Nalunaarutit

<p>2A. Borgmesterip nalunaarutai</p>

<p>2B. Ataatsimiititanik ataavartunit nalunaarutit</p>

2A. Borgmesterimit nalunaarutit

  1. Ukioq manna Nunat Avannarliit Killiit illoqarfittut pingaarnersaasa aningaasaateqarfiannut ilaasortat (VNHF) Torshavnimi ataatsimoorput tassanilu illoqarfittut aaqqissuisoq Torshavnip kommunia ataatsimoornermi ulluni 27. aamma 28. juunimi pisussat isumagalugit. Siulersuisut ataatsimiinnerat ulloq 27. juuni 2018 pivoq, tassani kommunit illoqarfittut ikinngutit pingasuusut qinnuteqartunut assigiinngitsunut 11-nut katillugit aningaasanik 325.000 koruuninik agguaassipput.
  2. Ulluni 27-30. juuni Aningaasaqarnermut Inuussutissarsiornermullu Ataatsimiititaq Torshavnimut angalavoq. Ataatsimiititaq VNHF-imi pisussat malillugit (siulersuisut ataatsimiinneranniunngitsoq) 27. aamma 28. juunimi peqataavoq. Ataatsimiititap programmia malinneqarpoq ulloq 29. juuni isumassarsiorfiusutut angalanermik taallugu, tassani piffimmi tunisassiorfik igalaaliorfiusoq, nunaqarfimmi katersugaasivik peqqissaavissallu sananeqarnera sakkunik digitaltiusunik nutaalianik atortoqarluni sananeqartoq takuniarneqarput.  Borgmesterip qaninnerpaatut ilaquttamini peruluttoqarnera pissutigalugu, borgmesteri Torshavnimiit pilersaarutaanngitsumik angerlajaarnera ilisimatitsissutigineqassaaq.
  3. Ulloq 15. juuli Paamiuni ivigaasaaqqanik arsaattarfiliaq pisortatigoortumik ”Arsaattarfik Paataq”-mik atserneqarpoq. 
  4. Ulloq 27. juuli borgmesteri Aalisarnermut, Piniarnermut Nunalerinermullu Naalakkersuisoq, Erik Jensen Tunumi  aalisarnermik ineriartortitsinissaq qiteritillugu ataatsimeeqatigaa. 
  5. Ulloq 1. aggusti borgmesteri Aatsitassanut, Suliffeqarnermut, Nunamut Namminermut Nunanilu Avannarlerni suleqatigiinnermut Naalakkersuisoq Vittus Qujaukitsoq ataatsimeeqatigaa.  Suliffeqarnermut pissutsit taavalu kommunit pillugit nalinginnaasumik ilisimatitseqatigiinneq ataatsimiinnermi pivoq.
  6. Ulloq 2. aggusti borgmesterip Inuussutissarsiornermut Nukissiuteqarnermullu Naalakkersuisoq Aqqalu Jeremiassen ataatsimeeqatigaa.  Naalakkersuisut periusaanut atatillugu takornariaqarneq, killiffiusoq Takornarianullu Ornittakkamik Nuummi pilersitsinissamut isuma Naalakkersuisup paasissutissiissutigaa.
  7. Ulloq 9. aggusti borgmesteri Qeqertarsuatsiaanut tikeraarpoq.  Borgmesteri Qeqertarsuatsiaani Kapisilinnilu nunaqarfinnut aqutsisut ataatsimeeqatigai (Kapisilinnit ilaasortaq oqarasuaatikkut peqataavoq). Tamatuma saniatigut borgmesteri kommunip sanaartugaatai suliffeqarfiutaalu takusarpai, makkuusut: kommunip allaffia nutaaq; Timersortarfik/atuarfik; Garage; Amitsialak (mersortarfik) aamma Ujaqqerivik (ujaqqanik qiperuisarfik), soorluttaaq borgmesterimit utoqqarnut najugaqatigiiffik pulaarneqartoq.
  8. Paamiuni utoqqaat illutaavata atoqqaarfissiorneranut atatillugu, Aningaasaqarnermut Inuussutissarsiornermullu Ataatsimiititaq novembarip qeqqani/naanerani Paamiuniissaaq.  Utoqqaat Illuata 2019-ip naalerneranut atoqqaartinnissaa kinguartinneqarmat, taamatuttaaq ataatsimiititap Paamiuliarnissaa kinguarpoq, allatseqarfimmit ullut sorliussanersut paasissutigineqarnissaasa tungaannut.
  9. Ulloq 15. aggusti Aningaasaqarnermut Inuussutissarsiornermullu Ataatsimiititaq Tasiilamut angalavoq. Ataatsimiititap Tasiilami pilersaarutaata saniatigut, ulluni 16. aamma 17. aggustimi Takornariaqarneq aamma inuussutissarsiuteqarneq pillugu isumasioqatigiinnermi peqataavoq taannalu Kommuneqarfik Sermersooq suleqatigalugu Inuussutissarsiuteqarnermut Naalakkersuisumit, Aqqalu Jeremiassenimit aaqqissuunneqarpoq. Naalakkersuisup inoqarfinni assigiinngitsuni isumasioqatigiinnerup ingerlannissaa pilersaarutigaa, isumasioqatigiinnissarlu Kommuneqarfik Sermersuumi tulliani Nuummi pissaaq ulluni 24. aamma 25. septembarimi, tamatumuunali takornariaqarnerinnaq sammineqassalluni. 2018-imi Ataatsimiititaq 18. aggustip tungaanut Tasiilamiippoq. 
  10. Inuusuttut Kommunalbestyrelsiat Kommunalbestyrelsip Ataatsimiittarfiani 26. septembarimiit 28. septembarimut ingerlanneqassaaq, tassanilu kommunimi meeqqat atuarfianniit aallartitat Nuummut tikissapput. Kommunalbestyrelsimut ilaasortat tamatumunnga aggersarneqassapput ataatsimiinnerullu inerneri kingorna kommunalbestyrelsimut ingerlateqqinneqarumaarlutik. Pisussaq qanillippat paasissutissat kommunalbestyrelsimut ilaasortanut nassiunneqarumaarput.
  11. Attaveqaqatigiinnermut Naalakkersuisup, Simon Simonsenip Borgmesteri Asii Chemnitz Narup attaveqaqatigiinneq pillugu isumasioqatigiinnissamut siullermik Nuummi pisussamut aggersarpaa. Suli ullulerneqanngilaq, taamaattorli septembarip qaammataata qiteqqunnerata missaani pissasoq pilersaarutaavoq.
  12. Ulloq 10. aggusti 2018-imi borgmesteri Asii Chemnitz Narup Avannaata Kommuneani borgmesteri, Palle Jerimiassen ataatsimeeqatiginiarlugu Ilulissaniippoq. Mittarfissanut pilersaarut ilaatigut borgmesterinit eqqartorneqarput taavalu kommunit ataatsimoortarfissaata ilaatigut nunami kommunit tamarmik aallartitaqarfigisassaat pilersinneqartariaqartoq eqqartorneqarluni.
  13. Naalakkersuinikkut Ataqatigiissaarisoqatigiit ataatsimiinnissaat 25. septembarimi Nuummi ingerlanneqassaaq.

