Nalunaarutit

2a. Siulittaasumit nalunaarutit

2b. Ataatsimiititanik ataavartunit nalunaarutit

2a. Siulittaasumit nalunaarutit

  1. Januaarip ulluisa qulinganni borgmesterip najukkami ataatsimiititaliat ukiumoortumik ataatsimeeqatigai, Paamiuniit, Tasiilamiit Nuummiillu peqataasoqarluni. Ittoqqortoormiit ajoraluartumik piffissaq kingullerpaaq atorlugu ataatsimeeqataasinnaanatik nalunaarput anorersuarnera pissutigalugu. Borgmesteri kommunip 2020-mut missingersuutai pillugit ilisimatitsissuteqarpoq, najukkamilu ataatsimiititaliat suliatik 2019-imilu suliniutitik oqaluttuaraat, aammalu najukkami ataatsimiititaliani sulinerminni suut iluatsissimanersut, suullu ajornartorsiutaanersut.
  2. Januaarip ulluisa 24-ianni 25-iannilu borgmesteri kommunimut ikinngutigisamut Tromsømut tikeraarpoq. tamanna aaqqissuunneqarpoq borgmesterip Arctic Mayors forumimi aammalu Arctic Frontiersimi peqataajartunnginnerani, taakkulu kingornagut Tromsømi ingerlanneqarput. Januaarip ulluisa 24-ianni 25-iannilu Tromsø Kommuneata aammalu Kommuneqarfik Sermersuup piffissaq imminnut isumassarsiorfittut atorpaat, aammali suliassaqarfiit suut suleqatigiissutiginerini erseqqissunik tigussaasunik angusaqarfiusinnaanersut sammineqarlutik.
  3. Januaarip ulluisa 26-ianni Arctic Mayors Forum (AMF) Tromsømi ingerlanneqarpoq. Nunat ilaasortat tamarmik peqataaffigisaannik ataatsimeeqatigiittoqarpoq, taakku saniatigut USA peqataatitaqarpoq. Forummi pitsaasorpassarnik isumalluarfiuvoq, maannalu ataatsimiittariaatsit allallu ilusilersorneqarnissaannik erseqqissaasussanik suleqatigiissitanik assigiinngitsunik pilersitsisoqarpoq.
  4. Januaarip ulluisa 27-ianni Arctic Frontiersip immikkut aaqqissuussaanni (Arctic Frontirs side-event) ima qulequtaqartumik: Issittumi illoqarfiit FN´ip nunarsuaq tamakkerlugu piujuartitsinermik ineriartortitsineq pillugu anguniagaanik qanoq sulinersut pillugu (”How to meet sustainable development goals in Arctic Cities”) borgmesteri saqqummiussaqarpoq.
  5. Februaarip ulluisa sisamaanni Kommuneqarfik Sermersuumi Sanarfinermut Avatangiisinullu Ingerlatsivik Katuap inersuaaraani "Illumik Ammatitsivoq", suliat ingerlasut piffissamilu aggersumi sanaartugassat nunaminertallu sanaartorfissat pillugit saqqummiussisoqarluni. NCD, ESANI-Nuna Tamakkerlugu Eqqagassaleriffik, Mitsimmavik Sermersuumilu Inuussutissarsiornermut immikkoortortaq saqqummiussisuupput. Tamakkua saniatigut Atuarfik Nutaaq, inissiat sanaartugassatullu pilersaarutit saqqummersinneqarput. Borgmesteri tikilluaqqusisuuvoq illoqarfiullu ineriartortinneqarnissaanut suliassat kommunalbestyrelsimit akuerineqareersut pillugit saqqummiussilluni. Aaqqissuussinermut takkuttut amerlalaavipput.
  6. Februaarip ulluisa arfineq-aappaanni borgmesteri suliffeqarfimmut Pisiffimmut pulaarpoq, tassanilu Pisiffiup pisortaanera aamma Pisiffimmi sulisoqarnermut ineriartortitsinermullu immikkoortortaqarfimmi siunnersorti ataatsimeeqatigalugit. Ataatsimiinnermi suliffeqarfiup takorluukkani, naleqartitani, siunissamut pilersaarutini, iluatsittut unammillernartullu saqqummiuppai. Ataatsimiinneq nuanneqisumik siunnerfilimmillu oqaloqatigiinnertalimmik ingerlanneqarpoq.
  7. Februaarip ulluisa 26-ianni Isumaginninnermut Naalakkersuisoq, Martha Abelsen angerlarsimaffeqanngitsut inuttullu ajornartorsiuteqartut pillugit ulloq naallugu ataatsimeersuartitsissaaq, tassungalu kommunalbestyrelse aamma qaaqqusaapput.
  8. Marsip ulluisa pingajuanni sisamaannilu borgmesterit Naalakkersuisut Naalakkersuinikkut Ataqatigiissaarisoqatigiivinut Kangerlussuarmut ataatsimiigiaqqutipput. Borgmesterit Kangerlussuarmiinneranni, marsip aappaanni ataatsimut innuttaasut ataatsimeeqatigineqassapput.
  9. Sapaatip akunnerani 11-mi Aningaasaqarnermut Inuussutissarsiornermullu Ataatsimiititaq Ittoqqortoormiinut angalassaaq. Angalanissamut pilersaarutit imarisassaalu piareersarlugit allaffeqarfik aallarteruttorpoq.

