Nalunaarutit

2a. Siulittaasumit nalunaarutit
2b. Ataatsimiititanik ataavartunit nalunaarutit

2a.

  1. Inuusuttut Kommunalbestyrelsiata (Inuusukombest) ukiumoortumik ataatsimiittarnera ulloq 10. februaarimi digitalimik ingerlanneqarpoq. COVID-19 pissutaalluni ataatsimiinneq digitalimik ingerlanneqassasoq ukioq kingulleq aalajangiunneqarpoq.
    Inuusuttut Kommunalbestyrelsiata ataatsimiinnerat ingerlalluaqaaq, tassanilu InuusuKombest Kommunalbestyresimut arfineq-marlunnik innersuussutiminnik toqqaapput, taakku ataatsimiinnerup naammassinerani inuusuttut nammineerlutik kommunalbestyrelsimut tunniussaminnik.
    Borgmesteri Inuusuttuut kommunalbestyrelsiata innersuussutaasa qanoq ingerlariaqqinnissaanut manlinnaanissani qilanaaraa.
  2. Februarip qulingani kommunip peqqinnissaqarfimmik suleqateqarnera pillugu borgmesterip Peqqissutsimut Naalakkersuisoq ataatsimeeqatigivaa.
  3. Februarip qulingani borgmesteri Kommuneqarfik Sermersooq sinnerlugu Arctic Mayors Forumip (AMF) ukiumoortumik ataatsimeersuartitsinerani peqataavoq. AMF-ip suleriaasissaa ataatsimiinnermi akuersissutigineqarpoq Kommuneqarfik Sermersoorlu AMF-ip allatseqarfianut ilanngulluni.
  4. Februaarip ulluisa 25-anni Nuuk Imeq ataatsimeersuarpoq. Kuupik Kleist siulersuisuni siulittaasutut qinigaaqqippoq. Ingerlatseqatigiiffik 49,5 mio koruuninik sinneqartoortoq ukiumut naatsorsuutit takutippaat. Kommune 18 mio koruuninik iluanaarutinik pissarsissaaq.
  5. Borgmesterip ulluni marsip pingajuanniit arfernannut Tasiilamiinnissani pilersaarutigivaa.  Borgmesterillu ulluni marsip 16-iannit 18-iannut Paamiuniinnissani pilersaarutigaa.
  6. Imaani qassutikunik saliinissaq pillugu aalisarnermut peqatigiiffimmit "Neqitaq"-mit borgmesterimut saaffiginnittoqarpoq. Ajornartorsiut kommunimit ilisimaneqarpoq assigiinngitsutigullu suliniuteqarfigineqalereerluni. Tamanna pillugu Sanarfinermut Avatangiisinullu Ataatsimiititamut saqqummiisoqarumaarpoq.
  7. Namminersorlutik Oqartussani Nunamut Namminermut Immikkoortortap kommunitut nammineq ingerlasutut misiliinissamik kommunit kissaateqarnerannut noqqaassuteqarluni kommunalbestyrelsinut tamanut allagaqaateqarpoq. Kommunit akissuteqarnissaannut 2021-mi aggustip ulluisa aallaqqaataannut killilerneqarput. Suliap kommunalbestyrelsimi 2021-mi upernaap ingerlanerani oqaluuserineqarnissaa naatsorsuutigineqarpoq.
  8. Nuuk City Developmentip (NCD) ingerlatseqatigiiffiit sisamat Nuummi marlunnik sullorsualiornissamut neqerooruteqarsinnaasutut akuerisimavai. Nuussuarmi sullorsuup pioreersup allilerneqarnissaanut kiisalu Qinngutta aamma Siorarsiorfiup akornanni nutaamik sullorsualiornissamut neqeroortitsinermut pisussamut atatillugu, ingerlatseqatigiiffiit Danmarkimeersut, Savalimmiuneersut, Islandimeersut Tjakkiameersullu neqerooruteqarsinnaasussatut piukkunneqarput. NCD-mi pisortaq ilisimatitsivoq, sullorsualiassat 2021/22-imi ukiup nikinnerata nalaani aallartinneqarnissaat naatsorsuutigineqartoq.

