Nalunaarutit

1. Ulloq 5. januaari Nuummi kommunalbestyrelsip ataatsimiittarfiani najukkami ataatsimiititaliat tamarmik ataatsimeeqatigineqarput. Nuummi Najukkami Ataatsimiititaliaq kommunalbestyrelsip ataatsimiittarfiani najuulluni peqataavoq. Ataatsimiinnermi Najukkami Ataatsimiititaliat ukiumi 2020-mi angusatik kiisalu 2021-mut aningaasaliissutigisatik saqqummiuppaat. Tassunga atatillugu 2021-mut missingersuutit saqqummiunneqarput, tassanilu suliniutit siunissamilu pilersaarutit attuumassuteqartut borgmesterimit saqqummiunneqarput.

2. Ulloq 6. januaari Katuami Hans Lyngep Inersuaani Timersortartut Ulluat ingerlanneqarpoq. Aaqqissuussisut ilanngullugit katillugit 50-it miss. peqataapput. Aaqqissuussaq internetikkut Kommuneqarfik Sermersuup Facebookikkut nittartagaatigut toqqaannartumik aallakaatinneqarpoq. Nersornaatit sisamat tunniunneqarput, tassa Ukioq manna timersullammak, Maligassiuisoq, Suliniuteqartunut kajumissaat kiisalu Immikkut ittumik Nersornaat.

3. Ulloq 9. januaari NGO-nut sivikitsumik isumasioqatigiissitsisoqarpoq. Isumasioqatigiinneq Illorpumi ingerlanneqarpoq, tassanilu peqataapput borgmesteri, kommunalbestyrelsimut ilaasortaq Inge Olsvig Brandt, allaffissornermi sulisut kiisalu NGO-t. Peqataasut katillugit 25-upput, taakkunannga 15-it NGO-t. Ukiumut marloriarluni NGO-nut isumasioqatigiissitsisarnissaq pilersaarutaasarpoq.

4. 2021-mi februaarimiit maajimut kommunimi inuussutissarsiornermut siunnersuisoqatigiit pingasut aamma Sermersooq Business suleqatigalugit kommunimi illoqarfinni workshopertitsinissat borgmesterip pilersaarutigai. Tamanna Inuussutissarsiornermut Siunnersuisoqatigiit pingasuusut aallarniuteqarnerat tunngavigalugu nutaamik inuussutissarsiuteqarneq pillugu periusissiornissamut atatillugu pissaaq. Workshopernerni pilersaarutaasuni kommunimi inuussutissarsiuteqartut peqataatinneqassapput matumanilu siunissami Tunumi, Paamiuni Nuummilu inuussutissarsiutinut ataatsimut pilersitsinissaq pingaarnertut sammineqassaaq. Ilaatigut illoqarfinni immikkut ammasumik inuussutissarsiuteqartunut workshopertitsisoqassaaq. Tamanna qaammammi tullermi nalunaarutigineqassaaq.

5. Kommunalbestyrelsip ataatsimiittarfiani nipi isiginnaarullu atorlugit ataatsimiinnerni attaveqaatit – januaarimi februaarimilu Europami teknikerit atortunik ikkussuiartorlutik tikinnissaat pilersaarutaasimagaluarpoq. Maanna angalanermut killilersuutit atuuttut pissutigalugit taamaaliortoqarsinnaanngilaq. Taamaattumik atortut pilersaarutit malillugit piareersinnaanngillat. Corona pillugu killilersuutit apeqqutaassapput qanoq kingusinaartigissanersut.