkaangat tamanna imaappoq, siunnersuut allaffeqarfimmit piviusunngortinneqarsinnaanngitsoq. Kommunalbestyrelsip ataatsimiinneri arlalialunnguit qaangiuppata misiliineq naliliiffigineqassaaq.
2.  2019-imi juunip ulluisa aappaanniit tallimaannut Tromsø Kommune Nuummut tikeraassaaq. Ulluni taakkunani pilersaarutit kingusinnerusukkut nassiunneqassapput.
3. Ulloq 8. marsi 2019 Qinersinermi Siulersuisut folketingimut qinersinissaq pillugu ataatsimiipput. Taaguinermik siulersuisut aamma allaffeqarfiup aalajangiinissaanut pisinnaatitsissutip akuersissutigineqarnissaat oqaluuserisassaniipput.
4. Ulloq 19. marsi NAKUUSA-mi siunnersuisarfiup, Meeqqat Siunnersoqatigiiffiata, isumaqatigiissut Naalakkersuisunut, Borgmesterinut kiisalu Inatsisartunut tunniuppaa. Aaqqissuussineq Kommunalbestyrelsip Ataatsimiittarfiani ingerlanneqarpoq. Isumaqatigiissut NAKUUSA-p Ilulissani 2019-imi januaarip qaammataani meeqqat ataatsimeersuartinneqarnerat tunngavigalugu suliarineqarpoq. Meeqqat ataatsimeersuartinneqarnerat Naalagaaffiit Peqatigiit Nunarsuarmut anguniagaa 3 tunngavigalugu ingerlanneqarpoq: ’Peqqinneq Inuulluarnerlu’. Meeqqat 35-t, 13-iniillu 18-inut ukiullit, oqallipput apeqqullu pilersillugu: Inuuneq peqqissoq pitsaasorlu sunaava? Isumaqatigiissut erseqqissunik sisamanik, qanoq politikerit Kalaallit Nunanni meeqqanut inuusuttunullu peqqinnerulernissamik inuulluarnermillu pitsanngorsaanissaannik, innersuussuteqarnermik kinguneqarpoq.
5. Ulloq 19. marsi borgmesterit ataatsimeeqatigiipput. Ataatsimiinnermi attaveqaqatigiinneq pillugu isumasioqatigiinneq aamma sullissinissamik isumaqatigiissutit oqaluuserisassaniipput. Tulliani ataatsimeeqatigiinneq Politikkikkut Ataqatigiissaarisartoqatigiit ataatsimiinnerannut atatillugu maajip qaammataani pissaaq.
6. Ulloq 25. marsi Kulturitta siammarsarneqarnissaa pillugu Siunnersuisartoqatigiit ataatsimiipput, tassani Aningaasaateqarfik Sermimut qinnuteqartut 32-t suliarineqarput. Qinnuteqartunut 10-nut 1.143.800 koruunit agguaanneqarput.
7. Ulloq 26. marsi borgmesterip qaammatit pingasukkaarlugit nunaqarfinni aqutsisunik ataatsimeeqateqartarnini oqarasuaatikkut ingerlappaa.
8. Ulloq 29. marsi borgmesteri Sermersooq Business Council-ip ileqquusumik ataatsimeersuarnerani peqataavoq.
9. Ulloq 30. marsi 2019 borgmesteri NGO-nik isumasioqatigiissitsivoq Kommuneqarfik Sermersuumi meeqqat inuusutullu qiteritillugit. Isumasioqatigiissitsinerup NGO-t suliniutaasa paasineqarnissaat kiisalu sutigut tamatigut NGO-t aamma kommunip akornanni oqaloqatigiittarfissamik pilersitsinissaq siuneratarivaa. Kiisalu borgmesterimit kissaatigineqarpoq NGO-t siunissami kommunimit suleqatigineqarsinnaanerannut isumassarsinissaq. Meeqqanut Ilaqutariinnullu Ataatsimiititami siulittaasoq, Meeqqanut Atuarfeqarnermullu Ataatsimiititami siulittaasup tullia kiisalu Suliffeqarnermut Isumaginninnermullu Ataatsimiititami siulittaasoq isumasioqatigiinnermi peqataapput. Taamatullu ingerlatsivinni allaffeqarfiit attuumassuteqartut sinniisuutitaqarlutik peqataapput.
10. Ulloq 3. apriili borgmesterip UNICEF-ip Kalaallit Nunaanni suliniutinut pisortartaava (programchef) ataatsimeeqatigivaa. UNICEF tassaavoq FN-ip Meeqqanut aningaasaateqarfia nunarsuarmilu meeqqat pisinnaatitaaffii pillugit suliniaqatigiiffiit annersaat. UNICEF Danmark Kalaallit Nunaanni allaffittaaqqammerpoq, ataatsimiinnermilu suliniutinut pisortap UNICEF-ip Kalaallit Nunaanni inissisimanera pillugu ilisimatitsissuteqarpoq.
11. Ulloq 4. apriili borgmesteri aamma Meeqqanut Atuarfeqarnermullu Ataatsimiititami siulittaasup tullia meeqqerivinni meeraatillit sinniisuinik aaqqissuussaalluartumik ataatsimeeqatiginnipput. Ataatsimiinneq Meeqqanut Atuarfeqarnermullu Ingerlatsivimmit Nuummi meeqqerivinniittuutillit sinniisuinik ulloq 23. januaari 2019-imi ataatsimeeqateqarsimanera tunngavigalugu pilersinneqarpoq   .. Angajoqqaanit kissaatigineqarsimavoq politikerit ulluunerani paaqqinnittarfinni ajornartorsiutit pillugit ataatsimeeqatigineqassasut.
12. Ulloq 8. apriili borgmesteri Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisumit Ane Lone Bagger-imit aggersarneqarluni ataatsimeeqateqarpoq, perorsaasunik amigaateqarneq tassani qitiuvoq.
13. Ulloq 10. apriili Nuummi mittarfissaq pillugu Kalaallit Airports International A/S-ip aaqqissugaanik Katuami paasissutissiinermut atatillugu borgmesteri tikilluaqqusilluni oqalugiarpoq  .
14. Ulloq 11. apriili – 23.maaji borgmesteri sulinngiffeqarpoq. Piffissami tassani borgmesterip tullia siulleq Randi V Evaldsen borgmesterimut taartaavoq.
15. Ulloq 16. apriili borgmesterip tullia siulleq Randi V Evaldsen, ileqqoq malillugu, dronningi 79-inik ukioqalerluni inuuissiornerata Nuutoqqami nalliussineqarnerani tikilluaqqusilluni oqalugiarpoq.
16. Ulloq 16. apriili borgmesterip tullia siulleq Inussivimmi vollyball-ernerup ammaanersiorneqarnerani kiisalu Illorsuaq Nuummi Timersortarfimmi sulorarnermik Nunatsinni pissartanngorniunnermi oqaaseqarpoq.
17. Ulloq 18. apriili borgmesterip tullia siulleq NS-84-ip sisoraatinik pissartanngorniutsitsinerata ammaanersiorneqarnerani tikilluaqqusilluni oqaaseqarpoq.
18. Ulloq 23. aamma 24. apriili Pinerluuteqarsimasunik Isumaginnittoqarfiup Nuummi inissiisarfissami nutaami unnuinissaq pilersaarutigisimavaa, tassani Kommunalbestyrelsimi ilaasortanit aamma allaffeqarfimmit sinniisut peqataaffigisassaannik. Pinerluuteqarsimasunilli Isumaginnittoqarfiup aaqqissussaaq piffissami aalajangersimanngitsumi kinguartippaa.
19. Ulloq 25. apriili Iserit, Nuup Bussii kiisalu NCD ataatsimeersuarput. Kommunaldirektøri Lars Møller-Sørensen peqataavoq
20. Ulloq 26. apriili innuttaasunik misissuineq kingulliup inernera Peqqissutsimut Naalakkersuisoqarfiup Katersortarfimmi saqqummiuppaa. Borgmesterip tulliata aappaa, Uju Petersen, Kommunalbestyrelse sinnerlugu peqataavoq. 