2b. Ataatsimiititanik ataavartunit nalunaarutit

Uju Petersen, Meeqqanut Ilaqutariinnullu Ataatsimiititami siulittaasoq:

  1. 2019-imi kvartalit pingajuanni Tasiilami Oqartussaaffeqarfimmut Ikiorsiissuteqarnermullu suliassaqarfimmi MI-mi pisortaq atorfinitsinneqarpoq. Sunniutai 2019-imi kvartalit sisamaanni malunnarsilereerput. Najukkami aalajangiisinnaassuseqalerneq sulisunut suleqataasunullu oqilisaataangaatsiarsimavoq.
  2. 2019-imi juulip qaammataani Nakkutilliisoqarfiup Kommuneqarfik Sermersuumut peqqussuteqarnera 2019-imi kvartalit sisamaanni Meeqqanut Ilaqutariinnullu Ingerlatsivimmi ukkatarineqangaatsiarpoq. Peqqussuteqarnermi pisariaqartinneqartut naammassiniarlugit Danmarkimit isumaginninnermut siunnersortit arfineq-pingasut atorneqarnissaannut Kalaallit Nunaanni Isumaginninnermut Aqutsisoqarfiup Kommuneqarfik Sermersooq peqatigalugu Danmarkimi Socialstyrelsen suleqatigivaa.
  3. Piffissami tamatumani Kuserneq aamma Ivaaq Ceresvej 9-mi decembarip aallaqqaataani ilaqutariinnut inissianik katsorsaanermullu ininik ammaapput.
  4. Tasiilami upalungaarsimanermut pilersaarut kinguaassiuutitigut pinngitsaaliisoqarsimasutut nalunnginnikkaanni imaluunniit pasitsaassaqaraanni atorneqarsinnaasutut akuersissutigisaq, pinngitsaaliisoqarsimatillugu suliani immikkoortut akimorlutik siunersiueqatigiittarnermigut ataqatigiissaarisarnermigullu periuseqarlutik atortarpaat. Nuummi siunissami upalungaarsimanissamut Tasiilami suleqatigiinneq isumassarsiorfittut atorneqarpoq, 2019-imilu kvartalit sisamaata ingerlanerani pinngitsaalineqarsimasunik oqaloqateqarnissamut ilinniartinneqarneq immikkoortunilu assigiinngitsuni isumasioqatigiinneq ingerlanneqarlutik.
  5. 2019-imi kvartalit sisamaat assigiinngitsorpassuartigut meeqqat ilisarnaatigisaattut taaneqarsinnaavoq, ilaatigut meeqqat pisinnaatitaaffii pillugit ataatsimeersuartitsisoqarpoq. Ataatsimeersuarneq Meeqqat pillugit isumaqatigiissutip nalliuttorsiorneranut atatillugu Nakuusamit aamma UNICEF-imit aallartisarneqartoq aamma Meeqqanut Ilaqutariinnullu Ingerlatsivimmit peqataaffigineqartoq.
  6. 2019-imi kvartalit sisamaanni Meeqqat ilaqutariillu inuuniarnermikkut ajornartorsiuteqartut pillugit politikkip suliarineqarnissaa ukkatarineqarpoq. Suliamik kinguaattoorneq peqqutigalugu Meeqqat ilaqutariillu inuuniarnermikkut ajornartorsiuteqartut pillugit politikkimut nutaamut siunnersuut Meeqqanut Ilaqutariinnullu Ataatsimiititami 13/2-2020-mi oqaluuserineqarpoq.
  7. Paamiuni BFC qimarnguilik, ilaqutariinnik aqqutissiuussisulik, tarnip pissusiinik ilisimasalimmik oqaloqateqarnissamut innersuussisarfilik, inuusuttunik siunnersuisarfilik pitsaaliuinermillu suliaqarfiusoq pillugu pitsaaliuinermut ilaqutariinnillu katsorsaanermut tunngasut ukkatarineqarput. Kvartalit sisamaanni BFC-mi ilaqutariit aqqanillit missaaniittut sullinneqarsimapput. Nuummi BFC-mik ilaatigut tarnip pissusiinik immikkut ilisimasalimmik peqartitsisarnissamik Paamiuni BFC-mik ikiuisartumik suleqateqarneq kvartalit sisamaanni ingerlatiinnarneqarpoq. Tarnip pissusiinik immikkut ilisimasalik qaammatip aappaata affaa allortarlugu Paamiuniittarpoq.

