Qinnuteqaat – Ningyo Japanimi, Meeqqanut inuusanik isiginnaartitsineq

Qinnuteqaat – Ningyo Japanimi, Meeqqanut inuusanik isiginnaartitsineq

 

Najukkami Ataatsimiititaliaq juulip 30-anni, 2019-imi Meeqqanut tallimanut qulinullu ukiulinnut inuusanik isiginnaartitsinissamut tamatumunngalu atatillugu atuartunut allaanerusumik nutaaliortumillu inuusiortoqarsinnaanissaanik pilersitsinissamut ingerlatsinissamullu aningaasatigut tapiissuteqarfiginissamik qinnuteqaammik tigusaqarput.

 

Naatsorsuutigineqarpoq 2020-mi januaarimi Illorpumi 3-4-nik isiginnaartitsisoqassasoq. Isiginnaartitsinerit Nuummi 1-5 klassini atuartunut sammitinneqarput. Tassunga atatillugu ilaqutaariinnut isiginnaartitsisoqassaartaaq.

 

Katillugit 200.000 koruunit qinnuteqaatigineqarput.

 

Missingersuut qinnuteqaammi allassimavoq, tassani ima allassimasoqarmat:

“Isiginnaagassiami angakkuartartoq nunarsuami angalavoq nunanilu allani asanninnermik misigisaqarluni, Kalaallit Nunaanni naggueqarnini eqqaalerpaa. Isiginnaagassiami kulturit assigiinngitsuuneri kalaallisullu tunaartaqarneq takutinnissaa siunertarineqarpoq.

 

Isiginnaagassiaq Ujarneq Fleischerimit aamma Naleraq Eugeniusimit suliarineqarpoq.

Tassanilu isiginnaartitsisartoq Nukakkuluk Kreutzmann, nipilerisoq Hans-Ole Amossen kiisalu ilitsersuisoq/inuusiortoq Bruce Hunter Canadameersoq suleqatigineqassapput.

 

  1. ingerlanneqarnerani meeqqanut sammisaqartitsinermik aaqqissuuserusuppugut inuusiornermik inuusioriaatsimit nalinginnaasumit allaanerusumik ilinniartitsillutalu sanatitsilluta. Timi tamaat qanoq atorneqarsinnaanersoq misilittaavugut ulluinnarnilu atortut assigiinngitsut qanoq inuusaliarineqarsinnaanersut misilittaalluta. Sammisaqartitsineq inini atuartitsivinni ingerlanneqassapput, aggerluta meeqqanut sammisaqartsitsissaagut.”

 

Aningaasaqarnermut Allatseqarfimmit oqaaseqaatit

Eqqumiitsuliortunit teknikerinillu neriorsuutit allaganngorlugit pineqarput.

 

Meeqqanut Atuarfeqarnermullu Ingerlatsivimmit oqaaseqaatit:

Soqanngilaq

 

Kultureqarnermut immikkoortortaqarfimmit oqaaseqaatit:

Kultureqarnermut immikkoortortaqarfiup maluginiarpaa Kulturikkut Isumassarsiorfik atuarfinnut sullissiviusoq meeqqanut atuarfimmi atuartut eqqumiitsuliortut akilernissaannut aamma pinngorartitsinermik sammisassaqartitsinernut workshoppertitsinissamut neqerooruteqartarfiusoq. Inuusanik isiginnaartitsinermut tunngasunik workshoppertitsinissamut Kultureqarnermut immikkoortortaqarfik saaffigineqarsinnaavoq oqaloqatiginissaanut, taannalu Kulturikkut isumassarsiorfiup ataaniippoq, tassami suliniummi kulturikkut assigiinngitsuunermik oqaluttuarnissamut sammisitaammat suliarlu eqqumiitsuliornikkut nutaajulluni pissanganartupilussuuvoq.

 

Inassuteqaat

Inassutigineqarpoq:

– suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqaat

2. Missingersuutit

3. Suliniutip allaaserineqarnera (KAL)

Naleraq Eugenius suliamut attuumassuteqarnini pissutigalugu aalajangeeqataasinnaanani nalunaarpoq, inilu qimallugu.

 

Qinnuteqaat ilaannakortumik akuerineqassasoq siunertamullu 100.000 koruuninik tapiisoqassasoq aalajangerneqarpoq, oqaaseqaatigalugu suliniut atuarfeqarfinnut kiffartuussinermut Kulturimut nammattakkamut ilanngunneqarnissaa siunertaralugu Kulturimut Aaqqissuussinermullu immikkoortup suleqatigineqarnissaa qinnuteqartoq kajumissaarneqassasoq.