Taasariaqartut allat

Mala Høy Kúko (S):

Kummiini piniartut aalisartullu eqalussuarnik ajornartorsiuteqarneq pillugu saaffiginnissutaat suli akineqarsimanngilaq. Tamanna akineqartariaqalerpoq, ullummi 100-t qaangiupput saaffiginnittoqarmalli.

Tasiilami puttasut?

Tasiilami umiarsualiviup itisilerneqarnissaa?

Asii C Narup: Apeqquteqaatit taakku allaffeqarfimmut apuunneqarunik pineqartut tamarmik aamma akineqarniassapput.

Thiioq Knudsen (S):

Mittarfittarnissaq Inatsisartuni akuersissutigineqarmat, NC-ip saavani Kommune pølsillerpoq. Taamatut nuannatsitsinermi Kommuneqarfik Sermersuumi illoqarfiit tamakkerlugit ilaatinneqartariaqarput.

Peter Davidsen (S):

Nuup Kangerluani saliinissaq kissaatigineqarpoq, kingullermillu WWF saliimmat naammassineqanngilaq. Taamatut nittarsaassineq atorsinnaanngilaq – kangerluk salinneqartariaqarpoq. Aalisartut piniartullu kiisalu peqatigiiffiit eqqortunik atortulerlutik saleeqataasinnaallutillu tassunga tunngasunik arlaatigut suleqataasinnaapput.

Aalisartunut piniartunullu suleqatigiissitaliortoqarnikuuvoq, qinikkatut atorfilittanut saaffiginnikkaangatta qisuariarfigineqarneq ajorpugut akineqarnerlu ajorluta.

Qujassuteqarneq: Kommune pitsaanerusoq pingaartumillu mittarfittaarnissamut tunngatillugu suleqatigiissimanermut partiinut tamanut qujanaq.

Ane Egede Mathæussen (S):

Aputaajaanermut tunngasumik saaffiginnissuteqarnerup akissuteqarfigineqarnissaa kissaatigaa.

Charlotte Ludvigsen (IA):

Ilaasortaaqatinnut tamanut borgmesterimullu suleqatigiinnitsinnut qujarusuppunga aamma Isumaginninnermut Suliffeqarnermullu Ingerlatsivimmi pisortartaatsinnut qujarusuppunga. Kiisalu tamanik juullisiorluaqqusillunilu ukiumut nutaamut iserluaqqusivoq.

Laura Táunâjik (S):

Tasiilami imigassamik tuniniaaviusartup nuunneqarnissaanik saaffiginnissutinnut killiffik pillugu paasisaqarusunnarpoq.

Ukiumut qaangiutilersumut suleqatigiilluarnermullu qujanaq, kiisalu juullisiorluarnissassinnik ukiumullu nutaamut iserluarnissassinnik kissaallusi

Randi Vestergaard Evaldsen (D):

Justus Hansen sinnerlugu partiinut tamanut suleqatigiilluarsimanermut qujassuteqarpoq, partiimik tunuliaqutarput avissaartuutiginagu pingaarnersiuisaratta. Allaffeqarfimmut oqalutsinullu qujanaq. Juullisiorluarisi ukiortaamullu iserluarisi.