Nalunaarutit

Siulittaasumit nalunaarutit

 

  1. Juunip 21-iani Inuiattut Ullorsiornermi assigiinngitsunik aaqqissuussisoqarpoq – immitsinnut tikilluta qarasaasiakkullu. Kommuneqarfik Sermersooq ullup ingerlanerani qarasaasiakkut sisamariarluni aallakaatitsivoq, malinnaaffigineqarluartumik, assersuutigalugu ullakkut aallakaatinneqartoq 7.800-nit malinnaaffigineqarsimavoq Qarasaasiakkut aallakaatitsinerit pillugit kommune nersualaarneqarluarpoq. Nuummi inuit katersuuffiini Nuummi Katersugaasivik, Illorput aammalu Nuummi Eqqumiitsulianik Saqqummersitsivik aaqqissuussani ornigarluarneqarput, isertussat killilersuiffiginissaannut ajornartorsiutitaqanngitsumik. Inuiattut Ullorsiornermi Paamiuni, Ittoqqortoormiini Tasiilamilu pisarnertut aaqqissuussisarnerit erfalasulerneq aammalu silami unammiuaarnerit ingerlanneqarsimapput inuppassuarnit peqataaffigineqanngikkaluartumik.
  2. 2020-mi Juullip orpianik ikitsinermut tunngatillugu, Nuummi Arsiffimmi sanaartortoqarnera pissutigalugu sumiiffimmik nutaamik/nutaanik toqqaasoqassaaq. Siullermik apeqqut tamanna Kommuneqarfigamut ilanngunneqassaaq, tassuunakkut innuttaasut inissiiffissatut kissaatigisaminnik saqqummiussisinnaaqqullugit.
  3. ”Kalaallit Nunaanni Kulturikkut Suliaqartut Attaveqatigiiffiat” Katuami aaqqissuunneqartoq, tassaavoq Nunatsinni kulturikkut suliaqartut kommunillu tamarmik peqataatitaqarfiat. Tamatumani siunertarineqarpoq kulturimik suliallit pitsangorsakkanik atugassaqartitaalernissaat. Sulineq pillugu paasissutissiissummik Kulturimut Naalakkersuisumut, Inatsisartunut ilaasortanut borgmesterinullu tamanut allakkanik apuussisoqaqqammerpoq. Ilinniartitaanermut, Kulturimut Ilageeqarnermullu Naalakkersuisoqarfik septemberi 2020-mi Kulturi pillugu isumasioqatigiissitsiniarpoq, taannalu Kulturimut Aaqqissuussinermullu immikkoortortaqarfimmit peqataaffigineqarnissaa qilanaarineqarpoq.
  4. Ulloq 13. juni borgmester Tassissuumi Paamiuni innutaasunik ataatsimiisitsivoq. Kommunalbestyrelsimi ilaarsortat Paamiuneersut innuttaasunik ataatsimiisitsinermi peqataanissamut qaaqquneqarnikuupput. Innuttaasut 50-it sinnerlugit innutaasunik ataatsimiisitsinissamut takkupput. Ataatsimiisitsinermi borgmesteri COVID-19-ip uagut kommunitsinnut sunniutai ilisimatitsissutigai aamma innuttaasunik peqataatitsinermut pilersaarut nutaaq ” kommuneqarfiga” pillugu paasissutissiivoq. Borgmesteri aallaqqaasiilluni ilisimatitsissuteqareerami Sanarfinermut Avatangiisinullu Ingerlatsivimmut oqaaseqarsinnaatitaaneq tunniuppaa, taannalu Paamiuni maannakkut ingerlatsinermik sanaartornermillu suliassat killiffiannik eqqartuivoq. Ilanngullugu Paamiuni inuussutissarsiornermut siunnersuisooqatigiit nutaat ilisaritinneqarput, tassani kommunalbestyrelsimut ilaasortap Henrik Rachlevip siullermik ataatsimiigiarsimasunut inuussutissarsiornermut siunnersuisooqatigiinnik pilersitsinermut politikkikkut eqqarsaatersuutit tunuliaqutaasut oqaluttuarai. Naggataatigut innuttaasut nerrivinni eqimattakkaarlutik oqaluuserinninnissaminnut periarfissinneqarput, suut isorisatik isumassarsiatillu borgmesterimut anngukkusutatik eqqartorlugit. nnuttaasut eqqarsaataat allanneqarput borgmesterimullu tunniunneqarlutik, borgmesterip taakkua oqaaseqarfigai ataatsimiinnermut peqataaffigineqarluartumut innuttaasunut qujassuteqannginnermini.
  5. 14. aamma 15. juuni Nunaqarfimmi Aqutsisut isumasioqatigiissinneqarput. Nunaqarfimmi Aqutsisut Tunumeersut Tasiilami isumasioqatigiipput, taavalu Kitaani Nunaqarfimmi Aqutsisut Paamiuni. Isumasioqatigiissitsineq qarasaasiakkut attaveqaqatigiilluni ingerlanneqarpoq videokonference atorlugu, taannalu ingerlalluartorujussuuvoq. Siusinnerusukkut oqaatigineqareersutuut, isumasioqatigiinneq pillugu nalunaarut piareeriarpat kommunalbestyrelsimut aamma KANUNUPE-mut nassiunneqarumaarpoq.
  6. Kommunimi Inuussutissarsiornermut Siunnersuisooqatigiit inissitsiterlutik siullermeertumik ataatsimeereerput Nuummi, Paamiuni Tunumilu. Ataatsimut isigalugu Inuussutissarsiornermut Siunnersuisooqatigiit tamarmik najukkaminni ineriartortitsinissamut isumalluarpalupput. Siulittaasutut makkua qinerneqarput. Nuummi – John Jakobsen; Paamiuni – Ortooraq Møller; Tunumi – Thomas Kristensen. Inuussutissarsiornermut Siunnersuisooqatigiit aamma Aningaasaqarnermut Inuussutissarsiornermullu Ataatsimiititap aggustimi ataatsimeeqatigiinnissaat pilersaarutaavoq.
  7. Juunip ulluisa19-ianni borgmesteri Isumaginninnermut Inatsiseqarnermullu Naalakkersuisumit  Martha Abelsenimit ilisimatitsinertalimmik ataatsimeeqatiserineqarpoq. Naalakkersuisup Ittoqqortoormiini juunip ulluisa qulingiluaanni qulingannilu angalasimaneq ilisimatitsissutigaa. Naalakkersuisup Martha Abelsenip saniatigut, Peqqinnissamut Naalakkersuisoq aammalu Ilinniartitaanermut, Kulturimut, Ilageeqarnermullu Naalakkersuisoq piffissami pineqartumi Ittoqqortoormiineeqataasimapput.
  8. Ataatsimiititap kingullermik ataatsimeereernerani piffissamik sivikitsuinnarmik piffissaliillunga ataatsimiititanik ataatsimiigiaqqusisinnaanera misissorpara. Susassaqarfimmut tunngatillugu inatsisitigut periarfissaareermat, suliaq tassunga killeqartoq borgmesterip nalilerpaa.
  9. Hans Egedep eqqaassutissaa qanoq pineqassanersoq aasap ingerlanerani tusarniutigineqassaaq. Inernera kommunalbestyrelsip septembarimi ataatsimiinnerani oqaluuserineqassaaq.