Utoqqaat Siunnersuisooqatigiiviniit saaffiginnissut

Utoqqaat Siunnersuisooqatigiiviniit saaffiginnissut – utoqqalinersiutillit akeqanngitsumik bussersinnaanissaat

 

Nuummi Najukkami Ataatsimiititaliaq ulloq 1 marsi 2019 Isumaginninnermut Suliffeqarnermullu Ingerlatsivimmiit allakkanik tigusaqarpoq. Ingerlatsivik Nuummi Najukkami Ataatsimiititaliamut Kommuneqarfik Sermersuumi Utoqqaat Siunnersuisooqatigiivi sinnerlugit saaffiginnissuteqarpoq.

Saaffiginnissummi imatut allassimasoqarpoq:

”Kommuneqarfik Sermersuumi Utoqqaat Siunnersuisooqatigiivi ulluni 28 novembari 2018-imi aammalu 22 februaari 2019-imi ataatsimiittarnerminni sammisassanut assigiinngitsunut tapiiffigineqartarnissaminnik eqqartuisarsimapput. Tassani pineqarput aaqqissuussat, illoqarfigisami innuttaasut akornanni, atuisut akornanni, suliffeqarfiit akornanni, ataatsimoortukkaani assersuutigalugu illoqarfiup immikkoortuini utoqqaat, meeqqat, angajoqqaat kiisalu illoqarfiup immikkoortuini inuit atorfissaaruttutut ittunut nukittorsaataasut aamma/ imaluunniit attaveqalersitsisut.

Utoqqaat Siunnersuisooqatigiivisa ataatsimiittarnerminni immikkoortoq, utoqqalinersiallit Nuummi Nuup Bussiinik Nuup, Nuussuup aammalu Qinngutta akornanni atuisarnerannut tunngasoq eqqartortarpaat. Bussinut korti ullumikkut Nuummi utoqqalinersialinnut qaammammut 252 koruuninik akeqarpoq, ilisimaneqarporlu kommunini allani, soorlu Qeqqata Kommuniani, bussertarnermut tunngatillugu atugarissaarnerusut. Qeqqata Kommuniani utoqqalinersialinnut busserneq nal 08.00 – 16.00 akornanni akeqartinneqanngilaq, aamma nal 08.00 sioqqullugu aammalu nal 16.00 kingornatigut ilaanermut ataatsimut busserneq 6,00 koruuneqartinneqartarpoq. (bussimut billetsi akunneq ataaseq atuuttarpoq)

Utoqqaat Siunnersuisooqatigiivinit ilisimaneqarpoq Nuummiinnaq utoqqalinersiallit 900-t missaanniinnerat, Utoqqaallu Siunnersuisooqatigiivinit ilisimaneqarportaaq utoqqalinersiaqaleraanni aningaasat qaammammut naammattusaarneqarsinnaanerat ajornakusoorsisartoq.

Utoqqaat Siunnersuisooqatigiivisa Najukkami Ataatsimiititaliaq kaammattorumavaa misissorneqassasoq utoqqalinersiallit akeqanngitsumik bussersinnaanissaat imaluunniit Qeqqata Kommuniani atugassaritinneqartup assinganik periarfissaqarnissaa.”

Inassuteqaat

Inassutigineqarpoq:

  • Nuummi Najukkami Ataatsimiititaliamit saaffiginnissut ilisimatitsissutitut tiguneqassasoq

  • Nuummi Najukkami Ataatsimiititaliap akissuteqaatissatut siunnersuut akuerineqassasoq ilassutitalerlugu allanik oqaaseqaateqartoqarnissaanut

Allatseqarfimmiit oqaaseqaatit

Allatseqarfiup oqaatigissavaa, Nuup Bussiisa akigititaat Najukkami Ataatsimiititaliap aalajangiiffigisinnaasaasa avataaniimmat. Akeqanngitsumik utoqqalinersiallit bussertarnissaannik Utoqqaat Siunnersuisooqatigivisa siunnersuutaat Kommunalbestyrelsip susassaqarfianiippoq, taannalu saaffissaavoq eqqortoq, tassani kommunip ingerlatsineranut missingersuutinut tunngasut aammalu kommunip selskabiutaani allannguisoqarnissaanut siunnersuutinut tunngasunik suliaqartussaasoq.

Utoqqaat Siunnersuisooqatigiivisa malittarisassaanni §3 imm 3 naleqqiuguk, Utoqqaat Siunnersuisooqatigiivi sukkulluunniit Kommunalbestyrelsimut siunnersuuteqarnissaminnut periarfissaqartinneqarput.

Utoqqaat Siunnersuisooqatigiivinut akissuteqaateqarnissami pingaartinneqassaaq, Najukkami Ataatsimiititaliaq sammisassanut aamma utoqqarnut suliniutinut aningaasanik tapiissuteqartoqarsinnaanera periarfissaasoq aamma Najukkami Ataatsimiititaliamit Utoqqaat Siunnersuisooqatigiivisa, utoqqaat peqatigiiffiisa imaluunniit Nuummi utoqqaat aaqqissuussinernut, asiarnernut imaluunniit Nuummi utoqqarnut iluaqutaasumik aaqqissuussinernut aningaasanik qinnuteqaatit tigulluarneqartarnissaat. Akissuteqaatigineqartumi qinnuteqaateqartarnermi periutsit aammalu tunniussisoqartarnerani piumasaqaatigineqartut innersuussutigineqassapput.

Ilanngussat

1 Utoqqaat Siunnersuisooqatigiivisa ulloq 1 marsi 2019-imi saaffiginnissutaat

2 Nuummi Najukkami Ataatsimiititaliamiit akissutissatut siunnersuut

Aalajangiineq

Utoqqarnut siunnersuisooqatigiit saaffiginnissutaat ilisimatitsissutitut tiguneqarpoq akissutitullu allagaqaatissaq akuersissutigineqarluni.