Nalunaarutit

2a. Siulittaasumit nalunaarutit
2b. Ataatsimiititanik ataavartunit nalunaarutit

2a.

  1. Oktobarip ulluisa 26-ianni borgmesterip Utoqqaat Peqatigiit, peqatigiiffiit naapittarfianni Blok 10-mi pulaarpai. Peqatigiiffiup siulersuisuini ilaasortat ilaasortallu allat borgmesterip pulaarnerani takkussimapput.
  2. Oktobarip ulluisa 26-ianni Kulturi pillugu siunnersuisooqatigiit Aningaasaateqarfik Sermermut qinnuteqaatinik suliaqarpoq. Katillugit qinnuteqaatit 33-it suliarineqartussaasimapput. Taakkunannga qinnuteqaatit arfineq-pingasut marsip aallaqqaataani qinnuteqarfissami kingullermeersuuppuut, taakkulu COVID-19-ip ajornartoortitsinera pissutigalugu qinnuteqaatiminnik nutartereqquneqarsimapput. Qinnuteqaatit 25-it sinneri nutaajupput. Suliniutissanut katillugit aningaasaliissutigineqarput:  1.685.179,00 kr.-it.
  3. Oktobarip ulluisa 29-anni borgmesterip Tasiilami Najukkami ataatsimiititaliaq ataatsimeeqatigaa.
  4. Oktobarip ulluisa 30-anni borgmesterip Tasiilami Inuussutissarsiornermut siunnersuisoqatigiit ataatsimeeqatigai.
  5. Novembarip ulluisa tallimanni nunatsinni kommunit suleqatigalugit NAKUUSA qarasaasiakkut ataatsimiititsivoq. Covid-19-imut atatillugu killilersuinerit pissutigalugit, meeqqat pillugit siunnersuisoqatigiit Nuummi, Qaqortumi, Ilulissani, Aasianni Sisimiunilu katersuupput, kommunikkuutaarlutik agguataarneqarlutik. Borgmesteri meeqqat ataatsimeersuarnerannut Nuummi kommunalbestyrelsip ataatsimiittarfiani ingerlanneqartumut tikilluaqqusisussatut aggersarneqarsimavoq. NAKUUSA meeqqat ataatsimeersuarneranni resolutionimik suliaqarpoq, taannalu Ilaqutariinnut inatsisinullu atuutsitsinermut Naalakkersuisumut borgmesterinullu tamanut ulloq novemberip 20-ani persuarsiorpalaartumik tunniunneqarpoq.
  6. Novembarip arfernanni Kommuneqarfik Sermersuup uppernarsaatit arlaqartut siulliannik tigusaqarnini nalliuttorsiutigaa, tamanna Nuup piujuartitsinissamik tunngavilittut nalunaarutigalugu allagartartaarnissaanut pisariaqarpoq. Uppernarsaat Diplom, kommunimit tiguneqartoq tassaavoq bronze benchmarking – imaluunniit assersuussinissamut tunngavik.
  7. Novembarip arfineq-aappaanni Inuit ulluat nalliussineqarpoq. Ullormi tassani Inuit Cirkumpolar Council, Greenland (ICC) aamma Kommuneqarfik Sermersooq illoqarfimmi inuusuttunik 15-iniit 35-nut ukiulinnik workshoppertitsivoq, oqallinneq kinaassuserlu, kiisalu naleqartitat qitiutillugit. Borgmesteri Hans Egedemut eqqaassutissaq pillugu oqaloqatigiinnertalimmik unnussiuaartitsinerani taamatut aaqqissuussisoqarnissaa aallaaveqarpoq innuttaasut peqataasut kinaassuserput pillugu itinerusumik oqallitsitsisoqarnissaanik ujartuimmata.
  8. Nuuk nutaamik qatserutaasivittaassaaq. Qatserutaasivik nutaaq maajip aallaqqaataani 2022-mi piariissasoq naatsorsuutigineqarpoq. Siorarsiorfik – Nuuk City Development A/S qatserutaasivittaassap Nuummi Pukuffimmi sananeqarnissaanut neqerooruteqartitsisuuvoq. Qatserutaasivik 2800 kvadratmeterinit annertunerusoq marlunnik qulereeqartussaavoq, pitsaasunik sulisunut immikkoortortaqassaaq, garageqassaaq, biilinik asaasarfeqassaaq bilileriffeqassallunilu. Taamaalilluni pisoq sioqqullugu, pisoqarnerup nalaani kingornalu inissaqarluarluni suliassat ingerlanneqarsinnaalissapput.
  9. Kommuneqarfik Sermersuumi sulisunut ileqquusumik julefrokostertitsinissaq ajoraluartumik ukioq manna taamaatiinnarneqartariaqarpoq Covid-19 peqqutigalugu. Taamaattorli juullip qaammataata aallartinnera nalliussiniarlugu suliffeqarfimmi suliffiup nalaani annikitsumik juullerpalaartitsisoqarsinnaasoq kommunimi allaffeqarfiup aalajangerpaa. Suliffeqarfinni suliffiup nalaani taamaaliorsinnaanngikkaanni suliffiup avataani aaqqissuussineq ingerlanneqarsinnaavoq.  Aaqqissuussinerit imigassartorfiussanngillat tulliuttullu killilersuutit malinneqassapput:
  • Annerpaamik 100-t peqataassapput.
  • Taamaallaat sulisut ingerlatsivimmi immikkoortumilu/suliffeqarfimmilu suleqatigiit (tassa ulluinnarni naapittakkavut) peqataasinnaapput.
  • Errortorfiusinnaasoq assannullu spriti atoriaannaassapput.

