Nalunaarutit

Siulittaasumit nalunaarutit

  1. Septembarip ulluisa pingajuanni Borgmesteri Kommunaldirektørilu Nukissiorfiit Nukissiuteqarnermut Pisortaartaavanit, Kaspar Mondrupimit qaaqqusaanikkut ataatsimeeqatigaat.
  2. Septembarip ulluisa sisamaanni Borgmesterip kommunimilu pisortat susassaqartut  "Tasiilami Suleqatigiippugut"-mi suleqatigiissitat Tasiilamut suliniutiminnik suliaqariartorlutik Nuummut aqqusaarneranni ataatsimeeqatigivaat. Ataatsimiinnermi suleqatigiissitat "Tasiilami Suleqatigiippugut" suliniutertik saqqummiuppaat kingornalu ataatsimut takorluukkat aamma suliniutip angunissaanut pisariaqartitat eqqartorneqarlutik.
  3. Septembarip ulluisa 26-anni Nuup Bussii ukiut 40-nngortorsiorlutik nalliuttorsiussapput, ingerlatseqatigiiffiullu arfininngorpat nal. 13.00-imiit garageminni nalliuttorsiutigalugu malunnartinniarpaat, kikkulluunniit qaaqqusaapput, taamaattoq Covis-19-imut atatillugu killilersuinerit peqqutaallutik peqataasinnaasut 100-nut killilersugaapput.
  4. Kommune 2016-imiilli namminersortunik illunik aningaasaliisartunik arlalinnik attartornermut isumaqatigiissusiortarpoq. Nissiat ataasiakkaat innuttaasunut attartorteqqinneqartarput. Tassunga atatillugu kommune nikingassutaanut attartornermut akiliisarpoq, namminersortut illunik aningasaliisartut ineqarnermut akigititaat innuttaasunut akiligassiissutigineqartartunit annertunerummata. Namminersorlutik Oqartussanit tamanna maannakkut misissorneqarpoq. Tassunga atatillugu Namminersorlutik Oqartussat kommunimut attartornermut isumaqatigiissutit aamma ineqarnermut akiliutit nikingassutaat pillugit nalunaarusioqqusipput.Nuna Advokater aamma Advokatfirmaet Malling & Hansen Damm kommunimut peqqussummik naliliipput, isumaqatigiissutigalugulu Namminersorlutik Oqartussani allaffeqarfik peqqussummik tunniussisinnaanngitsut – Nakkutilliisut Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq naapertorlugit kisimik peqqussuteqarsinnaatitaapput. Ilisimatitsissutigineqareersutut kommunip pisinnaatitaaffii malillugit sulisimalluta isumaqarpugut. Kommunalbestyrelsimi kikkut tamarmik ineqarnissaanut qulakkeerinninnissamut akisussaaffeqarpugut. Namminersorlutik Oqartussat maani sanaartunngillat. Iserit-imut initaarnissamut utaqqisunik allattorsimaffimmi allatsissimasut 1792-iupput, allanullu akissaqassagutta inissanik pissarsiornermi taamatut iliorneq illersorneqarsinnaanerpaavoq. Ataasinngorpat tulliani immikkut ittumik sammisaqarneq iluatsillugu suliaq ineqarnermut tunngasoq sammissavarput, tassanilu inatsisinut aningaasaqarnermullu paasisimasaqarluartut peqataatinneqassapput.