2b

Uju Petersen (IA), MIA siulittaasoq:

Ataatsimiititaq Ittoqqortoormiinut angalareerpoq

Ingerlatsivimmi illup allanngortiternera naammassineqarpoq, inimi allermi inimik oqaloqatiginnittarfilik.

Inuusuttut Ornittagaat pillugu quppersagaq nutaaq saqqummersinneqarpoq, aasallu ingerlanerani Ingerlatsivimmit naatsorsuutigineqarpoq pitsaaliuinermut ikiorsiissuteqarnermullu tunngasut nassuiaataat nutarterlugit naammassineqarnissaat. Tamatuma kingornatigut aaqqeeqqinnissamut pilersaarutip nutarterneqarnera aallartinneqassaaq peqatigitillugulu meeqqanut ilaqutariinnullu nutaamik politikkiliortoqassaaq.

Meeqqat kannguttaatsuliorfigineqarsimasut pillugit ikiorsiissuteqartoqarluni aallartittoqarnissaa Ingerlatsiviup sulissutigivaa, tamanna aasami sulinngiffeqareernerup kingorna Isumaginninnermik Aqutsisoqarfik suleqatigalugu ingerlanneqassaaq

Charlotte Ludvigsen (IA), SIA siulittaasoq:

Suliffeqarfik

Inuiaqatigiinni aningaasaqarnikkut suliffeqarfimmi killiffik: Taastrupimi Grennesmindemi inuusuttut atugarissaarput sulilu pimoorussillutik.

