Qinnuteqaat – Meeraaffik, Nuummi Katersugaasivik

Qinnuteqaat – Meeraaffik, Nuummi Katersugaasivik

 

Najukkami Ataatsimiititaliaq juulip tallimanni 2019 Nuutoqqami / Nuummi Katersugaasivianit, Niels Lyngep illuani saqqummersitsinissamut, aningaasanik tapiiffigineqarnissamik qinnuteqaammik tigusaqarpoq. Katillugit 40.000 koruunit qinnuteqaatigineqarput.

 

Saaffiginnissummi ilaatigut ima allaqqavoq:

 

“Nunat Avannarliit Nuummi kulturisioqatigiinnerat 2019-imut atatillugu kingornalu suliniummi Nuummi innuttaasut peqataatinniarnissaat meeraaffillu pillugu eqqaasaqarnissaat saqqummersitsinermi siunertaavoq. Nuummi katersugaasiviit pingasut (Nuutoqaq/Nuummi Katersugaasivik, Nuummi Eqqumiitsulianik Saqqummersitsivik aamma Nunatta Katersugaasivia) Niels Egedep illua atorluarniarpaat illoqarfimmilu innuttaasut avataaneersullu angerlarsimaffimmi tassani allatulaaq misigisaqartinniarpaat.

 

Niels Lyngep Illua Gertrud Raskvej 24-miippoq, illulu eriaginartutut paarineqarsimavoq pisataqarlunilu 1950-ikkunneersunik, taakkulu piffissamut tassunga oqaluttuartuupput. Palasimit Niels Lyngemit illu pigineqarsimavoq. Illu qaliaqarpoq, ataaniippoq Niels Lyngep inai, qulaaniippullu saqqummersitsiviit, saqqummersitsivinnilu saqqummersitat taarserarneqarsinnaapput. Illu Nuutoqaq/Nuummi Katersugaasiviup akisussaaffigaa.

 

Ini allermi podcastimik aallakaatitsissaagut, tassani 50-ikkunni radiukkut aallakaatitsisut nipilersortullu Lisa Lynge Hesseldahlip (Niels Lyngep pania) illumi illoqarfimmilu meeraanerminik oqaluttuai ilanngullugit tusarnaarneqarsinnaassallutik. Nunat Avannarliit Nuummi kulturisioqatigiinneranni ini allermi oqaluttartoq aliannaartitsisorlu aallakaatinneqassaaq. Nunat Avannarliit Nuummi kulturisioqatigiinnerata kingorna podcast Nuutoqqami/Nuummi Katersugaasivimmi tusarnaarneqarsinnaasutut neqeroorutinut ilanngunneqassaaq (…)

 

Inimi qullermi Nuummiut pisatai, meeraaffik qulequtaralugu, ilanngullugit saqqummiukkusuppagut. (…) Pisatat tamarmik katersorneqarnerani oqaluttuartai ilanngunneqassapput, tassani meeraaffimmut sumut ilisarnaataanersoq, eqqaassutissaanersorluunniit takutinneqassaaq.

 

LARM Niels Lyngep Illuani saqqummersitsinerup saniatigut illoqarfimmi "kaajallaasitsilluni" plakatit suliniutitigullu saqqummiussissaaq, innuttaasullu illoqarfimmi inuillu Nuuk Centerimi Katuamilu workshoppertinneqarneratigut peqataatinneqarlutik. LARM-ip suliniutaani illoqarfimmi avatangiisit peqataatinniarneqartarput, peqataatitsinikkullu saqqummersitat ilusilersorneqartarput – tassa saqqummersitsinerusinnaapput, tamanut saqqummiussaasinnaapput allalluunniit.

 

Angissutsinut tamanut isersimmatinik alersersuarnilluunniit nuersaatitsissaagut pulaartunit atorneqarsinnaasunik (tassa skuut qaavisigut tungujortunik atisititsinata), taamaalilluta angerlarsimaffippalaartitsilluni piffissami tassani illumi saqqummersinneqartumut assingunerussammat. ”

 

Aningaasaqarnermut Allatseqarfimmit oqaaseqaatit

Nunat Avannarliit Nuummi kulturisioqatigiinnerat 2019-imut atatillugu Nuummi Najukkami Ataatsimiititaliaq tulliuttunut aningaasanik tapiissuteqarpoq:

 

– Nunat Avannarliit Nuummi kulturisioqatigiinnerat (angerlarsimaffeqanngitsunut tajat akeqanngitsut, kiisalu meeqqanut inuusuttunullu aaqqissuussat): 300.000 kr.

 

– Teater Freez Productions (Blokkini Narsarsuarmi isiginnaartitsineq): 200.000 kr.

 

– Nordisk Koncertkor (Nunat Avannarliit Erinarsoqatigiivi): 34.000 kr.

 

Ukioq 2019-imi Nunat Avannarliit Nuummi kulturisioqatigiinnissaat Kommuneqarfik Sermersuumit katillugit 800.000 koruuninik aningaasaliiffigineqarpoq.

Kommunip 2019-imut missingersuutaaniit 300.000 koruunit kiisalu Aningaasaateqarfik Sermeq aqqutigalugu 500.000 koruuninik immikkoortitsisoqarpoq.

 

Kulturimut Aaqqissuussisarnermullu Immikkoortortaqarfik

Kulturimut Aaqqissuussisarnermullu Immikkoortortaqarfimmit oqaatigineqarpoq, Nuup kulturikkut erlinnartuutaannik allanngortitsineq soqutiginaateqartoq. Suliniummi innuttaasut peqataatinneqarput, illoqarfimmi inuiaqatigiit sammisaqartinneqarput, peqataasullu tikeraartullu Nuummi angerlarsimaffiup qanoq ittuuneranik eqqarsalersinneqarlutik. Kulturimut Aaqqissuussisarnermullu Immikkoortortaqarfiup illoqarfimmi kulturikkut suliallit suliffeqarfiit amerlanerusut suleqatigiittarnissat kissaatigaa, tamannalu tunngavigalugu ataatsimut qinnuteqaat taperserlugu.

 

Inassuteqaat

Inassutigineqarpoq:

– suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqaat missingersuutitalik

Nivi Christensen aamma Ujammiugaq Engell suliamut attuumassuteqarnertik pissutigalugu aalajangeeqataasinnaanatik nalunaarput, inilu qimallugu.

 

Qinnuteqaat akuerineqassasoq aalajangerneqarpoq siunertamullu 40.000 koruuninik tapiissuteqartoqarluni oqaaseqaatigalugu, Nunat Avannarliit Nuummi kulturisioqatigiinneranit sivisunerusumik saqqummersitat ilaasa saqqummersinneqarnissaat assut pitsaasuusoq.