2b.

Uju Petersen, Meeqqanut Ilaqutariinnullu Ataatsimiititami siulittaasoq:

  1. Piffissami kingullermi unamminartut annersaat tassaasimavoq Tasiilami sulisussaaleqineq, aasaq manna myndighedsafdelingimi sulisut qulingiluaariarlutik maannakkut pingasuinnaalersimapput, taamaattumik sulisut nuumminngaanneertut Tasiilamut suliartortinneqartalersimapput – ataavarnerusumilli aaqqiissuteqarnersaq kissaatigineqarpoq taamaattumik nunatsinniittoq vikarbureau attavigineqarnikuuvoq neriuppugullu iluatsikkumaartoq.
  2. Taamatuttaaq aamma Paamiunut ilinniarsimasunik sulisussarsiorneq suli imaannaanngilaq
  3. Familiecenterit ataani sulisut arlllik qanittumik psykoterapeutitut ilinniaqqinnermini naammassipput, tamanna assut iluarisuutiginarpoq.
  4. Naalakkersusoqarfiup ulloq unnuarlu angerlarsimaffiit siunissami qanoq aaqqissuussisoqassanersumut pilersaarusiornissamut sulisut arlallik suleqatigiiffinnut assigiinngitsunut peqataaffigineqassaaq.

Inge Olsvig Brandt, Suliffeqarnermut Isumaginninnermullu Ataatsimiititami siulittaasoq:

 

  1. Suliffeqarnermut Isumaginninnermullu Ingerlatsivik qanoq innuttaasut suliniuteqareernerup kingorna malinnaanermit unitsinneqarnerata kingorna, sulili annertuumik perorsaanikkut tapersersortinneqarnissaminnik pisariaqartitsisut, kommunimit iluaqutaasinnaasumik suliniuteqartoqarsinnaanera pillugu misissuissaaq. Periarfissat ilagaat anguniagaqarluni ineqarnissamik neqeroorummik pilersitsinissaq. Maanna pineqartut Namminersorlutik Oqartussat paaqqutarinnittarfiinut inissinneqartarput.

Michael Rosing, Meeqqanut Atuarfeqarnermullu Ataatsimiititami siulittaasoq:

  1. Meeqqanut Atuarfeqarnermullu Ingerlatsivimmit Tasiilamut meeqqerivinnik atuarfimmillu nakkutilliiartortoqarsimavoq. Aammattaaq Misimit atuarfimmiittoqarsimavoq immikkullu atuartinneqartut atuartinneqarnerat nakkutigiartorlugu atuarfimmut siunnersuutinik ilitsersuutinillu tunioraalluni.
  2. Meeqqanut Atuarfeqarnermullu Ingerlatsivimmit suliniutit assigiinngitsut aallartinneqarput ulluunerani paaqqinniffinni sulisut ilinniarsimasut kajungilersinniarlugit attatiinnarumallugillu. Suliassaqarfik taanna qitiutinneqartorujussuuvoq suliniutigineqartullu ataavartumik nalilersuiffigineqartassapput.
  3. Ataatsimiititap Danmarkimut angalanissaa corona pissutigalugu taamaatinneqarpoq. Angalanissamut pissanganaraluartumut pilersaarut ataatsimiititamut nutaamut qinersereernerup kingorna tunniunneqarsinnaavoq.
  4. E-sport aallartilluarpoq, ammarneraniillu matunissaanut ulikkaaqqavoq. Tassa imaappoq, nal. 18.00-imiit 23.00-imut. Meeqqat tamarmik immikkut 30 minutsimik piffissaqartinneqarlutik. Tamatuma kingorna nikittassapput. Maskiinamut ataatsimut ullormut inuit qulit atuisuusinnaapput maskiinallu quliutinneqarput, tassa imaappoq ullormut meeqqat 100-t atuisinnaallutik.

Justus Hansen, Sanarfinermut Avatangiisinullu ataatsimiititami siulittaasoq:

  1. Pingajussaanik misileereernikkut Paamiuni atuarfiup nutarterneqarnissaanut Innaallagissamut entreprenørimik pissarsisoqarpoq. Taamaalilluni sulineq aallartinneqarsinnaanngorpoq – piaarnerpaamillu pissasoq naatsorsuutigineqarpoq.
  2. Sanaartorfissagissaanissamut entreprenørip ajugaasup isumaqatigiissuteqarfiginiarneqarnera aallartippoq. Sumiiffimmi entreprenørimit ataatsimik neqerooruteqartoqarpoq.