Qinnuteqaat – Kalaallisuunik meeqqanut sammisaqartitsineq,

Qinnuteqaat – Kalaallisuunik meeqqanut sammisaqartitsineq, Kittat, Illorput, Kulturikkut Isumassarsiorfiup aamma Nuup Katersugaasiviata (Nuutoqaq) suleqatigiissutaat

Nuummi najukkami ataatsimiititaliaq ullormi juuli 5-iani 2019-imi aningaasanik qinnuteqaammik tigusaqarpoq, tassanilu Nuup Katersugaasiviani suliniut “meeqqanut kalaallisuunik sammisaqartitsinermut” atatillugu ilaqutariinnut sisamariarluni isumasioqatigiisitsisoqarnissaa sammineqarluni.

 

Katillugit 10.000 kr.-nit qinnutigineqarput.

 

Qinnuteqaat ilaatigut ima allassimavoq:

 

”Kittat, Illorput, Kulturikkut isumassarsiorfiup aamma eqqumiitsuliortup Susanne Jensenip suleqatigiillutik kalaallisuut meeqqanut soqutigineqarnerulernissaat pillugu suleqatigiissutiginiarpaat. Meeqqat atuarfianni atuartut tamaasa peqatigalugit eqqumiitsuliornikkut kiisalu Nuutoqqami ilaqutariinnut isumasioqatigiisitsinikkut tamanna ingerlanneqassaaq.

 

2019-imi upernaakkut Kittat aamma Kulturikkut isumassarsiorfik Lene Augusta Olsen aamma Susanne Jensen siuttoralugit atuaqatigiiaat arlallit marriornermik eqqumiitsuliornermillu Illorpummi atuarfinnilu arlalinni sammisassaqartissimavaat.

Kalaallisuut meeqqanit soqutigineqarnerulernissaat tassani siunertaasimavoq, tassa meeqqanut soqutiginartumik sammisitsinikkut. Kajumilersitsiniarnermut tunngaviusimavoq pinngorartitsilluni sulinikkut meeqqallu peqataatillugit kalaallisuut qanoq isikkussai ilusissaalu ilisserusiortillugit.

 

(…) Pinngorartitsinermut sulineq Nuutoqqami / Nuup Katersugaasiviani nangeqqinneqassaaq piffissami oktobarimit novembarimut 2019-imi. Upernaaq sananeqarsimasut meeqqanit suleqataasimasunit nivinngarneqassapput. Piffissami aamma tassani meeqqat atuarfianni atuartunit suliaq nangeqqinneqarsinnaassaaq tassami atuaqatigiit najukkami katersugaasivimmi workshoppertinneqassagamik. Kulturikkut Isumassarsiorfimmi tamanna pissaaq. Meeqqat atuarfianni atuartut workshoppit uku peqataaffigisinnaassavaat:

 

  • Papmache atorlugu sapannganik angisuunik sanariarluni sapannganik ilusilersuilluni nuisineq nuilarmiorujussuarmik sananissamut atugassanik.

  • Avittat ilusissaannik sanariarluni avittarluni, taannalu takisoorujussuanngortinneqassalluni.

  • Puisit amisut, pappiaqqamut qalipariarlugit avittanik kusassarlugit imaluunniit sapannganik ilusilersuiffigalugit.

Aamma ilaqutariit katersugaasivimmut alakkaasinnaapput qulaanilu suliniutini pingasuusuni arlaannut suleqataasinnaallutik, taakkulu oktobarimi novembarimilu ingerlaassallutik. Ilaqutariinnut najukkami katersugaasivimmi workshoppertitsinissamut Nuummi Najukkami ataatsimiititaliamut aningaasat qinnutigineqarput.

 

Suliniut tamanoortuuvoq, tassa ilaqutariinnut aamma meeqqat atuarfianni atuartunut. Suliap sapernassusaa meeqqat ukiuinut naleqqussarneqassaaq.”

 

 

 

Allatseqarfimmit oqaaseqaatit
 

Kultureqarnermut immikkoortortaqarfimmit oqaaseqaatit
Kultureqarnermut immikkoortortaqarfiup erseqqissarusuppaa suliniutip tamanut ammasuunera. Eqqumiitsuliortunit taaneqartunit workshoppit taama ittut Kulturikkut isumassarsiorfimmi neqeroorutaasuni nuannarineqartorujussuupput. Taamaattoq atuartunit oqaatigineqartarpoq angajoqqaat ilagalugit workshoppit nangeqqikkusuttarlugit. Taamaammat meeqqat atuarfianni atuartunut Kulturikkut isumassarsiorfiup neqeroorutaanut uiggiutitut ilaqutariinnut workshoppertoqarnissaanut atugassanik qinnuteqaat tapersersorparput. Kommuneqarfik Sermersuup politikkia nutaaq ersarissoq tassaavoq ilaqutariinnut tamanut eqqumiitsuliornikkut pinngorartitsinikkullu sammisassaqartitsinerit pitsanngorsaavigissallugit suliniuteqarnissat.

Inassuteqaat

Inassutigineqarpoq:

– Nuummi Najukkami ataatsimiititaliap siunertamut atorneqartussanik aningaasanik tapiissutinik tunniussisoqassasoq.

 

Ilanngussaq
1. Qinnuteqaat aamma missingersuut

Qinnuteqaat akuerineqassasoq aalajangerneqarpoq oqaaseqaatigalugu taamatut annertussusilinnik qinnuteqaatit siunissami kommunip nammineq missingersuutaanit aningaasaliiffigineqarsinnaassassasut.