Nalunaarutit

2a. Siulittaasumit nalunaarutit

2b. Ataatsimiititanik ataavartunit nalunaarutit

2.a

 

  1. Ullumi 2019-imi juunip ulluisa 11-anni ataatsimiinnermi oqaluuserisassani, kommunalbestyrelsimut ilaasortat siunnersuutaat piffissami aalajangersimasumi misiliutitut allaffeqarfimmit oqaaseqaateqarfigisarlugit aallartinneqarpoq. Taama iliortoqarpoq ilaasortat siunnersuutaat pitsaaninngortikkusullugit aammalu aallaqqaataaniilli allaffeqarfiup nalilersuisimanera nalunaarumallugu, taamaalillutik siunnersuutit ilaat kommunalbestyrelse inaarutaasumik aalajangiitinnagu oqaaseqaammik taperserneqartalissapput.
    Massakkut periusiusartoq sivitsortoortitsisarpoq aamma politikerit ilaasa naatsorsuutigisarpaat kommunalbestyrelse tapersiissuteqarmat taava siunnersuutitik piviusunngortinneqarlutik aallartinneqassasut, piviusorli unaavoq, allaffeqarfiup siunnersuut piviusunngortinneqarsinnaanersoq nalilersortarpaa tamatumalu kingornatigut Kommunalbestyrelsimit akuersissutigisassanngorlugu imaluunniit itigartitsissutigisassanngorlugu ingerlateqqinneqartarpoq. Siunnersuutilli amerlasuut aningaasartuuteqarfiungaatsiartarput, siunnersuutinullu aningaasanik immikkoortitsisoqarsimanngikkaangat tamanna imaappoq, siunnersuut allaffeqarfimmit piviusunngortinneqarsinnaanngitsoq. Kommunalbestyrelsip ataatsimiinneri arlalialunnguit qaangiuppata misiliineq naliliiffigineqassaaq.
  2. U. 28 & 29 maaji, Nunat Avannarliit Killiit illoqarfittut pingaarnersaasa aningaasaateqarfiani siulersuisut Reykjavikimi ataatsimiipput, tassanilu aalajangerlugu katillugit 412.000 kr.-nik aningaasaliissuteqartoqassasoq, imatullu agguataarneqarlutik:
    152.000 kr.-t Kommuneqarfik Sermersuumi Nuummiit qinnuteqaatinut; 150.000 kr.-t Reykjavikimiit qinnuteqaatinut aamma 150.000 kr.-t Tórshavn-imiit qinnuteqaatinut. Nunat Avannarliit Killiit illoqarfittut pingaarnersaasa aningaasaateqarfianut qinnuteqaatit katillugit 24-t tiguneqarput, taakkunannga 16-it aningaasaateqarfimmit aningaasaliiffigineqarput. Nuuk, Kommuneqarfik Sermersooq siulersuisut ataatsimiinnissaani tullermi qaaqqusisuussaaq, taannalu 2020-mi upernaakkut/aasakkut pissaaq.
  3. U. 31. maaji, Naalakkersuisunut siulittaasoq, Peqqissutsimut, Isumaginninnermut Inatsisinillu Atuutsitsinermut Naalakkersuisoq aamma kommunit sinnerini borgmesterit Kommuneqarfik Sermersuumi borgmesterimit ataatsimeeqatiserineqarlutik (oqarasuaatikkut) aggersarneqarput, tassani siunertaalluni meeqqanik inuusuttunillu kinguaassiutitigut atornerluisarnermik nuna tamakkerlugu ajornartorsiuteqarneq pillugu suleqatigiissuteqarnissaq aamma nuna tamakkerlugu aaqqiissutissarsiornissaq. Borgmesterit tamarmiusut peqataapput, Naalakkersuisunut Siulittaasoq peqataasinnaanani nalunaarpoq, ataatsimiigiaqqusissullu Peqqissutsimut, Isumaginninnermut Inatsisinillu Atuutsitsinermut Naalakkersuisumut ingerlateqqinneqarnissaa innersuuullugu, taannali aamma allamik isumaqateqarsimaneq pissutigalugu peqataasinnaanani nalunaarluni.
  4. U. 31. maaji, borgmesterip Aalisarnermut, Piniarnermut Nunalerinermullu Naalakkersuisoq ataatsimeeqatigaa. Kommunalbestyrelsip Aalisarnermut, Piniarnermut Nunalerinermullu Naalakkersuisumut saaffiginnissutaa borgmesterip ingerlateqqippaa, kissaatigalugu piniarnermut nakkutilliisoqartitsisoqalernissaa aamma aalisarnermik nakkutilliisoqartitsisoqalernissaa kingusinnerpaamik januaarip ulluisa siulliat 2020-mi pissasoq, aamma Tasiilaq nunaqarfiilu ilanngullugit. Naalakkersuisoq ilisimatitsivoq, nakkutilliisitsisarnerup aaqqissugaanera misissorneqaleruttortoq, tassani pineqarluni nuna tamakkerlugu piniarnermik nakkutilliisoqartitsisarnerup aamma aalisarnermik nakkutilliisoqartitsisarnerup agguataarneqarnerat. Naalakkersuisup Kommunalbestyrelsip kissaataa aamma isiginiarumavaa.
