Siulittaasumit nalunaarutit

2a.

  1. Ullumi 2019-imi maajip ulluisa 16-ianni ataatsimiinnermi oqaluuserisassani, kommunalbestyrelsimut ilaasortat siunnersuutaat piffissami aalajangersimasumi misiliutitut allaffeqarfimmit oqaaseqaateqarfigisarlugit aallartinneqarpoq. Taamatut iliortoqarpoq ilaasortat siunnersuutaat pitsaaninngortikkusullugit aammalu aallaqqaataaniilli allaffeqarfiup nalilersuisimanera nalunaarumallugu, taamaalillutik siunnersuutit ilaat kommunalbestyrelse inaarutaasumik aalajangiitinnagu oqaaseqaammik taperserneqartalissapput. Massakkut periusiusartoq sivitsortoortitsisarpoq aamma politikerit ilaasa naatsorsuutigisarpaat kommunalbestyrelse tapersiissuteqarmat taava siunnersuutitik piviusunngortinneqarlutik aallartinneqassasut, piviusorli unaavoq, allaffeqarfiup siunnersuut piviusunngortinneqarsinnaanersoq nalilersortarpaa tamatumalu kingornatigut Kommunalbestyrelsimit akuersissutigisassanngorlugu imaluunniit itigartitsissutigisassanngorlugu ingerlateqqinneqartarpoq. Siunnersuutilli amerlasuut aningaasartuuteqarfiungaatsiartarput, siunnersuutinullu aningaasanik immikkoortitsisoqarsimanngikkaangat tamanna imaappoq, siunnersuut allaffeqarfimmit piviusunngortinneqarsinnaanngitsoq. Kommunalbestyrelsip ataatsimiinneri arlalialunnguit qaangiuppata misiliineq naliliiffigineqassaaq.
  2. Kommuneqarfik Sermersuup DR2-p piviusulersaarutaani ”Byen hvor børn forsvinder”-imi suliap ineriartornera malinnaaffigaa kommunimiillu soorunami saaffiginnissutit piviusulersaarummit aallaaveqartut qisuariarfigissavai. Kommunalbestyrelsimit Tasiilaq pigisaalu qitiutittuarsimavarput taamaattorli suliassanik sullissinermi ingerlatsinerlussimaneq nassuerutigineqassaaq. Kommunalbestyrelsimiilli sapinngisarput tamaat aaqqiissutissanik ujartuivugut aaqqiissutissatullu siunnersuutigineqartut tamarmik tikilluaqquavut. Kommuneqarfik Sermersooq allannguisinnaasunik amerlanernik pisariaqartitsivoq.  Naqissuserneqassaaq Kommuneqarfik Sermersuumi ukiut qulit ingerlaneranni meeqqanut ikiortarialinnut aningaasaliissutinik ataasinnguamilluunniit itigartitsisoqarnikuunngimmat.  Ingammik Tasiilami immikkut arlalinnik suliniuteqarfiunikuuvoq. Suliassaqarfimmi sukumiisumik suliniuteqarnerit ilagaat makku: tarnip pissusaanik ilisimasalimmik aalajangersimasumik sulilersitsisoqarpoq, katsorsaasartoqatigiit angalasartut, inuusuttunut naartusunut suliniutit, sullissisartut angalasartut, Inuusuttut Illorsuaanik pilersitsineq Allorfillu suleqatigalugu najukkami atornerluisunut katsorsaavimmik ammaaneq. Kommunalbestyrelse Tasiilami annertuumik suliniuteqarput sunniutaalu aatsaat kingusinnerusukkut takuneqarsinnaalissapput. Borgmesteriugallartup piviusulersaarummi peqataasuusut Naasunnguaq Ignatiussen Streymoy aamma Rikke Blegevad piaarnerpaamik oqaloqatigalugit ataatsimeeqatigissallugit kissaatigisimavaa, tamannalu pilersaarnera ingerlanneqarpoq.
  3. Maajip arfineq-aappaanni 2019-imi Ministeriunerup Lars Løkke Rasmussenip Folketingimut qinersinissap pingasunngornermi juunip 5, 2019 ingerlanneqarnissaa nalunaarutigaa.
  4. Maajip qulingiluaanni Kalaallit Nunaani borgmesterit Nuummi kommunip allaffiani ataatsimoorlutik ataatsimiipput. Borgmesteriugallartoq ataatsimiinnermut peqataavoq.
  5. Maajip qulingani politikkikkut ataqatigiissaarisartoqatigiit Katuami Nuummi ataatsimiinnertik ingerlappaat. Borgmesteriugallartoq Kommuneqarfik Sermersooq sinnerlugu peqataavoq.
  6. Maaji 14. aamma 15. Nuummi Katuami Future Greenland ingerlanneqarpoq. Kommuneqarfik Sermersooq sinnerlugu Borgmesteriugallartoq borgmesterit allat (imaluunniit sinniissaat) peqatigalugit politikkikkut oqallinnermi peqataavoq  . 
  7. Maajip 20-ani Borgmesteriugallartoq  Peqqissutsimut Naalakkersuisumit, Martha Abelsenimit maajip 5. Qeqertarsuatsiaannut angalasimanerminut atatillugu paasissutissiiniarluni ataatsimiinnissamut qaaqqusivoq. Naalakkersuisup Qeqertarsuatsiaanni Nunaqarfinni Aqutsisut ataatsimeeqatigisimavai innuttaasunillu ataatsimiisitsimalluni. 
  8. Maajip 23-ani Borgmester sulinngiffeqareerluni uteqqissaaq.
  9. Maaji 28 aamma 29. Nunat Avannarliit Killiit illoqarfittut pingaarnersaasa aningaasaateqarfiani siulittaasut Reykjavikimi ataatsimiissapput, tassani aningaasaateqarfimmut qinnuteqaatit suliarissavaat aningaasallu 450.000 koruunit agguataassallugit.  Taakkunani siulittaasunut ilaasortat marluk atorfilittarlu peqataassapput.
  10. 2019-imi juunip ulluisa aappaanniit tallimaannut Tromsø Kommune Nuummut tikeraassaaq. Tromsø Kommuniata Oqaaseqartartua (borgmester) atorfilittani peqatigalugit Nuummut tikeraassaaq. Ulluni taakkunani pilersaarutit kingusinnerusukkut nassiunneqassapput.
  11. Ullut juunip qulingat aamma aqqarngat Kommuneqarfik Sermersuumi najukkami ataatsimiititaliat sisamaasut perngaammik najukkami ataatsimiititaliat ataatsimoorlutik ataatsimeersuartinneqarneranni katersuutissapput. Kommuneqarfik Sermersuumi najukkami ataatsimiititaliat ataatsimeersuartinneqartarnerat ukioq allortarlugu ingerlanneqartassaaq.