Nalunaarutit

   

Borgmester Avaaraq S. Olsen (IA) nalunaarutai:

Sap. Ak. 36

Inoqarfiit minnerit pillugit ataatsimeersuarneq – Isumaginninnermut, Suliffeqarnermut, Nunamullu Namminermut Naalakkersuisoq, Jess Svanep aaqqissuussaanut peqataavunga.

Ataatsimeersuarnermi sammisavut ukuupput:

  • Atserineq aqqusergillu pillugit ajornartorsiutit misilittagarineqartullu
  • Inissiaqarnerup inissiallu peqqissutsimut siunniutai
  • Inoqarfinni umiarsualiveqarnerup, angallassinermut kiffartuussinissamut isumaqatigiissutit iluanni pisariaqartitat ersarissarneri    

9. sept.: Vestnordisk hovedstadsfondimi ilasortat ataatsimiippugut. Ataatsimiinnermi sammivagut, naatsorsuutinik akuersineq, aningaasaliiffigineqarusuttunik qinnuteqaatinik suliaqarpugut.

10. sept.: Video atorlugu Arctic Parlamentarians Nuummut tikilluaqqusineq. 

Sap. Ak. 37.

14. sept.: Nuuk Film Festivalimik ammaanersiornermut peqataavunga.

19. sept.: Vestnorden Travelmartip ammaanersiorneranut peqataavunga.  

Sap. Ak. 38

24. sept.: NSIP sulisartorpassuarnut inissiat sammitinneqartut pillugit ataatsimeersuartitsinerani peqataavunga, aamma Nuummi innuttaasut, inissialiornernillu killiffiit pillugit saqqummiussaqarpunga.

24-25. sept.: Tasiilami Piterarnerani kommunemi atorfilittat ulappupput, suliassallu assigiinngitsut ingerlaannaq suliarineqalerput, suli ulapputtoqarpoq.

Sap. Ak. 39

28. sept.: Ilisimatusarfiup rektoria Gitte Adler Reimer Ilisimatusarfimmik ilisaritsitineruvoq, ukiullu ingerlanerani pisussat ilanngullugit ilisimatitsissutigalugit. Aamma iluatsillugu Ilisimatusarfimmi ilinniartunik

29. sept.: Nunamed 2022. Nunamedit aqqanilissaat – Kulturi, peqqissuseq inuunerissuunerlu qulequtaritinneqartumi pisarnertut Kommunerput ilasseqatigiinnermik aaqqissuussaqarpoq. Ataatsimeersuarnissamut nunanit tamalaaniit peqataasorpassuit tikilluaqquakka. 

30. sept.: Nunaqarfinni Aqutsisuusut siulittaasui aappaagumut aningaasartuutissatut siunnersuutaasut missingersuutit pillugit saqqummiivigaakka, aamma politikkikkut isumaqatiginninniarnerit ilanngullugit.

Suliffeqarnermut Isumaginninnermullu Ataatsimiititami siulittaasup Inge Olsvig Brandt (IA) nalunaarutai: 

Pisortaq Ejner Grønvold Suliffeqarnermut Isumaginninnermullu Ataatsimiititamut ilaasortat peqatigalugit Tromsømut septembarip ulluisa 26-annit 30-annut ataatsimiititap angalanerani peqataavoq. Inuit timikkut piginnaasakillisimasut Tromsø Kommunianit qanoq sullinneqartarnersut ilaatigut ataatsimiititamut ilaasortanit misissuiffigineqarnissaa siunertarineqarpoq.

Inunnut innarluutilinnut aamma Tarnimikkut nappaatilinnut Immikkoortortaqarfik

Sapaatip akunnerini 40-42-mi Kommuneqarfik Sermersuumi najugaqatigiiffiit najugaqarfiillu innarluutilinnut sapaatip akunneqartitsinermi sammisassaqartitsisuussapput, pingaartumik innarluutilinnut paaqqinniffinni najugaqartunut sulisunullu. Sammisassaqartitsinerit 20-t sinneqassapput, soorlu banko, kaffemik, il.il., kommunimi pisinnaasakillisimasut katersuutsinneqarlutillu, peqatigiisinneqarlutillu nuannisartinneqassapput.

Oqartussaaffeqarfik

1. januaari 2023 aallarnerfigalugu pisortanit ikiorsiissutinut suliffissaaleqisunullu ikiorsiissutit pillugit inatsisit nutaat atuutilissapput. Inatsisini marluusuni allassimavoq, sulianik suliaqarnermi qarasaasiaqarnermi systemi ataatsimoorussaassasoq. Naalakkersuisoqarfimmut uteqqiattumik apeqqutigineqartaraluartoq systemip nutaap atulersinneqarnissaanut pilersaarutip tigunissaa suli iluatsinneqanngilaq. Qarasasiakkut systemi Nunatsinni kommunit atoriigaat atorlugu 2023-mi inatsisissaq nutaaq naapertorlugu naatsorsuineq aningaasanillu tunniussisarneq pisinnaanngillat.

