Nalunaarutit

<p>2A. Borgmesterimit nalunaarutit</p>

<p>2B. Ataatsimiititanit ataavartunit nalunaarutit</p>

2A. Borgmesterip nalunaarutai

– Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen borgmesterilu Asii C. Narup ulluni 5. aamma 6. marsi 2018 inuussutissarsiorneq suliffeqarnerlu pillugit isumasioqatigiissitsinissaagaluat silap ajornera pissutigalugu timmisartuussisoqarsinnaanngimmat taamaatiinnarneqarpoq (kinguartippoq). Tasiilami Kommunalbestyrelsimut ilaasortat isumasioqatigiissitsinissamut aggersarneqarnikut ilagigaluarpaat. Aattaat Inatsiartunut qinersisoqareerpat aalajangerneqarsinnaassaaq, qaqugu una isumasoqatigiinnissaq ingerlanneqassanersoq.

– Paamiuni utoqqaat illuata nutaap nappaanersiornissaanut atatillugu borgmesteri Isumaginninnermut Suliffeqarnermullu Ataatsimiititami Siulittaasorlu februaarip 21-22-anilu Paamiuniissapput. Borgmesteri Paamiuniinnermini ilaatigut neqitsersuisarfik alakkartissavaa, Paamiunilu Aalisartut Piniartullu Peqatigiiffiat (PAPP) ataatsimeeqatigissallugu aamma "Utoqqaat Peqatigiit" ataatsimeeqatigissavai.

– Ulloq februaarip 23-ani borgmesterip Kommunaldirektørillu UNICEF’ip allattaanera aamma UNICEF´imi suliassanut aqutsisoq ataatsimeeqatigaat. Ataatsimiinnermi Kommuneqarfik Sermersuumut UNICEF’ip pilersaarutaa ilisimatitsissutigineqarpoq UNICEF´imi illoqarfiit suliniutinut aningaasanik katersiffiusut, meeqqallu pisinnaatitaaffiinik ukkatarinniffiusut pillugit. Gentofte tassaavoq 2018-imi UNICEF´ip illoqarfia, taakkualu illoqarfittut ikinngutigisaminnut Tasiilamut aningaasanik katersuinuarlutik aallartereerput. Aningaasat 2019-imi atorneqassapput – aningaasat Nakuusa aqqutigalugu ingerlateqqinneqassapput. Piviusunngortinneqarnissaanut sulineq aallartinneqareerpoq aammalu Kommuneqarfik Sermersooq ataavartumik ilisimatinneqartassaaq sulinermilu peqataatinneqarluni. 

– Ulloq februaarip 28-ani borgmesterip Islandandip Nunani Avannarlerni suleqatigiinnissamut Ministeria Sigur∂ur Ingi Jóhannsson ullup´qeqqasioqatigiitigalugu ataatsimeeqatigaa, taassuma aamma Kommunit akisussaaffigai. Ministeri Nunat Avannarliit 2018-imi isumasioqatigiinnerinut atatillugu Nuummiippoq, taanna Peqqissutsimut Nunanullu avannarlernut suleqatigiinneq pillugu Naalakkersuisumit aaqqissuunneqarpoq, Namminiilivinnissaq, Nunanut Allanut Nunalerinermullu Naalakkersuisoqarfik suleqatigalugu.

– Ulloq marsip aappaat borgmesterip Kommuninut, Nunaqarfinnut, Isorliunerusunut, Attaveqaateqarnermut Ineqarnermullu Naalakkersuisoq, Erik Jensen, ataatsimeeqatigaa.

– Nunaqarfinni Aqutsisut 2018-imi isumasioqatigiinnissaat ullulerneqarpoq sumiiffissarsineqarlunilu – tamanna Nuummi ulluni 13.-15. maaji ingerlanneqassaaq. Gruppeni siulittaasut ataatsimiigiaqquneqarput.

– Tromsø Kommune borgmesterip saaffiginnissuteqarnerata kingunerisaanik maanna nalunaaruteqarpoq, Kommuneqarfik Sermersuumik suleqatiginnikkusulluni. Kommunit marluusut sunik suleqatigiissuteqassanersut pillugit sulineq maannakkut ingerlavoq.

– Marsip qulingiluaani borgmesterip kommunaldirektørillu Nord-Norges Europakontor (NNEU) ataatsimeeqatigaat. Nord-Norges Europakontor Brusselsimi inissisimaffeqarpoq EU-milu politikkimut tunnganerusunik suliaqartuulluni.

