Nalunaarutit

Siulittaasumit nalunaarutit

  1. Juulip 27-anni borgmesterip Inuussutissarsiornermut Aatsitassanullu Naalakkersuisoq, Jens Frederik Nielsen ilisarititseqatigiinnertalimmik siullerpaamik ataatsimeeqatigaa. Ataatsimiinnermi naalakkersuisoqarfiup kommunillu akornanni suliat pillugit ilisimatitseqatigiittoqarpoq. Naalakkersuisup borgmesterit allat ilai aamma taamatut ataatsimeeqatigereerpai, naatsorsuutigalugulu tamakkerlugit ataatsimeeqatiginissaat. 
  2. Ulloq 28. aamma 29. aggusti borgmesteri Arsummut tikeraarpoq. Arsummut tikinnginnermi Ivittuut Kangilinnguillu alakkarneqarput, taakkunanilu Issittumi Sakkutooqarfik nittarsaassisuuvoq. Arsummut tikeraarnerup siunertaraa innuttaasunik oqaloqatigiinnertalimmik ataatsimeeqateqarnissaq, taakku peqataatinnissaat siunertaralugu, ilaatigullu innuttaasut Arsuk Ivittullu pillugit kissaatigisaannik tusarniaaffiginissaat. Aaqqissuussinermut takkuttut amerlalaavipput. Arsummi tikeraarnermut atatillugu Borgmesteri Nunaqarfimmi Aqutsisunik oqaloqatigiinnertalimmik ataatsimeeqateqarpoq. Innuttaasunik Nunaqarfimmilu Aqutsisunik oqaloqatigiinnertalimmik ataatsimiinnerup saniatigut borgmesterip ilaatigut takuniarpai meeqqerivik, atuarfik, aalisakkerivik utoqqaallu illuat matunikoq.
  3. Aggustip pingajuanni Suliffeqarnermut Isumaginninnermullu Ingerlatsivimmi pisortanngortoq sulilluni aallartippoq.
  4. Ulluni 5. aamma 6. aggusti borgmesteri Qeqertarsuatsiaanut tikeraarpoq. Tikeraarnermi siunertarineqarpoq innuttaasut “Qeqertarsuatsiaat – maannakkut siunissamilu” pillugit oqaloqatigiinnertalimmik ataatsimeeqateqarnissaq. Tuttunniarneq aallartereeraluartoq aasaaneranilu sulinngiffeqartoqaraluartoq takkuttut amerlangaatsiarput, innuttaasullu nunaqarfitsik ullumikkut siunissamilu pillugu eqqarsaatiminnik saqqummiussinissaminnut periarfissinneqarput. Qeqertarsuatsiaanut tikeraarnermi Borgmesteri Nunaqarfimmi Aqutsisunik oqaloqatigiinnertalimmik ataatsimeeqatiserineqarpoq, ataatsimiinnerillu saniatigut atuarfik, atuareernerup kingorna ornittagaq (AKO), meeqqerivik, utoqqaat illuat, Ammitsialak, umiatsianik iluarsaasarfik Ujaqqerivillu pulaarneqarput kiisalu Utoqqallammut kaffisoriartorluni.
  5. Aggustip 14-ianni inuussutissarsiornermut siunnersuisooqatigiit ataatsimeersuarput.  Sermersuumi Inuussutissarsiornermut immikkoortortaq Tunumi, Paamiuni Nuummilu Inuussutissarsiornermut Siunnersuisooqatigiinnik Aningaasaqarnermut Inuussutissarsiornermullu Ataatsimiititamik ataatsimeeqateqartitsivoq. Ataatsimiinnerni oqaloqatigiittoqarluarpoq inuussutissarsiornermullu siunnersuisooqatigiit 2021-mut inuussutissarsiornermut pilersaarummut kissaatigisaminnik amerlasuunik saqqummiussipput, ilaatigut kissaatigineqarluni inuussutissarsiornermi ineriartortitsinissamut periusissianik nutaanik suliaqartoqarnissaa. Ataatsimiinnerit qarasaasiakkut telefonikkullu ingerlanneqarput.
  6. Ulloq aggustip 21-ani 2020-mi (ullum) Kalaallit Nunaanni meeqqat inuusuttullu aarlerinartorsiortut pillugit suliniutit patajaallisarneqarnissaat pillugit kalaallit qallunaallu oqartussaasoqarfiisa assigiinngitsunik suliallit akornanni suleqatigiissitap innersuussutai saqqummiunneqarput. Innersuussutit tamanut saqqummiunneqannginneranni Isumaginninnermut, Ilaqutariinnut Inatsisinillu Atuutsitsinermut Naalakkersuisup aamma Danskit Social- og Indenrigsministeriata borgmesterit tamakkerlugit ataatsimeeqatigiumallugit aggersarpaat. Ippassaq aggustip 20-ani internetti atorlugu ataatsimiinneq ingerlanneqarpoq, ataatsimiinnermilu innersuussutit saqqummiunneqarput.
  7. Aggustip 28-anni Kommunalbestyrelse tamarmiusoq borgmesterimit ulloq naallugu Nuummi isumassarsioriartornissamut, kingornagullu unnukkut nereqatigiinnissamut qaaqquneqarpoq. Ulloq taanna pisussanut pilersaarut ullumi kommunalbestyrelsimi ilaasortanut nassiunneqarpoq.
  8. Aqagu Aggustip ulluisa 22-anni ukioq manna Kommuneqarfik Sermersuumi Kulturimik Nittarsaassisoq 2020 Nuummi Nunatta Isiginnaartitsisarfiani nalliuttorsiorpalaartumik toqqarneqassaaq. Kikkulluunniit peqataanissaminnut tikilluaqqusaaput, erseqqissaassutigissavarali Covid-19-imi malittarisassat peqqutigalugit, inuit amerlanerpaamik 40-ut najuullutik peqataasinnaammata. Kommuneqarfik Sermersuup Facebook-iatigut toqqaannartumik aamma aallakaatinneqarumaarpoq.