Qinngutsinni suliniut – Nuummi Najukkami Ataatsimiititaliaq

Qinngutsinni suliniut – Nuummi Najukkami Ataatsimiititaliaq

 

Nuummi innuttaasut, peqatigiiffiit kommunimilu qinikkat suleqatigalugit suliniutinik sammisassaqartitsinikkullu aallarnisaassapput najukkami ineriartorneq, ataqatigiinneq inuunerullu pitsaassusaa nukittorsarumallugu.

 

Qinigaaffiup ukiuni pingasuni sivisussuseqartup iluani (2018-2021), Nuummi Najukkami Ataatsimiititaliap innuttaasunut Nuup illoqarfittaani tamaginni iluaqutaasussanik suliniutinik pilersaarutinilluunniit annikinnernik aallarnisaanissamik anguniagaqarpoq. Najukkami Ataatsimiititaliap 2019-imi Qinngutsinni kusassaanissaq timi atorlugu sammisassaqarnermi silamilu periarfissat pitsanngorsarnissaat qitiutippaat.

 

  1. Najukkami Ataatsimiititaliap illoqarfiup ilaani allani 2019-imi suliniutinik aallartisaanginnissaanik sunniuteqarnavianngilaq, Qinngutsinnili pitsanngorsaaniarnermut suliniutit qitiutinneqartut innuttaasunik peqataatitsilluarnermik ilisarnaateqassapput.

 

Innuttaasunik peqataatitsineq
Najukkami Ataatsimiititaliap Qinngutsinni takorluukkanik siunnersuutinillu toqqaanissamut piviusunngortitsinissamullu sulissuteqarneq aallartisarlugu Qinngutsinni innuttaasunik ataatsimiititsiniarneq pilersaarutigaa 2019-imi aggustip naanerani ingerlatissallugu.

 

Innuttaasunik ataatsimiititsinermi innuttaasut najukkaminni suliniutinut peqataanissaannik najukkamilu oqartussaaqataanissaannik kajumissaarnissaat siunertarineqarpoq. Innuttaasut siunnersuutinut saqqummiunneqartunut ineriartueqqinnissaminnik peqatiserineqarput aammattaaq namminneq isumassarsiaminnik saqqummiinissamut peqiarfissaqassallutik. Taamaasilluni Qinngutsinni najugallit isumassarsianik ineriartortitassanut taperseeqataassapput tassuunalu najugaqartut pisariaqartitaannut aaqiissutissat matussusernissaat qulakkeerneqassalluni. Innuttaasut ataatsimiigiaqquneqarpata susassaqartut allat aggersarneqassapputtaaq, uani aamma ingerlatsiviit attuumassuteqartut, atuarfik, Brugseni aamma Pisiffik.

 

 

Tassunga atatillugu atuarfik suleqatigalugu atuaqatigiit toqqakkat sumiiffimmi sammisassaqartitsinermi periarfissanik amigaataannik imaluunniit sumiiffimmut takorluugaannik pisuttuartillugit titartaatinneqarsinnaapput/allattuitillugit. Titartakkat innuttaasunik ataatsimiititsinermi saqqummiunneqarumaarput.

 

Killiffik

Matuma ataani Najukkami Ataatsimiititaliap Qinngutsinni pitsanngorsaataasussanut/suliniutinut siunnersuutaasa killiffii allattorneqarput.

Siunnersuutit toqqarneqartut innuttaasut suleqatigalugit aggustip naanerani ataatsimiitinneqarneranni eqqartorneqassapput, siunnersuutit ineriartorteqqillugit.

 

Siunnersuutit tamarmik Najukkami Ataatsimiititaliap missingersuutaannit piviusunngortinneqarsinnaanngillat. Siunnersuutit kissaatigineqartullu Najukkami Ataatsimiititaliamit piviusunngortinneqarsinnaangippata, Najukkami Ataatsimiititaliap kommunimi ataatsimiititamut attuumassuteqartumut ingerlateqqissavai.

 

 

  1. Silami timilu atorlugu sammisassaqarnissamut periarfissat.

 

Siunertaq: Qinngutsinni silami timilu atorlugu sammisassaqarnissamut periarfissanik pitsanngorsaaneq.

SIUNNERSUUT

KILLIFFIK

Arsaattarfiup eqqaani pitsanngorsaaneq.

Målit tunuani ungaluliineq kiisalu qullersualiineq (Obs Najukkami Ataatsimiititaliap Nuussuarmi arsaatarfik ungalulernikuuaat aamma).

