Nalunaarutit

Siulittaasumit nalunaarutit

2a.

  1. Kommunalbestyrelsip immikkut sammisaqarnerani 26. aggusti 2019-imi Tasiilami siunissami suliniutissat pillugit, eqqartorneqarpoq, siunissami 0-3-nik ukiulinnut angajoqqaanut siusinaartumik iliuuseqarnermik pilersitsisoqarnissaa sulissutigineqassasoq, tamannalu immaqa pisinnaasoq Armarngivat-nik allannguinikkut. Armarngivat suliffeqarfiuvoq namminersortoq nammineq siulersuisoqartoq, siulersuisullu siunertamik allannguinissaq pitsaasumik isummerfigaat. Meeqqanut Ilaqutariinnullu Ingerlatsiviup Armarngivat anaanamut meeqqamullu katsorsaavittut angerlarsimaffinngorlugu allanngortinnissaa kissaatigaa. Anaanamut meeqqamullu angerlarsimaffimmik siunertaavoq, meeraaqqat inuunerisa pitsaasumik toqqissisimasumillu aallartinnissaata qulakkeerneqarnissaa, meeqqap angajoqqaavisa angajoqqaajunermi annertuumik tapersersuinermik aamma siunnersorneqarnermik qulakkeerinniffiginerisigut. Tamanna pissaaq peqqissaanermik, perorsaanermik aamma isumaginninnermik sulisunit, suliamik ilisimasaqartunik piginnaasaqartunillu qanimut malinnaavigineqarnerisigut tapersersorneqarnerisigullu.
  2. Coronap ajornartorsiutaanera pissutigalugu kommunimi Inuussutissarsiornermut immikkoortortap sulisut marluk Greenland Businessimut atukkiuppai, tassani Naalakkersuisut ikiorsiissutaanik suliaqarnissamut ikiortaanissaat siunertarineqarluni. Sulisut juunip tungaanut atukkiussimaneqassasut naatsorsuutigineqarpoq.

  3. Ulloq 7. apriili borgmesterip Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Bagger, kiisalu kommunini allani borgmesterit ataatsimeeqatigai. Ataatsimiinnermik siunertaavoq coronap ajornartorsiortitsinerata nalaani meeqqat atuarfiat pillugu suliassaqarfiup eqqartornissaa. Ataatsimiinnermi eqqartorneqarput inaarutaasumik misilitsinnissat. Matumani borgmesterip siunnersuutigaa ukiumut karakterit Danmarkimitut atorneqassasut imaluunniit inaarutaasumik misilitsinnerit kinguartinneqassasut, piareersarnissamut piffissaq sivikippallaarmat.

  4. Covid-19-ip killilersimatinniarneqarneranut atatillugu matusinermi suliffissaaleqineq pillugu. Suliffissaaleqisut amerliartorput amerliartornerilu malinnaaffigilluarneqarput. Suliffissaaleqisut amerleriarnerat inuttut kiisalu aningaasaqarnikkut suliffeqanngikkallarnermi tapiissutinik akiliisarneq pissutigalugu kinguneqaateqarsinnaapput. Kommunip inuussutissarsiuteqartut attaveqarfigilluartarpai, piffissami qaninnermi suliffissaaleqisut nutaamik suliffimmik nassaarnissaannut atatillugu.

  5. Ulloq 24. marsi Kulturimik siuarsaaneq pillugu siunnersuisooqatigiit Sermeq Puljemut qinnuteqaatit suliaraat. Siunnersuisooqatigiit katillugit qinnuteqaatinik 39-nik tigusaqarput, ataatsimiinnermilu aalajangerneqarpoq suliniutit qulit akuerereerneqassasut, taamaasillunilu katillugit 839.506 koruuninik tapersersuisoqassasoq.
  6. Peqqissutsimut, Isumaginninnermut Inatsisinillu Atuutsitsinermut Naalakkersuisup, Martha Abelsen-ip nunami borgmesterit tallimaasut tamaasa ataatsimiinnissamut aggersarpai, Kalaallit Nunaanni meeqqat inuusuttullu atugarliortut iliuuseqarfiginerat nukittorsarniarlugu kalaallit-qallunaat akimut suleqatigiinnerisa sumut killinnera pillugu ataatsimiissapput. Suliniummut  tassunga piffissamut 2020-2023-mut Folketingip aningaasanut inatsisaanni 80,0 mio. kr.-it illuartinneqarnikuupput. Ataatsimiinneq oqarasuaatikkut 24. apriili 2020-mi ingerlanneqassaaq.