Namminersorlutik Oqartussat nutaatut siunnersuutaat: Aalisarneq pillugu Inatsisartut inatsisaat nr. xx, xx. xxx 2017-imeersoq pillugu tusarniaammut akissut

Inassuteqaatit ikannerussuteqartunit ukuusunit, Inuit Ataqatigiit aamma Demokraatit, akuerineqarput imannak oqaasertalerlugit:

Kommuuneqarfik Sermersuumi Aningaasaqarnermut Inuussutissaqarnermullu Ataatsimiititap qaqutigoortorujussuartut isigaa inatsimmut siunnersuummi nassuiaataanni inatsisip kingunissai taakkartorneqarsimammata, taakkulu kingunissat inatsisip siunertaanut akerliliilluinnarmata. Assersuutigalugu inatsisip oqaasertaani § 2-mi allaqqavoq: Inatsimmik aqutsinermi pingaartinneqassapput: inuiaqatigiinni, aalisarnermik inuussutissarsiutilinni, aalisakkerinermi suliffissuarni inuussutissarsiutinilu taakkununnga atasuni allani aningaasaqarnerup inuuniarnikkullu atukkat isiginninniarneqarnissaat (imm. 3).

Taama allaqqasoqaraluartoq inatsimmut siunnersuutip nassuiaatitaani inatsisip aningaasaqarnermut kingunissai annertuut nassuiarneqarsimapput. Pisortanuinnaq isertitassat ukiumut 130 mio.kr.-inik annikillissasut ersarissarneqarpoq. Kisitsisillu taakkua qulakkeeqqanngitsut nassuiarneqarlutik. Tassuunakkut skatteertarnikkut isertitassat annikilleriassasut aamma ilaavoq, kommuuninut aamma, aammalu Royal Greenlandip isertitassai appariassallutik.

Inatsimmut siunnersuutip tunuartinneqarnissaanut Kommuneqarfik Sermersuup allaffeqarfianit innersuut Aningaasaqarnermut Inuussutissaqarnermullu Ataatsimiititami ikannerussuteqartut taperserpaat, aammalu nutaamik inatsimmut siunenrsuusiortoqarnissaa inuiaqatigiinnut aningaasaqarnikkut naliliinertalimmik aamma taperserlugu.

Inassuteqaatit ikinnerussuteqartunit ukuusunit, Siumut, akuerineqanngillat, ikinnerussuteqarlutillu imannak oqaaseqaateqarlutik:

Kommuneqarfik Sermersuup misilittagaqarfigingilaa sinerissap qanittuani raajarniarneq, taamaattumik Siumut-miit isumaqarpugut sinerissap qanittuani raajarnialerneq nunamut iluaqutaasussaq, suliffissaqartitsinikkut aammalu inuttaqarnikkut, isertitassatigut innuttanut amerlanernut iluaqutaassaaq.

Isumaqarpugut Skatte-tigut isertitassat annertuut tassanniittut.

Massakkumut piginnittut marluinnaat avataasiorluni raajarniartut annaasassaat aamma taamak annernartiginavianngitsut, tassami pisassat %-miningui kisimik pineqarmata.