  • 2019-imi aningaasaliissutit sanaartugassamut immikkoortinneqarput. Ulloq 12, februaari 2019-imi aalajangiineq innersuussutigalugu.

 

  • Sanaartorneqarneri aallartereerput 2019-illu ukiaanerani naammassinissaat naatsorsuutigineqarluni.

Inuusuttut illuannik pilersitsinnissamut siunnersuutit.

Nuummi Najukkami Ataatsimiititaliaq 2019-imi marsip 12-ani Meeqqanut Atuarfeqarnermullu Ataatsimiititamut Qinngutsinni inuusuttut illoqalernissaanik pilersitsinissamut siunnersuuteqarluni allagaqaateqarpoq.

  • Saaffiginnissut Meeqqanut Atuarfeqarnermullu Ataatsimiititap 2019-imi aggustip arfernani ataatsimiinneranni suliarineqarnissaa naatsorsuutigineqarpoq.
  • Suliaq sumut killippa?

Skatertarfiup allilerneqarnissaa.

Skatertarfiup skate streetinngortillugu betonngimik allilernissaa . Ilaatigut sumiiffimmi basketkurviliinissaq imaluunniit assingusumik.

  • Illoqarfimmik Inerisaanermik Immikkoortortaqarfik: immikkoortoq pillugu nunaminertamik atugassiisoqanngilaq. Taamaattumik alliliinissaq periarfissaavoq.
  • Sanarfinermut Avatangiisinullu: akimik missingersuineq.
  • Peqqinnermut Sammisassaqartitsinermullu immikkoortortaqarfik peqataatinneqassaaq.
  • Siunnersuut aggustip naanerani innuttaasunut ataatsimiititsinermi/sammisassaqartitsinermi eqqartorneqassaaq/ineriartortinneqaqqissaaq. 2019

 

Pinnguartarfimmik/sukisaarsaartarfimmik sanaartorneq.

Qinngutsinni nunatat sukisaarsarfiit aattulernerup ernga peqqutaalluni masarsuusarpoq. Nunamut tullarfissanik assigisaanilluunniit ikkussuisoqarsinnaavoq "nuna toqunartuusaartillugu" pinnguarnermi atorneqarsinnaasunik. Aattornerup ernga sumiiffimmiit uninngaanartikkumanagu "kussiortoqarsinnaavoq", taakkua saniatigut pinnguarnermut aalanermullu atorneqarsinnaapput. Silaanakkoortaat il.il.

 

  • Sanarfinermut Avatangiisinullu Ingerlatsiviup immikkoortoq masarsuuallaartutut naleqqutinngitsutullu nalilerpaa. Nunap naqqanut tunngasut ajornakusoortuunera akimut sunniuteqassaaq. Akitut missiliuunneqarpoq minnerpaamik 1 mio koruunit.
  • Peqqinnermut Sammisassaqartitsinermullu immikkoortortaqarfik peqataatinneqassaaq.
  • Illoqarfimmik Inerisaanermut Immikkoortortaqarfik peqataatinneqassaaq. Immikkoortumi AHL-p kangianiittumi nunaminertamut atugassiisoqanngilaq.
  • Siunnersuut 2019-imi aggustip naanerani innuttaasunik ataatsimiititsinermi/sammisassaqartitsinermi ineriartortinneqaqqissaaq.

 

 

Sikkilinut nunakkoortaatilinnut ujaraaqqanik aqquserniorneq (playground).

Ujaraaqqanik aqquserniorneq/playground soorlu sikkilinut nunakkoorsinnaasunut – ukiumi qamutinik sisoorfissatut atorneqarsinnaavoq.

 

 

  • Sanarfinermut Avatangiisinullu Ingerlatsiviup immikkoortoq masarsuuallaartutut naleqqutinngitsutullu nalilerpaa. Nunap naqqanut tunngasut ajornakusoortuunera akimut sunniuteqassaaq. Akitut missiliuunneqarpoq minnerpaamik 1 mio koruunit.
  • Peqqinnermut Sammisassaqartitsinermullu immikkoortortaqarfik peqataatinneqassaaq.
  • Illoqarfimmik Inerisaanermut Immikkoortortaqarfik peqataatinneqassaaq.
  • Siunnersuut 2019-imi aggustip naanerani innuttaasunik ataatsimiititsinermi/sammisaqartitsinermi ineriartortinneqassaaq.

 

Ikumatitsivissamik issiavissanillu pilersitsineq (soorlu ujaqqanit qiperukkanik).