2b.

Uju Petersen, Meeqqanut Ilaqutariinnullu Ataatsimiititami siulittaasoq:

  1. Tasiilami Inuusuttunut Sullissivik, meeqqanik inissinneqarsimasunik peqareermat maanna qimarnguimmi pioreersumi aallartinneqarpoq. Forstanderimik, immikkoortortaqarfimmi aqutsisumik kiisalu perorsaanikkut suliaqartunik atorfinitsitsisoqarpoq. Namminersorlutik Oqartussat Prs. Margrethep meeqqanut angerlarsimaffiani illut tamarmik tiguneqarnissaat siunnersuutigaat, suliniutillu naatsorsuutigisamit annertunerussammata ataatsimiititami ataavartumi saaffiginnissut oqaluuserineqassaaq.
  2. Toqqissisimanissaq pillugu angalaaqatigiit; sapaatip-akunnera kingulleq, marlunnik biililerlutik sisamanillu sulisoqarlutik aallartipput. Ulluinnarni unnuit tamaasa nal. 20.00-imiit 02.00-imut ingerlaartarput, weekendinilu 04.00 tungaanut

Inge Olsvig Brandt, Suliffeqarnermut Isumaginninnermullu Ataatsimiititami siulittaasoq:

  1. Suliffeqarnermut Isumaginninnermullu Ingerlatsiviup angerlarsimaffimmi ikiortit, tulleriissaarisartut, puigortunngortunut ataqatigiissaarisartut, peqqinnermut tunngasunik ataqatigiissaarisoq angerlarsimaffimmilu peqqissaasut ataatsimuulerlutik Magasinikumut nuunnissaat nalunaarutigerusuppaa.  Taakku init utoqqarnut suliassaqarfiit immikkoortortaqarfii assigiinngitsut qitiusumut inissisimanerat ataatsimoornerulersissavaat. Ilaatigut qanigisaasut siunnersorneqarsinnaallutik aqqutissiuunneqarsinnaallutillu sulisut attavigeriaannaalissavaat.

Justus Hansen, Sanarfinermut Avatangiisinullu ataatsimiititami siulittaasoq:

  1. Tasiilami Vikings-it akiliisinnaajunnaarmatali aputaajaasarneq kommunimit ingerlanneqalerpoq. Maanna aputaajaasarnerup ilaa namminersortunut suliariumannittussarsiuullugit aallarnisarneqalerpoq, tamannalu pillugu ingerlatsivik suliaqartartunit marlunnit, misiliutitut qaammatini marlunni illoqarfimmi immikkoortumi ataatsimi aputaajaasussanik, matoqqasumik neqerooruteqartitsivoq.
  2. Ingerlatsivik maannamut marloriarluni Paamiuni immikkoortortami aqutsisumik sulisussarsioreerpoq. Marloriarlunilu iluatsitsinani. Suli atorfik inuttalerneqarusummat piaartumik nutaamik allagarsiusseqqittoqassaaq.
  3. Taamaattorli Pilersaarusiornermut Immikkoortortaqarfimmut sulisunik marlunnik atorfinitsitsiniarneq iluatsissimammat maanna sulisut sisamaapput. Taamaattorli piukkunnaatilinnik teknikimut tunngasunik suliaqartunik atorfinitsitsiniartarneq unamminartuusoq oqaatigineqartariaqarpoq. Piukkunnaatilituannguit maanna inuussutissarsiortuni namminersortuni, akissarsiagissaartitsinerusuni, atorfeqarput.

Michael Rosing, Meeqqanut Atuarfeqarnermullu Ataatsimiititami siulittaasoq:

  1. Ingerlatsiviup Tasiilami Ittoqqortoormiinilu atuarfinnik nakkutilliinerit naammasseqqammerpaat, Ittoqqortoormiini aamma meeqqerivinnik nakkutilliineq suliarineqarpoq.