Aningaasaateqarfinnik suliaqarnermut tunngatillugu 24.04.2019-imi Kalaallit Nunaanni inuiaqatigiinni aningaasaqarnikkut suliffimmik pilersitsinissamut tunngatillugu Inuussutissarsiornermut, Nukissiuuteqarnermut Ilisimatusarnermullu Naalakkersuisoqarfimmit akuersissummik tigusaqarsimavugut.

Ileqqoreqqusassat allaqqaarnerinut tunngatillugu Kommuneqarfik Sermersuumi Pisortaqarfimmit suliffiup ”Suliffeqarfittut imminut ingerlatittutut” pilersinneqarnera akuerineqarpoq. Ileqqoreqqusanut aamma siulersuisunut Advisory Boardimullu tunngatillugit suliffeqarfiup pilersinniarneranik suliaqarnerit nangipput, aqunneqarpullu ukunanit: ”Advokatkontoret, Foldschack, Forchhammer, Dahlager & Barfod”

 Utoqqarnik suliassaqarfik

Siulersuisut ineriartortinniarlugit pikkorissartitsineq: KS-imi utoqqarnik suliassaqarfimmi siulersuisut tamarmik Nanoq Akademiimik suleqateqarluni ukiut aappassaannik siulersuisut ineriartortinniarlugit pikkorissartitsinermik aallartipput. Ingerlassamut siunertaq tassaavoq utoqqarnik suliassaqarfimmi tamarmi siulersuisut akunniliuttartuunissamut piginnaanilernissaat, taakkumi siulersuineq, oqaloqateqartarneq, napparsimalluni suliartunnginneq, periusissianik pilersaarutinillu nutaanik tamanik atuutsitsilerneq aaqqissuussivimmi tamarmiusumi isumaginissaat qularnaartussaavaat.

Plejehjemmip Ippiarsuup nalliuttorsiornera: Ulloq 29.4.19 najugaqartunut, atuisartunut, sulisunut innuttaasunullu ukiunik 20-nngortorsiortitsisoqarpoq – illu ammatillugu tamulugassaqarlunilu kaaginik kaffimik illuligassaqarpoq, kiisalu Pele Møller Band nipilersorlutik tusarnaartitsipput.

Pisortatut suliassaqarfik

Pisortanit ikiorsiissutinik iluarsaaqqinneq: Ulluni 25. aamma 26. apriilimi suliniut ”annertunerusumik imminik pilersugarineq” pillugu Naalakkersuisut workshoppeqartitsipput. Taanna suliffeqarneq annertusarniarlugu isumaginninnermi, suliffeqarfimmi, ilinniartitaanermi akileraartarnermilu suliassaqarfinni iluarsiissutaasinnaasunut tunngasuuvoq. Inatsisiliornermik piareersaatitut suliaqarnermi tassani kommunit siusissukkut ilanngunneqarput, ingerlassallu nanginnerani ilanngunneqartuassapput.

Angerlarsimaffeqannginnermut akerliussutsimik takutitsineq: Ulloq 25. apriilimi angerlarsimaffeqannginneq pillugu akerliussutsimik takutitsisoqarpoq. Suliffeqarnermut Isumaginninnermullu Ingerlatsivimmi ataatsimiititaliap tulliani ataatsimiinnerani angerlarsimaffeqannginnermut periusissiassamut allaqqaagaq naalakkersuinikkut oqaluuserineqassaaq.

Henrik Rachlev (IA), MAA siulittaasoq:

Atuarfeqarfinni ”Kivitsisa”-mik ingerlatsineq tunngavigalugu Atuarfik Hans Lynge-mi I-pad nik maanna tunniussuineq ingerlavoq.

Ilinniartitsisut pikkorissarneqarput I-Pad projektemi ataqatigiissaarisunik kiisalu ilinniartitsisut ataasiakkaat aamma malinnaaffigineqarlutik.

USK-mi uani sapaatip akunnerani aatsaat angajullernut I-pad-tit agguaanneqassapput angalasimanerat peqqutigalugu.

Teknikkikkut ilimagisatsinnik unammillernartoqarsimavoq, tamannali piareersimaffigingatsigu annikitsumik aqqusaarparput.

