Nalunaarutit

                                              

Suliffeqarnermut tunngasut

Tasiilami ilinniarfiusinnaasut pillugit ulloqartitsineq nittarsaassinerlu

Tasiilami 2023-mi januaarimi perorsaanermut ilinniarfinnut ilinniarfiusinnaasunik qaaqqusanut 40-nut kiisalu ilinniarfiusinnaasut pillugit nittarsaassineq innuttaasunut tamanut ingerlanneqarput. Ilinniarfiusinnaasunik nittarsaassinermi innuttaasut 400-it miss. peqataasimasut missiliorneqarpoq, tassani ilinniarfiusinnaasut misissornissaannut suliffeqarfiillu assigiinngitsut pillugit paasissutissanik pissarsinissaq periarfissaalluarsimavoq. Aaqqissuussat taakku marluk iluatsilluartumik ingerlasimapput.

 

Inunnut innarluutilinnut tarnikkut nappaatilinnullu Immikkoortortaqarfik

Nakorsaatit pillugit pikkorissartitsinerit

Inunnut innarluutilinnut tarnikkut nappaatilinnullu Immikkoortortaqarfik sulisunut 60-it miss. aqutsisunullu tamanut nakorsaatit pillugit pikkorissartitsissaaq. Innuttaasut nakorsaataannik isumaginninnermut tunngatillugu nakorsaatit pillugit pikkorissaanikkut suliatigut ilisimasat annertusineqarlutillu akisussaaffiit qanoq agguataarneqartarnerat ersarinnerulissaaq. Immikkoortortaqarfimmi piginnaasat annertusarniarlugit 2023-mi suliniutit aallartinneqartut ilagaat.

 

Utoqqarnik suliassaqarfik

Utoqqaat Illuanni aqutsisoq nutaaq

Utoqqaat Illuanni ulloq 1. februaari 2023-mi Kathrine Lerch Amondsen aqutsisunngorpoq. Utoqqaat illuanni ukiut qulit missaanni sulivoq peqqissaanermilu assistentitut ilinniarsimasuulluni.

 

Tasiilami paasissutissiilluni qanigisaasunullu unnussiuaartitsineq

Tasiilami paasissutissiilluni qanigisaasunullu unnussiuaartitsineq ingerlanneqarpoq, tassani puigortunngortunut ataqatigiissaarisoq, tulleriissaarisartoq kiisalu ineriartortitsinermut siunnersorti akisussaaffitsik pillugu innuttaasunut paasissutissiipput. Innuttaasut takkuttut 50-it missaanniipput.