Nammineerluni immersuineq suliarineqassappat kommunimi sulisorpassuit atorlugit aatsaat naammassineqarsinnaavoq, taamaaliornermilu sukumiisumik naatsorsuinermik suliaqarnissaq kipiluttunassaaq. Ingerlatsivimmiit nalilerneqarpoq, inatsisit nutaat malinniarnissaat qarasaasiakkut systemit nutaat pigineqanngippata malinneqarsinnaassanngitsut.

Namminersorlutik Oqartussanit erseqqissaasoqarnissaa suli anguniarneqarpoq, peqatigitillugulu Suliffeqarnermut Isumagininninnermullu Ingerlatsivimmi innuttaasunut akornusiinissaa sapinngisamik minnerpaaffianiitinniarlugu aaqqiissutissarsiortoqarluni.

Utoqqarnik suliassaqarfik

Nunani tamalaani Utoqqarnut ullorititaq

U. 1. oktobarimi Nunani tamalaani Utoqqarnut ullorititamut atatillugu Nuummi, Tasiilami Paamiunilu utoqqaat illuini utoqqarnullu najugaqatigiiffinni sapaatip akunnerini 39-mi 40-milu assigiinngitsunik unammiuaartitsisoqassaaq, kommunimilu utoqqarnut najugaqarfinni najugaqartunut sulisunullu nereqatigiisitsisoqassalluni.

Aalborg Kommune-mit tikeraartoqarneq

Ulluni 26.-28. septembari kommunitut ikinngutigisami Aalborgimi angerlarsimaffimmi ikiortit Nuummi angerlarsimaffimmi ikiortit tikeraarpaat, misilittakkanik avitseqatigiiffiuvoq, ilaatigullu sulinermi avatangiisit, suleqatigiinneq, piginnaanngorsaaneq, kommunimi napparsimasunik/sullitanik isumannaallisaaneq angerlarsimaffimmilu paarsisartunik aaqqissuussineq pillugit eqqartueqatigiittoqarluni.

Sanarfinermut Avatangiisinullu Ataatsimiititami siulittaasup Finn Karlsen (N) nalunaarutai: 

Tasiilami eqqaanilu piteraq

Tasiilami piterarneranut atatillugu Upalungaarsimasut allaffeqarfimmilu sulisut sinneri oqartussaasullu allat peqatigiillutik annertuumik iliuuseqarput. Taamaalilluni Kommunimit piteralinnginnerani piareersimasoqarpoq, aammalu anorersuarnerani ikiuuttoqarluni.

Kingornatigut aseruatiternerit qanoq annertutiginerat qulaajarneqarpoq, ingammik illoqarfimmi sanaartukkanik, kommunip suleqatigisaanit, paasisimannittumit. Kommunimit sanaartornermut pisortap Tasiilamut angalanissaa sulissutigineqarpoq, taassuma illoqarfimmi teknikerit suleqatigalugit aseruatiternerit nalunaarsorniassammagit aammalu sanaartornermut atortunik nassiussinerit tunniussinerillu isumagineqassammata.

Inuussutissarsiutillit oqartussaasullu allat suleqatigineqarnerat:

Ingerlatsivimmit allaffissornikkut sanaartornermi suleqatigiittussat tassaasut sanaartornermik suliallit Pilersaarusiornermut immikkoortumi toqqammavilerlugit pilersinneqarput, entreprenørit siunnersortillu ingerlatsiviup oqartussaasutut suliaqarnissaanut qaaqquneqarlutik. Siunertaavoq suliassat suliarineranni suliallit nalinginnaasumik suleqatigiinnikkut eqaannerusumik suleqatigiillutik suliarinninnissaat.

Pilersaarusiornermut immikkoortumit Nunatarsuup akuersissuteqarfiginissaa pillugu paasissutissiilluni ataatsimiititsinissaq pilersaarusiorneqarpoq. Paasissutissiilluni ataatsimiititsineq ingerlanneqassaaq Namminersorlutik Oqarsussat suleqatigalugit, tassani Inuussutissarsiornermut naalakkersuisup akuersissuteqartarnermut inatsit nassuiaatigissavaa.

Ingerlatsineq:

Nuuk Imiup aamma sullorsuup eqqaani sapusiaq pitsaajunnaarluni aserfallattoq paasineqarpoq. Sapusiap betonnitai immersuutaalu taarsersorneqassapput. Ingerlatsivimmit siunissaq qaninneq ungasinnerusorlu eqqarsaatigalugit aqquserngup piaarnerpaamik isumannaallisarneqarnissaa sulissutigalugu aallartinneqarpoq. Sanarfinermut immikkoortumit siunissaq ungasinnerusoq eqqarsaatigalugu aningaasaliissutissat ujartorneqaleruttorput.