 

  • Akimut 250.000 koruunit missiliuutigineqarput.
  • OBS: ingerlatsinermi aserfallatsaaliuinissamut aamma ikumatitsiviup saligaatsuutinneqarnissaanut aningaasartuuteqarnissaq ilanngunneqassaaq

 

 

 

  1. Illoqarfiup qeqqanik kusassaaneq (Pisiffiup Brugsenillu akornanni)

 

Siunertaq: Illoqarfiup qeqqata ataatsimoorfinngornissaa kiisalu atorneqarsinnaanngornissaa innuttaasuniillu avatangiisigissaartutut orniginartuunissaa.

SIUNNERSUUT

KILLIFFIK

Issiaartarfinnik/isikkivilinnik ilioraaneq.

Illoqarfiup qeqqani Pisiffiup Brugsenillu akornani qaarsunnguup qaavani issiaartarfik.

 

Materielgården saaffigineqarpoq, issiaartarfimmik eqqaavimmillu ilisisoqarumaarpoq.

Illoqarfiup qeqqani biilinik uninngasoqarnissaanik pinaveersaartitsineq.

Illoqarfiup qeqqani biilinik uninngasoqannginnissaa anguniarlugu ujaqqersuineq.

Materielgårdi attavigineqarpoq taakkulu isumagissavaat.

Issiavissat/illoqarfimmi pisattat.

Illoqarfiup qeqqani ”illoqarfimmi pisattanik” imaluunniit issiavissanik pilersitsineq soorlu najukkami eqqumiitsuliortut/sanaluttartut, sumiiffimmi meeqqat/miniklubbi, sanaartornermi peqataatinneqarsinnaapput.

Pisiffik Brugsenilu peqataanissamut aggersarneqassapputtaaq.

 

  • Najukkami Ataatsimiititaliap nammineq missingersuutaanit matussuserneqarsinnaavoq.
  • Illoqarfimmik inerisaanermut immikkoortortaqarfik suliniummut peqataatinneqarpoq.
  • Siunnersuut 2019-imi aggustip naanerani innuttaasunik ataatsimiisitsinermi/sammisassaqartisinermi ineriartortinneqaqqissaaq.

Illoqarfiup qeqqani eqqumiitsuliat.

Eqqumiitsuliat illoqarfiup qeqqani kusassaatassapput. Eqqumiitsuliat ilaatigut qaqqamut qiperugaasinnaapput.

  • Najukkami Ataatsimiititaliap nammineq missingersuutaanit matussuserneqarsinnaavoq.
  • Illoqarfimmik inerisaanermik immikkoortoqarfik aamma Kultureqarnermut Immikkoortortaqarfik akuutinneqassapput
  • Siunnersuut 2019-imi aggustip naanerani innuttaasunik ataatsimiitsitsinermi/sammisassaqartisinermi ineriartortinneqaqqissaaq.

 

Illoqarfiup qeqqani aaqqissuussineq.

Illoqarfiup qeqqani ukiup qanoq ilinera malillugu pikialaartitsineq, juullilernerani niuffatsitsineq assigisaanillu aaqqissuussineq.

Ukiuni tulliuttuni ataavartumik sammisassaqartitsineq.

 

 

 

 

Aningaasaqarnermut Allatseqarfimmit oqaaseqaatit

  1. maluginiarneqarpoq, Qinngutsinni suliniutiginiarneqartut ingerlatsivinnik attuumassuteqartunik ataavartumik peqataatitsinikkut aamma siunnersuutinik isumassarsianillu pitsaasutsimik qulakkeerinikkut suleqatiginissaat qitiutinneqartoq, kiisalu suliniutit ataqatigiissaarneqarnissaat suliniutigineqartoq kommunillu sumiiffimmut pilersaarutaanut Najukkami Ataatsimiititaliallu siunnersuutaat ataqatigiissinneqartut.

 

Najukkami Ataatsimiititaliami ilaasortat aalajangersimasut Qinngutsinni suliniutinut tunngatillugu allatseqarfimmut attaveqartatussanik toqqaasimavoq:

 

  • Illoqarfiup qeqqanik pitsanngorsaaneq kusassaanerlu: Nivi Christensen aamma Aviaq Brandt

  • Silami silamilu sammisassaqartitsineq: Jutho Wilche, Arnarissoq Fleischer aamma Nadia Olsen

     

    Allatseqarfiup inuit qulaani pineqartut peqatigalugit juunip 19-iani 2019-imi Illoqarfimmik Inerisaanermi Immikkoortortaqarfik ataatsimeeqatigaa. Ataatsimiinnermi kommunip sumiiffimmut piffissamut ungasinnerusumut pilersaarutai, nunaminertamik atugassiinermut, inatsisitigullu eqqumaffigisassat pillugit Najukkami Ataatsimiititaliap suliniutinik aallartisaannginnermini innuttaasunillu ataatsimiitsitsinnginnerani naatsorsuutigisaanut ataqatigiissaarinissaa siunertaavoq.

