Nalunaarutit

2a. siulittaasup nalunaarutai

2b. ingerlatsiviup nalunaarutai

2a. 

1. Pissarsiaqarfigingaakkatsinnik Ippiarsummi ataatsimiippugut, Aka Motzfeldt peqataavoq, taannalu utoqqaat sullinneqartarnerannut periutsinik, iliuutsinik sulinermilu atugassanik pitsaasunik tunniussaqarsimavoq. 

2. Innuttaasut akornanni angerlarsimaffeqanngitsuuneq assut ukkatarineqarpoq. TV-kkut aallakaatitassiaqarpoq, taannalu ulluni tulliuttuni takutinneqassaaq, kiisalu radiukkut aallakaatitsisoqarluni. Issinnerani angerlarsimaffeqanngitsut assut ilungersorsimapput, ajornartorsiullu tamanna maannamiit annertunerusumik misissuiffigissavarput. Angerlarsimaffeqanngitsunut sulinitsinni periutsivut allanngorsimapput unammillernarsinnaasut allat ukkatarineqarmata. Tassunga atatillugu ajornartorsiutit maajimi ataatsimiinnitsinni oqaluuserineqassapput, pilersaaruterpullu sukannernerusumik suliarissavarput. 

2b. 

Utoqqarnut tunngasut

1. Ippiarsuk nutaamik aqutsisortaarpoq

Aka Motzfeldt Ippiarsummi aqutsisutut sulilerpoq Aka Motzfeldt peqqissaasutut 1996-imiillil ilinniagaqarpoq, 2016 –imilu stresscoach –itut ilinniaqqissimalluni.

Kommune Kujallermi utoqqaat illuanni Ajarsivasimmi tullersortitut 2015 –imiit 2017 –ip tungaanut atorfeqarsimalluni, taassuma kingorna 2017 –imiit 2019 –ip tungaanut aqutsisuugallartutut atorfeqarsimalluni.

2. Qeqertarsuatsiaani utoqqaat ornittagassaat pillugu killiffik.

Qeqertarsuatsiaani ornittagassaat nutaaq B-1147 februaarip qiteqqunnerani 2020-mi ammartussatut naatsorsuutigineqarpoq. Illu B-1147 Qeqertarsuatsiaani utoqqaat siusinaartumillu soraarnerussutisialinnut ornittagaassaaq, qalianilu mersortarfiussalluni.

Oqartussaaffeqarfik

3. Angerlarsimaffeqanngitsut aamma inuttut atugarliortut pillugit ataatsimeersuarneq

Februaarip 26-ianni 2020 Isumaginninnermut Inatsisinillu Atuutsitsinermut Naalakkersuisoqarfik angerlarsimaffeqanngitsut inuttullu atugarliortut pillugit ataatsimeersuartitsissaaq. Ataatsimeersuarnermi ilaatigut isumaginninnermi neqeroorutit aammalu angerlarsimaffeqanngitsunut inuttullu atugarliortunut inissat qitiutillugit sammineqassapput.

Inunnut innarluutilinnut aamma tarnimikkut innarluutilinnut tunngasut

4. Inunnik isumaginninnerup iluani nakkutilliineq pillugu Nalunaarutissatut siunnersuut pillugu  Tusarniaanermi akissuteqaat

Inuit innarluutillit pillugit inatsimmut nutaamut atatillugu, inunnik isumaginninnerup iluani nakkutilliineq pillugu Naalakkersuisut nalunaarusiorput.

Nalunaarummi piumasaqaatigineqarpoq inunnut tunngasunik aammalu najugaqatigiiffinnik, utoqqaat illuinik sulisoqarfinnillu nakkutiginninneq annertusineqassasoq.

Tamanna pillugu ataatsimiititaq annertunerusumik ilisimatinneqarumaarpoq, nakkutiginninnermi suliassaq kommunip qanoq ililluni suliariniarneraa aalajangiiffigineqareeriarpat.

5. Pakkutami aqutsisoq nutaaq

Louise Olsen Pakkutami aqutsisutut nutaatut atorfiinippoq. Louise Olsen 2011-mi peqqissaasutut ilinniakkaminik naammassinnippoq, aammalu Nakorsiartarfimmi/Ajoqusersimasunut nakorsiartarfimmi, Pilattaaviup immikkoortortaqarfiani aammalu Dronning Ingridip Napparsimmavissuani/Ajoqusersimasunut nakorsiartarfimmi assigiinngitsunik atorfeqartarnermini ilinniartitsinermik sulisunillu inerisaanermik misilittagaqalersimalluni.

6. Inuit innarluutillit pillugit inatsit nutaaq pillugu sullissisunik pikkorissartitsineq

Piffissami aggersumi kommunimi sullissisut inuit innarluutillit pillugit inatsip nutaap piumasaqaatit suliassallu pillugit piareersarnissaannik pikkorissartinneqassapput. Suliffeqarnermut Isumaginninnermullu Ingerlatsivik sullissisunik ulloq ataaseq pikkorissaaniarpoq feb 19-ianni 2020, tassungalu atatillugu Isumaginninnermut Aqutsisoqarfik feb 4-7 2020 pikkorissartitsinissamik aaqqissuussaqarpoq. (

7. Arctic Consensus – Nordisk Arktisk Rehabilitering-imi suleqatigiinneq

Sapaatip-akunnerani 3-mi Aalborgimi kommunit akimorlugit suliniut pillugu isumasioqatigiissitsisoqarpoq: Nordisk Arktisk Rehabilitering.

Aalborg Kommune, Tórshavnar Kommuna aamma Kommunegarfik Sermersooq peqaataasoralugit ilaatigut kommunit pingasut taakkua akornanni paarlaasseqatigiinnissamik pilersaarutip ilusilersorneqarnissaa eqqartorneqarpoq. Suliniutip pingajuani naggataanilu, periutsit nutaat paasisallu suliniummi pilersinneqartut qanoq uppernarsaasersorneqarsinnaanersut avitseqatigiissutigineqarsinnaanersullu sammineqarput.

8. 18. januaari, Unnuk kulturisiorfik

Ornittakkami Kammagiinni Unnuk kulturisiorfimmut atatillugu aaqqissuussisoqarpoq. Ilaatigut tassani ini malugissutsinik misileraavik, aaqanngitsut issiavillu arsaaaraasanik imallit misilerarneqarsinnaasimapput. Aaqqissuussinermi akunnerni pingasuni ammanerani innuttaasut 16-it takkussimapput.

Najugaqatigiiffik Seernaq 4 Illumik-ammatitsilluni aaqqissuussaqarpoq, tassanilu Majoriami kommunip inunnut innarluutilinnut siunnersortaa oqaloqatigineqarsinnaasimalluni. Aamma katsorsaasartoqatigiit ilitsersuisoralugit uppinnaveersaarsinnaaneq misilerarneqarpoq. Aaqqissuussinermi innuttaasut 30-40-t takkussimapput, taakkununnga ilaallutik najugaqatigiiffimmi najugaqalersussat qanigisaallu.