  5. U. 31. maaji, Tunumi piniarnermut aalisarnermullu inuussutissarsiuteqarnerup siuarsarneqarnissaanik qulakkeerinnittoqarnissaa pillugu Aalisarnermut, Piniarnermut Nunalerinermullu Naalakkersuisoqarfiup aamma Kommuneqarfik Sermersuup siunnerfigisaq pillugu nalunaarut atsiorpaat. Suleqatigiinnit anguniarneqarpoq Tasiilami piaartumik tunitsivimmik pilersitsisoqassasoq, namminersortut suleqatigalugit. Tunitsiviup tunisassiorfiullu pilersinnissai pilersaarutigineqarpoq, namminersorlutillu sulisut aningaasanut inatsisit aqqutigalugit ingerlatsinissamut tapiissutinik qinnuteqarsinnaalernissamut periarfissaqalissallutik. Tasiilami suliniutit nutaat suliarinerisa saniatigut suleqatigiit Ittoqqortoormiini piniarnermi inuussutissarsiornerup ineriartortinneqarnissaa sulissutigissavaat.
  6. U. 2.-5. juuni 2019, Tromsø Kommunimeersut Nuummut tikeraarput. Tromsø Kommune-miit oqaaseqartartuusoq (borgmesteri) atorfilittani ilagalugit Nuummut tikeraarpoq. Tikeraarnermi imminut ilisarisimanerulernissaq siullertut siunertaavoq, siunertanullu ilaavortaaq illoqarfinni ineriartortitsinermi, avatangiisinut piujuartitsinermilu suliassaqarfinni malittarisassanik isumaqatigiissiornerit aallartisarnissaat.
    Tikeraarnermi ilaatigut suliffeqarfiit kulturikkut suliaqartut, paaqqinniffiit, suliffeqarfiit, kattuffiit, peqatigiiffiit ingerlatsiviillu takuniarneqarput aammalu workshoppertitsisoqarlunilu isumasioqatigiittoqarpoq. 
  7. U. 7. juuni, borgmesteri aamma Peqqissutsimut, Isumaginninnermut Inatsisinillu Atuutsitsinermut Naalakkersuisoq ataatsimeeqatigiipput. Naalakkersuisup Qeqertarsuatsiaanut aamma Tasiilamut politikkikkut sulinermut atatillugu tikeraarsimanini ataatsimiinnermi ilisimatitsissutigaa. Tamatuma saniatigut isumaginninnermut tunngasuni ajornartorsiutaasunik ilisimatitseqatigiinneq ilisimasanillu avitseqatigiinneq pivoq.
  8. Paamiut-pillugu isumaqatigiissut ualimut Borgmester Asii Chemnitz Narup-imit aamma Peqqissutsimut, Isumaginninnermut Inatsisinillu Atuutsitsinermut Naalakkersuisup, Martha Abelsenip  atsiorpaat.  Paamiut pillugu isumaqatigiissut Peqqinnissaqarfiup Kommuneqarfik Sermersuullu akunnerminni isumaqatigiissutatigut qulakkeerneqarpoq, Paamiuni sulisut aqutsisullu qanimut suleqatigiinnissaat imminnullu isumasioqatigiinnissamik periarfissinneqarnissaat. Isumaqatigiissutip periarfississavaa, suleqatigiit annertuumik ingerlatsinermi iluaqutissatigut periarfissinneqarnissaq, soorlu ilaatigut angallannermut tunngasut aamma nerisassiornermut tunngasut.  ”Utoqqaat illuat nutaaq peqqinnissaqarfillu uiguleriipput taamaalilluta  toqqissisimaneq isumassuineq peqqissaanerlu utoqqarnut neqeroorutigisinnaanngorpavut. Angerlarsimaffik nutaarluinnaq atorlugu Paamiuni utoqqaat nutaamik avatangiiseqalerput, taanna illoqarfiup qeqqani inissisimavoq tassanilu utoqqaat illoqarfiup qeqqani pisut malinnaaffigisinnaalerpaat. Utoqqaat inuunermi atugaannik pitsaanerulersitsivoq. U. 12. juuni 2019, Paamiuni utoqqaat angerlarsimaffiat nutaaq atoqqaartinneqassaaq.
  9. Ullut juunip qulingat & aqqarngat Kommuneqarfik Sermersuumi najukkami ataatsimiititat sisamaasut perngaammik najukkami ataatsimiititat ataatsimoorlutik isumasioqatigiisinneqarput. Kommuneqarfik Sermersuumi najukkami ataatsimiititaliat isumasioqatigiisinneqartarnerat ukioq allortarlugu ingerlanneqartassaaq.