     

    Aggustip naanerani 2019-imi innuttaasunik ataatsimiitsitsisoqareerpat allatseqarfimmiit ataatsimiitsitanut attuumassuteqartunut kommunalbestyrelsimullu ilisimatitsissummik suliaqarumaarpoq.

    Ingerlatsivinnit allaniit oqaaseqaatigineqartut

 

Sanarfinermut Avatangiisinullu Ingerlatsivik:

 

Skatertarfiup allilernissaa basket-imilu ajuuffissaq koori.

kr 150.000,-. Annikitsumik nunagissaasoqarsinnaavoq aamma beton-imik assigisaanilluunniit karsiusalianik pisisoqassaaq.

 

Ikumatitsivik.

Immikkoortoq annikitsoq immerneqarsinnaavoq manissarneqarnilu kr 250.000,- atorlugit

Ingerlatsinermi aserfallatsaaliuinissamut aamma ikumatitsiviup saligaatsuutinneqarnissaanut aningaasartuuteqarnissaq ilanngunneqassaaq.

 

 

Immikkoortoq AHL-p kangianiittoq (Pinnguartarfik sammisassaqartitsivillu) pillugu kissaatigineqartumut tunngatillugu, erseqqissumik siunnersuuteqarnissaq pisariaqartinneqarpoq, inissisimaffissaa aamma qanoq annertutiginera kiisalu nunap naqqanut tunngasunik misissuineq. Immikkoortoq masarsuuallaarpoq naleqqunnanilu. Nunap naqqanut tunngasut ajornakusoortuunera akimut sunniuteqassaaq

 

Qinngutsinni pinnguartarik aamma/imaluunniit sammisassaqartitsivik.

Kusserngit, ujarattalersuinerit allallu immikkoortumut atorneqartussat minnerpaamik kr 1,0 mio naleqassapput.

(Pinnguartarfik napasuliartalik, qassutitalik sisooraartarfilillu, ikkussuunnera ilanngullugu, kr 200.000,- missiliorlugit akeqarpoq)

 

Qinngutsinni bane ujaraaralik/pinnguartarfik.

Mountainbikertarfik naammattumik angissusilik minnerpaamik 1,0 mio koruuninik akeqassaaq

 

Illoqarfimmik inerisaanermut immikkoortortaqarfik:

Siunnersuutit Qinngutta najorfigiuminartuutillugu ineriartortinneqarnissaanut pilersaarummut naapertuuttuupput. Suliniuteqarfigineqartussatut toqqarneqartut tunngavilersorluakkanik siunnersuusiorfigineqarnissaat innersuussutigineqarpoq, suliarineqarnissaannut tunngaasut misissorneqarsinnaaqqullugit. Immikoortoqarfimmit Najukkami Ataatsimiititaliaq sanaartugassatut pilersaarutit ilisimasalinnit siunnersorteqarluni suliarinissaannut aningaasanik pingaarnersiornissaa siunnersuutigineqarpoq. Illoqarfiup kusassarneqarnissaanut atatillugu immikkoortoqarfiup innersuussutigissavaa, kultureqarnermut immikkoortoqarfik akuutissagaa, taamaalilluni qaffasissumik pitsaassuseqarnissaa qulakkeerneqassammat.

 

Meeqqanut Atuarfeqarnermullu Ingerlatsivik:

Peqqissutsimut Sunngiffimmullu immikkoortumit Qinngutsinni suliniutigineqartut pilersaarutigineqartullu tapersersorneqarput.

Aammali Nuussuarmi sammisassaqartitsivissamik suliniut aallartisarniarneqalerpoq, tassani aqqusineeraliortoqassaaq. Sammisassaqartitsivimmut tassunga Nuussuup Manngua atuarlugu atortoqartitsisoqarnissaa isumaavoq. Neqeroortitsisoqareernerata kingorna akit neqeroorutaasut qaffasippallaarnerat pissutigalugu atortussanik pisinissamut aningaasassaqartoqanngilaq. Tamannalu suliniutigineqartup 100 %-imik naammassineqarnissaanut ajornartitsivoq. Tamakkiisumik isigissagaanni, najukkami ataatsimiititaliap suliassamik kivitseqataasinnaanera immaqa iluaqutaassagaluarpoq.