Inge Olsvig Brandt, Suliffeqarnermut Isumaginninnermullu Ataatsimiititami siulittaasoq:

Oqartussaaffeqarfik:

  1. Namminersorlutik Oqartussat angerlarsimaffeqanngitsut pillugit februaarip ulluisa 26-anni ataatsimeersuartitsissaaq. Pisortaq Isak Nielsen Kleist, fagchefi Cecilie Schierbeck aamma Suliffeqarnermut Isumaginninnermullu Ataatsimiititaq peqataassapput.

Utoqqarnut suliassaqarfik:

  1. Utoqqaat pillugit Siunnersuisooqatigiit, ingerlatsivik kiisalu ataatsimiititami siulittaasoq Qeqertarsuatsiaani 17. februaari 2020-mi innuttaasunik ataatsimiititsipput. Utoqqaat pillugit Siunnersuisooqatigiit imminnut ilisaritipput suliatillu pillugit saqqummiillutik. Innuttaasunik ataatsimiititsinermi innuttaasut qulit missaat peqataapput.
  2. Februaarip ulluisa 1-ianni utoqqarnut naapittarfik Qeqertarsuatsiaani ammarneqarpoq. Illumik atuisuusut aqutsissapput (kommunimit pisariaqartumik ikiorneqartarlutik).
  3. Danmarkimi Alzheimerforening (puigortunngortut peqatigiiffiat) suleqatigalugu puigortunngorneq pillugu nakorsiat/puigortunngorsimasut ilaqutaalu puigortunut ataqatigiissaarisumit quppersagaliuunneqarput. Quppersagaq kalaallisut qallunaatullu allaqqavoq.
  4. Puigortunngorsimasunut ilaqutaasut akornanni misissuineq pillugu nalunaarusiaq takkuppoq. Arktisk Aldring-imit ilisimatuut suleqatigalugit taanna suliarineqarpoq. Nalunaarusiami anguneqartut tunngavigalugit utoqqarnut suliassaqarfimmi suliniutinik assigiinngitsunik ingerlatsivik pilersaarusiuleruttorpoq.

Innarluutilinnut tarnikkut nappaatilinnullu Immikkoortortaqarfik:

  1. Najugaqatigiiffik Seernaq 4 ammarneqarpoq. Ineqartussat tamangajammik isertereerput. Ineqartut nutaanik avatangiiseqalernertik nuannaarutigivaat.
  2. Upernaap ingerlanerani pisortatigoortumik ammaanersiortoqarumaarpoq.
  3. Inuit innarluutillit pillugit inatsisip nutaap atuutilerneranut atatillugu sullissineq pillugu ingerlatsivik sulisunik suliffiup iluani ilinniartitsivoq. Iluatsilluarpoq. Sulisut pitsaanerpaamik sakkussaqartinniarlugit inuit innarluutillit pillugit inatsimmi sammisassatut aalajangersimasut qulequtakkaarlugit immikkut sammisassaqartitsisoqarumaarpoq.

Michael Rosing, Meeqqanut Atuarfeqarnermullu Ataatsimiiititmi siulittaasooq:

  1. Lone Nukaaraq Møller Meeqqanut Atuarfeqarnermullu Ingerlatsivimmi pisortanngorpoq. Ulloq 1. marsi 2020 sulilissaaq.

    Justus Hansen, Sanarfinermut Avatangiisinullu ataatsimiititami siulittaasoq:

Soqanngilaq.