2.b

 

Uju Petersen (IA), MIA siulittaasoq

Nuummi Inuusuttunut Sulissivik immikkoortoqarfinnik sisamanik tulliuttunik isumaginnittussaq ammarneqarpoq:

  1. Meeqqanik inuusuttunillu sakkortuumik nalaataqarsimasunik sullissineq
  2. Inuusuttunik siunnersuineq
  3. Suliniuteqareernermi malinnaaneq
  4. Meeqqanut inuusuttunullu atornerluisarnermut katsorsartinnermi perorsaasumik tapersersorteqarneq.

Charlotte Ludvigsen (IA), SIA siulittaasoq:

Paamiuni Utoqqaat Illuat nutaaq

Paamiuni Utoqqaat Illuat nutaaq aqagu juunip 12-iani nal. 13.00 ammarneqassaaq.

Utoqqaat Illuat 24-inut inissaqarpoq – taakkunannga inissat 12-it innuttaasunut puiguttortunngorsimasunut naatsorsuussaallutik.

Maannakkorpiaq Utoqqaat Illuat Paamiunilu peqqinnissaqarfiup akornanni erseqqissunik isumaqatiginniutissaannik suliaqartoqarpoq.

Inunnut innarluutilinnut aqqutissiuussisoq

Suliffeqarnermut immikkoortortami inunnut innarluutilinnut aqqutissiuussisumik atorfinitsitsisoqareerpoq, taassumalu isumagissavai innuttaasut innarluutillit pikkorissartinnissaat suliffissaannillu periarfissarsiuunnissaat.

Innarluutilinnut inatsit nutaaq

Inuit innarluutillit tapersersorneqarnissaat pillugu Inatsisartut inatsisissaat nutaaq juunip 5-iani 2019 akuersissutigineqarpoq, taannalu 1 januar 2020 atuutilersinneqassalluni. Ingerlatsivimmi suleriaatsit suliallu allaaserineqarneri inatsimmut naleqqussarlugit aallartereerput.

Innarluutillit pillugit immikkoortumut pilersaarut pillugu innutaasunik ataatsimiititsineq.

Juunip 3-ani 2019 Ornittakkami Kammagiit-ni innuttaasunik ataatsimiititsisoqarpoq, tassanilu Innarluutillit pillugit immikkoortumut pilersaarut qulequtarineqarpoq.

Ajoraluartumik innuttaasut qanigisaasullu takkuttut ikittuinnaapput. Taamaakkaluartoq ataatsimiinneq pitsaasumik ingerlanneqarpoq, peqataasullu amerlasuunik pitsaasunillu ilanngussaqarlutik, tamakkulu suliap ingerlateqqinneqarnissaanut ilanngunneqarumaarput.

Suliffeqarnermut Isumaginninnermullu Ingerlatsiviup naatsorsuutigiinnarpaa, Innarluutillit pillugit immikkoortumut pilersaarut aasap naajartulernerani naammassineqarumaartoq.

Tasiilami atornerluinermik katsorsaaneq

Kommuneqarfik Sermersooq aamma Allorfik Tasiilami atornerluinermik katsorsaasoqarnissaanik isumaqatigiissuteqarput piffissami 1. januaari 2020-miit 1. aggusti 2021-p tungaanut ingerlasussamik. Imigassamik pinngitsuuisinnaannginnermik, hashimik atornerluinermik aningaasanoorajunnermillu katsorsaaneq Tasiilami nunaqarfinnilu tallimaasuni ingerlanneqassapput.

Piffissami tassani Tasiilami aalajangersimasunik sulisoqarnissaa isumaqatigiissutigineqarpoq.

Taamaattoq Allorfik 2019-imi marloriarluni katsorsaasoqarnissaanik aaqqissuussiniarpoq, pisariaqartitsisunik takkuttoqariataarnissaa piareersimaffiginiarlugu.

Allorfik katsorsaasup angalanerani akiliissaaq, taavalu Kommuneqarfik Sermersooq ininik katsorsaaffissanik, internetimik atuinissamik, najugaqarfinnillu isumaginnittuussalluni.

Taamatut aaqqissuussineq 2021-imi upernaakkut naliliiffigeqqinneqassaaq.

Henrik Rachlev (IA), MAA siulittaasoq:

Atuartut naggataarutaasumik atuarunnaarnerat ingerlalluarpoq, nuannersumik atuarnertik naggaserpaat atuaqatiminnut maligassiullutik.

Maannakkut naggataarutaasumik misilitsinnerit ingerlapput, neriuuteqarluarpugullu ajunngitsumik angusaqarumaartut. Allattariarsornerit naammassereerput, maannalu oqaluttariarsornerit naammassigajalerlutik.

Ukioq atuarfiusoq tulliuttoq 2019-2020 pilersaarusiornera ingerlavoq

Illiniartitsisut suliassaasa agguataarneri siulliit uani qaammatip qeteqqunnerani piariissapput

Nuussuup Atuarfiani ningioq nutaaq aallaartissaaq julip aallaqqaataani Katie Egede Motszfeldt

ASK mi pisortassarsiorneq aallartippoq.

Justus Hansen (D), SAA siulittaasoq:

Soqanngilaq