 

Allatseqarfimmiit innersuussutit

Ingerlatsiviit attuumassutillit oqaaseqaataat malillugit allatseqarfiup innersuussutigivaa:

 

  • Najukkami Ataatsimiititaliap nammineq atorsinnaasaasa iluini suliniutit piviusunngortinneqarsinnaasut Najukkami Ataatsimiititaliamiit pingaartillugit aallunneqassasut, illoqannginnersap pitsanngorsaavigineqarnissaa, skatertarfiup allineqarnissaa kiisalu ikumatitsisarfiliortoqassappat ikumatitsivissaq ilanngullugit

  • Innuttaasunik aggustip naanerani ataatsimiititsinissami qulaani siunnersuutit taaneqartut taakkulu ineriartortinneqarnissaat kisimik pineqassasut

  • Immikkoortumi AHL-p kangianiittumi kissaatit siunnersuutillu (pinnguartarfik, mountainbikertarfik sammisassaqartitsivillu) suliaralugit ingerlateqqinneqassasut kingornalu immikkoortumut siunnersuutit politikkikkut ataatsimiititanut susassaqartunut ingerlateqqinneqassasut.

  • AHL-imi atuartunik suleqateqarnissaq pilersinneqassasoq, atuarfiup kangiani immikkoortumi silami suut pilersinneqarnissaannut isumassat pillugit.

Inassuteqaat

  • Nuummi Najukkami Ataatsimiititaliamit Qinngutsinni suliniutit aallartinneqartussat eqqartorneqassasut

     

Ilanngussat

Qinngutsinni sumiiffiup nalunaarsorneqarnera.1

Qinngutsinni suliniutinut tunngatillugu piffissaq ungasinnerusumut pilersaarutit suliniutillu piffissami qaninnermi aallartissinnaasut immikkoortinnissaat aalajangerneqarpoq:

 

  1. Suliniutit tassungalu atatillugu suliassat 2019-imi aallartinneqartussat:
  • Ulloq 15. septembari 2019-imi illoqannginnersami sammisaqartitsineq (pisiniarfeeqqat, nerisassat, Najukkami Ataatsimiititaliap siunnersuutaannik saqqummersitsineq/takutitsineq, innuttaasut illoqarfiup immikkoortuani iluarsiissutaasinnaasunik siunnersuutinik saqqummiussisinnaapput)
  • Illoqannginnersami qaqqap ilaani atuinissamut tunngatillugu eqqumiitsuliortunik aamma/imaluunniit ujaqqanik qiperuisartunik attaveqarneq
  • Pisussaq pillugu illoqarfiup immikkoortuani innuttaasunik attaveqaqateqarneq
  • Atuarfiup siulersuisuinut, atuarfimmut, miniklubimut, Brugsenimut allanullu suliaqartunut attuumassuteqartunut allakkat
  • Ingerlatsivinnik attuumassuteqartunik ataqatigiissaarineq
  • Skatertarfiup allilernissaanut ikumatitsivimmillu/shelterimillu pilersitsinissamut siunnersuutit – taakkununnga tunngatillugu illussanik titartaasartunik attaveqarsinnaaneq
     
    Siuliini pineqartunut 2019-imi amerlanerpaamik 500.000 koruuniunissaat akuersissutigineqarput.
     
    Allatseqarfik Najukkamut Ataatsimiititaliami suleqatigiit sulianik naammassinninniarnerannut ikiuutissaaq.
     
  1. Piffissamut ungasinnerusumut pilersaarutit iliuuserisinnaasallu:
    AHL-ip kangiani, Ukkusissat ataanni nunap naqqanut tunngasunik misissuinermut suliniuteqarnissamullu piukkunnarnersoq kiisalu silamiittarnissaq siunertaralugu sanaartornissamut pilersaarutaasinnaasut pillugit silamilu sammisassaqartitsinissaq (mountainbikertarfik, playground, qamutinik sisorarfik il.il.) pillugu immikkoortumik misissuineq. 

 

Tamatumunnga ilanngullugu atuarfiup miniklubillu eqqaani biilinut inissiisarfiit pitsaanerusut kiisalu Arsiarpap, Musap Uiffallu akornanni pinnguartarfeeqqat ujartorneqarput.