Malene Lynge (IA), Sanarfinermut Avatangiisinullu Ataatsimiititami siulittaasoq

1. Nuup iggiaani ikaartarfissaq maanna nuummut assartorneqarpoq. Septembarip 10ni ikkunneqarnissaa naatsorsuutigineqarpoq. 

Ikkussornera 24 tiimit missaani sivisussueqassasoq, tamatumalu nalaani angallatit aqqutissaat atorneqarsinnaanngitsoq, naatsorsuutigineqassaaq. 

Tamakku pillugit ingerlatsivik avammut nalunaaruteqarumaarput.

2. Nuummi Tuujummi inissiat siulliit naammassilerput inissiallu 42t oktoberip aallaqqaataani iserterneqarnissaat naatsorsuutigineqarpoq.

3. Tasiilami arsaattarfik maanna ivigaasalerneqarpoq – tamanna assut nuannaarutigineqarpaluppoq – qutsannnaqaallu.

4. Paamiuni utoqqaat illussaq sanaartorneqarnera kinguaattuulaaqqavoq. Maanna januaarimi 2019mi naammassinissaa, marts ialt. apriilimi 2019mi atulersinnaanissaa naatsorsuutigineqarallarpoq.

5. Siulittaasuunerma nalaani ataatsimiititami suliat aallartitat nanginneqarnissaat naatsorsuutigaara. Suliat taakku pillugit siulittaasunngortussamut pisortamullu allagaqarlunga ingerlateqqippakka.

Uju Peteren (IA) Meeqqanut Ilaqutariinnullu Ataatsimiititami siulittaasoq:

1. Aasami sulinngiffeqareernerup kingorna ataatsimiititaq marloriarluni matoqqasunik ataatsimiissimavoq.

2. Ingerlatsivimmi ataavartumik suli suleriutsit  sinaakkutillu nutaat atuutsilersinniarkugit sulisoqarpoq.

Charlotte Ludvigsen (IA) Suliffieqarnermut Isumaginninnermullu Ataatsimiititami siulittaasoq:

1. Ataatsimiititaq Københavnimi Aalborgimilu paasisassarsiornluni angalasimavoq, angalanermilu annerusumik innarluutilinnik siusinaarlutillu piginnaanngorsaqqinneq sammisimavaat. Danmarkimi kalaallit inooqataanerminni ajornartorsiortut aamma naapinneqarput. isumaginninnerup tungaatigut nutaaliorneq pillugu (velfærdsteknologi) saqqummiiffigineqarput aammalu Grenness Minde pulaarneqarluni, taannalu kommunip suleqatiginissallugu aallarnisaaqatigileruttorpaa.

Nivi Olsen (D), Meeqqanut Atuarfeqarnermullu Ataatsimiititami siulittaasoq:

1. Ilisimaneqartutut meeqqerivinni ilinniarsimasunik sulisussaaleqisoqarpoq. Amigaatillu ilagaat perorsaasut. Ajornartorsiut pillugu suliniuteqartuarsinnarpoq, ingerlatsivillu ilaatigut perorsaasunik utoqqalinersiaqalersimasunit saaffigineqartarsimavoq suliassamik kivitseqataarusuttunik.

2. Ataatsimiititap Århusimi paasisassarsiorluni angalasimavoq pingaarnertullu meeqqat atuarfiat meeqqanik aalanerutitsilluni atuartitseriaasilik pulaarneqarsimalluni.