Uani sapaatip akunnerani angajullerni naggataarutaasumik misilitsinerit aallartipput

Aningaasanik tapiissutinik Nordplus miit 9.klassini paarlaaqatigiinninneq ingerlanneqarpoq Nuummi kiisalu Estland miit. Qulequtaq kulturitsigut paarlaasseqatigiinneq aallaviuvoq, tassani nunagisami nerisassat pineqarlutik. Kiisalu ilinniartitsisut aamma nuanat akimorlugit suliniuteqarneq ataavartumik ingerlateqqissavaat.

Ittoqqortoormiiniit atuartut Islandimi siullermeersumik sulinermi sungiusarneq ingerlappaat, tamannalu nalunaarutigissavarput iluatsilluarmat.

Meeqqanut paaqqinnittarfiit pikkorissarneqaqqammerput misissuut meeqqat inerissimanerannut MIM qanoq atorneqarsinnaaneranik ilitsersuunneqarlutik.

Justus Hansen (D), SAA siulittaasoq:

Kommunip suliffeqarfittut allaffissornermilu illuutaanik ataatsimut takussutissaliorneqarnerat naammassineqangajalerpoq. Kommunip illoqarfinni tamani illuutai imaluunniit attartugai tamarluinnaasa nalunaarsorneqarsimalerput, eqqarsaataavorlu tamanna ilaatigut PPV-nut tunngasunik pitsaanerusumik pilersaarusiorsinnaanngornissaq ilaatigullu illunik tamakkiinerusumik atorluaalernissaq.

Tuujummi inissialiortiterneq pilersaarutit naapertorlugit ingerlavoq. Blokkini pingasuusuni marluk tiguneqareerlutik iserterfigineqarnerat aallartippoq.

Kommuneqarfik Sermersuup Nuuk City Development Nuummi blok 1-ip isaterneqarnissaanut qulakkiigassanik suliaqarnissaanut suliakkerpaa.

Taamatullu NCD aamma Nuummi sumiiffinni assigiinngitsuni sanaartorfissagassanik arlalinnik aallartitsinissaanik kommunimit piumaffigineqarpoq.

Kiisalu NCD kommunimit piumaffigineqarpoq, paarnaarussivittaassap illuatungaani paassaasiviliussasoq.

Ukiup imaannaanngitsup kingunerisaanik kommunimi sumi tamaani aqqusinermi itersanngorsimasut iluarsartuunneqarlutik aallartinneqarput.

Ilisimatitsissut tusaatissatut tiguneqarpoq.

Ilisimatitsissut tusaatissatut tiguneqarpoq.

Ilisimatitsissut tusaatissatut tiguneqarpoq.

Inassutigineqartoq akuerineqarpoq.

Inassutigineqartoq akuerineqarpoq.

Inassutigineqartoq akuerineqarpoq imatut allannguuserlugu: qulequtaa allannguuteqartinneqassasoq, taamaalilluni qulequtaa peerneqarluni.

Inassutigineqartoq akuerineqarpoq.

Inassutigineqartoq akuerineqarpoq.

Inassutigineqartoq akuerineqarpoq.

Inassutigineqartoq akuerineqarpoq.

Inassutigineqartoq akuerineqarpoq. 

Siumut oqaatigivaa, neriuutigalugu malittarisassat malinneqassasut.

Inassutigineqartoq akuerineqarpoq.

Uju Petersen (IA) aamma Randi V Evaldsen (D) iniminnik paarlaapput, siunnersuutip oqallisigineqarnerani. 

Inassuteqaat itigartinneqarpoq Kommunalbestyrelsillu suliaq Meqqanut Atuarfeqarnermullu Ataatsimiititamut ingerlateqqillugu.

Inassuteqaat itigartinneqarpoq Kommunalbestyrelsillu suliaq Ataatsimiititanut susassaqartunut pingasunut ingerlateqqillugu: Meeqqanut Atuarfeqarnermullu, Suliffeqarnermut Isumaginninnermullu kiisalu Meeqqanut Ilaqutariinnullu.

Inassuteqaat akuerineqarpoq siunnersuullu najukkami ataatsimiititaliamut ingerlateqqinneqarpoq.

Inassuteqaat akuersissutigineqarpoq, imatut allannguutitalerlugu:

Siunnersuut Sanarfinermut Avatangiisinullu Ataatsimiititamut ingerlateqqinneqarpoq.

Atortussat pigineqareersut atoqqqinneqarsinnaaneri misissorneqassapput kiisalu Ittoqqortoormiini oqaluffissap sananeqarnissaanut pilersaarutit sumut killinnersut paasiniaavigineqassaaq.

Kommunalbestyrelsip siunnersuut taperserpaa, suliarlu Aningaasaqarnermut Inuussutissaqarnermullu Ataatsimiiititap suliareqqitassanngorlugu ingerlateqqinneqarpoq.

Soqanngilaq.

Imaqarniliaq akuersissutigineqarpoq nal. 18.09.