– Ulloq marsip 12-iani borgmesterip kommunaldirektørillu  SIKUKI Nuuk Harbour A/S-imi siulersuisunut siulittaasoq, Lars Karlsson aamma ingerlatseqatigiiffiup pisortaa, John Ramussen ataatsimeeqagaat.

– Marsip 12-iani borgmesterip kommunaldirektørillu Kalaallit Airport A/S-imi siulersuisunut siulittaasoq, Johannus Hansen ingerlatseqatigiiffiullu pisortaanera, Steffen Ulrich-Lynge ilisimatitsinertalimmik ataatsimeeqatigaat.

– Marsip 13-iani borgmesterip qaammatit pingasukkaartumik Kommuneqarfik Sermersuumi nunaqarfinni aqutsisut siulittaasui ataatsimeeqatigai. Nunaqarfinni Aqutsisut isumasioqatigiissinneqarnissaannut ulluliisoqarpoq. (Tamanna pillugu erseqqinnerusumik imm. 6 takujuk).

– Marsip 14-iani Nuuk Imeq A/S ataatsimeersuarpoq.

– Marsip 16-iani borgmesterip Kommuneqarfik Sermersuumi Najukkani Ataatsimiititaliat tamaasa videokonference aqqutigalugu ataatsimeeqatigai. Ataatsimiinnermi ilaatigut borgmesterip ilisimatitsissutigaa kommunit aqunneqarnerat pillugu inatsimmi nutaami aamma Nuummi Najukkami Ataatsimiititaliamik pilersitsisoqassasoq, taamaattumillu suliaq tamanna aallartinneqarsimasoq.

– Ulloq 23. marsi Sermersuup Inuussutissarsiornermut Siunnersuisoqatigiinni siulersuisut ataatsimiipput.

– Ulloq apriilip 12-iani Kommuneqarfik Sermersuumi 2018-imi Kulturikkut nittarsaassisoq toqqarneqassaaq, tamannalu Tasiilami aaqqissuussinikkut ingerlanneqassaaq.

– Aningaasaqarnermut Inuussutissarsiornermullu Ataatsimiititaq ulluni 23. – 26. maaji Tasiilaliassaaq.
– Ulloq marsip ulluisa 27-anni kulturi pillugu siunnersuisooqatigiit Aningaasaateqarfik Sermermut qinnuteqaatit oqaluuseraat. Aningaasaateqarfik Sermermut ukioq manna qinnuteqarsinnaanermi siullermi qinnuteqaatit angisuut mikinerillu 33-t tiguneqarput. Aningaasat kr. 1.297.300 agguaanneqarput. Qinnuteqartut 33-t akornanni 18-it qinnuteqaataat akuersissutigineqarput.
       o Qinnuteqartut akissutissaat suliarineqaleruttorput oktobarillu qaammataani qinnuteqarnissaq periarfissaaqqilissaaq.

– Ulloq apriilip ulluisa sisamaanni borgmesterip Asii Chemnitz Narupip kommunitut ikinngutigisami Gentofte Kommuneani borgmesteri aamma borgmesterip tullia ataatsimeeqatigai. Suliassaqarfinni assigiinngitsuni Tasiilami ineriartornerup killiffia pillugu borgmesterip Asii Chemnitz Narupip ilisimatitsissutigaa. Tasiilami pissutsit illoqarfittut ikinngutigisami borgmesterimit borgmesterillu tullersortaanit annertuumik soqutigineqarput Tasiilamullu tikeraarnissaminnut qilanaarlutik.

– Ulloq apriilip tallimaanni borgmesterip Kraemers kalaallit aningaasaateqarfiani siulersuisut ataatsimeeqatigai. Aningaasaateqarfik Tunumi pisunut suliniutinullu tapiissuteqartarpoq.

2B. Ataatsimiititanit ataavartunit naluaarutit

Malene Lynge, Sanarfinermut Avatangiisinullu Ataatsimiititami siulittaasoq.
– Kommunip illuutaanik aserfallatsaaliinermut suliaqarneq Iserit-imit ingerlanneqarnikuusoq maanna politikkikkut aalajangiiffigineqareernerup kingorna apriilip aallaqqaataaniit Sanarfinermut Avatangiisinullu Ingerlatsivimmut uterteqqinneqarpoq.

Uju Petersen, Meeqqanut Ilaqutariinnullu Ataatsimiititami siulittaasoq
– Ippassaq 9. april 2018 Meeqqanut Ilaqutariinnullu immikkoortortaqarfik suleriaaseq nutaaq aallartillugu sulilerput.
– Sulisut ulapinnikooqaat pikkorissarlutik suleriaatsimut nutaamut saniatigullu suliatik suliaralugit – sulisulli suliassatik qiimallutik qilanaarlutik tiguaat, taamaalilluni sulisutigut neriunnarluni.
– Kommuneqarfitsinni Meeqqanut Ilaqutariinnullu immikkoortortaqarfimmi sulisut  tamakkerlutik 3. aamma 4. maj – Isumaginninnermut Aqutsisoqarfik suleqatigalugu naapitinneqassapput, suleriaaseq nutaaq aammalu siunissami periuusissat qanoq issinnaanerinik isumasioqatigiinnittalimmik ataatsimiissallutik.
– Sulisutigut suli Tasiilaq unammillernartumik inissisimavoq, maannakkullu avataaninngaanniik vikarilerlugu sulisulersorneqarallarpoq. Kiisalu Familiecenteri psykoterapeutimik sulisoqalernissaa aaqqinniarneqarluni
– 9. maj ataatsimiititap naapinnissaanut MIO ataatsimeeqatiserineqarpoq.

Charlotte Ludvigsen, Isumaginninnermut Suliffeqarnermullu Ataatsimiititami siulittaasoq
– Royal Greenland-ip Tasiilami illoqarfinnut kitaaniittunut sulisussarsiornera iluatsilluarpoq. 16. Marts Tasiilap eqqaani nunaqarfinneersut 13-it INUILI-mit pikkorissartinneqarput sulilernissaminnullu piareerlutik. Tasiilameersut 14-it pikkorissartinneqarnerat 19. Marts aallartippoq. Royal Greenland nalunaarnikuuvoq inuit suliartortitassat siulliit Sisimiunut, Maniitsumut Innaarsunnullu, piareersimatinneqassasut.
– Piffissami matumani aggersumilu Nuummi, Paamiuni Tasiilamilu utoqqaat illuini paaqqutarinnittutut sulisorisagut inuk qitiutillugu paaqqutarinninnermik suliaqarnermut ilitsersorneqassapput. Niviarsiaq ineriartortitsinermut sulisorisaq Paamiunut Tasiilamullu angalassaaq taamatut pikkorissaajartorluni.
– Pikkorissaanikkut sulisorisat sakkussanik tuniorarneqassapput innuttaasunik amerliartortunik puigortunngortunik, sullissinissamut. Pitsaaqutaa aamma tassaavoq, taamatut sullissinermut ilinniartinneqarneq aamma innuttaasunik nappaateqarsorisunik sullissinissamut naleqqummat. Sullisseriaaseq tamanna utoqqarnik sullissinitsinni politikkikkut pingaartitarisanut, tassalu inuup naleqarnera ataqqineqarnissaalu pingaartillugit, naleqqupput.
– Piffissami sivitsulersumi Paamiuni suliffissaaleqisut matchgruppe 1-miittut – sulileriaannat ikittuinnaat pigineqarput. Tamatumunnga patsisaavoq sulisut sullissilluarnerannik, aammali inuussutissariornerup ingerlalluarnera inuusuttullu ilinnialertartut patsisaaqataapput. Assassortut inissianik isaterinernik suliaqarnikuupput, utoqqaat angerlarsimaffissaat nutaaq sananeqarpoq, kiassarnermut imermullu aqqusersuinerit najugaqarfimmi killermi allanngortiterneqarput, aammalu INI Iserillu annertuumik inissianik aserfallatsaaliinermik ingerlataqarput.
– Ingerlalluartut tamakku qaavisigut  Paamiunit ilisimatitssissutigineqarpoq  suliniut ”Nordhavns projektet” oktober 2018 aallartissasoq, Majoriap suliniummik ingerlatsisoq februar qaammataani ataatsimeeqatigaa taannalu nalunaarpoq, nammineq sulisoreriikkat saniatigut suliffeqarfiup oktoberimi sulisussat 20-t pisariaqartissagai, taakkunannga tallimat ilinniarsimanngitsut inuttassarsiuussassagut. 
– 2019-mi suli sulisussat 60-it pisariaqartinneqarumaartut nalunaarutigineqarsimavoq. 
– Taamaattumik 2019 aallartinnerani Paamiuni sulileriaannarnik amigaateqartoqalissaaq, soorunami Majoriamit suliniarfigineqartariaqartumik.

Nivi Olsen, Meeqqanut Atuarfeqarnermullu Ataatsimiititami siulittaasoq

– Meeqqerivimmi sulisut ilinniarsimanngitsut pikkorissarneqarput, tamanna politikkikkut suliniutigineqartunut naapertuuppoq.

– Nuummiimmikkoortortaqarfik  MISI "Vestre Fængsel"-imut nuuppoq.