Nalunaarutit

    

Borgmesterimit nalunaarutit: 

Sapaatip-akunnerat 40: 

6. okt.: Nuutoqqami NAIP-p illua pillugu, NAIP-p siulittaasuanik Ane Berthelsenimik, illuliortaatsimut siunnersuisartuat Johan Rosbach, Qarsoq Tegnestue ApS-imiittoq ilagalugu, ataatsimeeqateqarneq. 

9. okt.: Ataqqinartorsuaq Dronning Nuummut tikippoq – Borgmesterimit mittarfimmi tikilluaqqusineq 

10. okt.:

  • Ataqqinartorsuaq Dronning Christian Xip eqqaassutissaata eqqaani borgmesterimit tikilluaqquneqarpoq, Ataqqinartorsuup Dronning Margrethep atiisa ilisarnaataata uleerneqarnissaa pillugu. 
  • Ataqqinartorsuaq Dronningilu kommunalbestyrelsilu ataatsimoorlutik ullu´qeqqanut nereqatigiipput, matumani SIUTSIU, Nuuk City Development aamma Food Lab saqqummiisoralugit.
  • Hans Egedep Oqaluffiani Paneeraq Siegstad Munchip biskoppinngortinneqarnera
  • Kommuneqarfik Sermersooq Biskoppeqarfillu Katuami ataatsimut kaffillerput.

Sapaatip-akunnera 41:

14. – 17. okt.: Arctic Circle Assemble, Island. Kommuneqarfik Sermersooq Harpa-mi "sermeq iigartartuaqqamik" saqqummersitsivoq. 

  • Kommuneqarfik Sermersuup nammineq aaqqissuussaa – Sassarlutik oqallittoqarpoq, peqataasut tassaapput EUmiit Issittumi aallartitaq Michael Mann, Arctic Economic Council Icelandimi siulittaasup tullia, Heidar Gudjonson.

Sapaatip-akunnera 43:

28. – 31. okt.: Nunat Avannarliit Nuummi Kulturisioqatigiinnerat

26. okt.: Martha Lund Olsen inuulluaqqullugu ilasseqatigiinneq.

27. okt. KAIR-mi Siulersuisut siulittaasuanik Kjeld Jørgensenimik aamma pisortamik Jens R. Lauridsenimik ataatsimeeqateqarneq. 

29. okt.:

  • Peqqinnissamut isumaqatigiissut/suleqatigiinnissamut isumaqatigiissut pillugu Peqqinnissamut Naalakkersuisumik Kirsten L. Fenckerimik ataatsimeeqateqarneq.
  • Joanie Simonimik, US Consulate, Nuuk, ilisarititsilluni ataatsimiinneq

30. okt.: SULISITSISUT – Aallartitanik ataatsimeeqateqarneq. 

Sapaatip-akunnera 44:

1. nov.: NSIP-mi siulittaasumik Josef Therkildsenimik ataatsimeeqateqarneq.

2. nov.: Meeqqanut, Inuusuttunut, Ilaqutariinnut Naalakkersuisumik Paneeraq Olsenimik ataatsimeeqateqarneq.

5. nov.:

  • Kommuninut ataatsimoortumik tapiissutit pillugit atsioqatigiinneq.
  • Aalisarnermut Piniarnermullu Naalakkersuisumik Aqqaluaq B. Egedemik ataatsimeeqateqarneq

9. nov.: Greenland Science Week aallartippoq.

 

Ataatsimiititanik ataavartunit nalunaarutit:

 

Meeqqanut Atuarfeqarnermullu ataatsimiititaq: Juaaka Lyberth (IA)    

Nuummi meeqqeriviit atuarfiillu meeqqat sulisullu akornanni ullut tamaasa coronamik tunillatsissimasunik aqqusaartorfigineqarput. Tamanna pillugu meeqqerivit atuarfiillu ingerlatsivimmiit sukateriffigineqarput, ilaatigut meeqqat atuartullu sapinngisamik inimeeqatigiittartut klasseqatigiillu allanut akulerunnaveersaartassasut kiisalu eqqiluisaarnissamik Nunatta Nakorsaaneranit innersuussutaasut malinneqartassasut. Taamaalioqqusisoqarpoq init klassillu akornanni tuniluunnerup siammartertarnera pinaveersimatinniarlugu.

Nuummi atuarfinni tamani 1. klassimi atualeqqaartussat ukioq manna allatsissappunaasit taamaalillutillu angajoqqaat meeqqallu sumiiffinnut arlariinnut agguataarneqarput: Allatsinneq ullunut marlunnut avinneqarpoq.

 

Sanarfinermut Avatangiisinullu Ataatsimiititaq: Justus Hansen (D)

Nuummi aqqusinikkut angallattunik kisitsineq:

Covid pissutaalluni kinguaattoortoqareersorlu aqqusinikkut angallattunik kisitsineq ukioq manna iluatsippoq.

Illoqarfiup pingaarnertut aqquserngini aqqutigineqarnerpaasut pingaartumik soraarfiit nalaanni biilerpassuaqarnerata pilersaarusiornissaanut angallattunik kisitsineq sakkussaavoq pingaaruteqartoq.

Sumi iluarsiinissamut iliuuseqartoqassasoq iluarsiissutissallu suut tunuleriaannermik ajornartorsiummut aaqqiissutaasinnaanersut pingaarnersiuinissamut kisitsinerit tunngaviliisuussapput.

Suliaq ingerlatsivimmiit nangillugu ingerlateqqinneqassaaq.

Nuummi inuussutissarsiornermut nunaminertat aamma umiatsianut inissiisarfik:

Qinngutsinni kommunip inissiisarfiata Qeqertanut nuunneqarnissaa ingerlatsivimmit isumagineqarpoq. Matumani Isuliffimmi Qinngutsinniittumi nunaminertanik sanaartorfissagissaaneq pissutaavoq, tassami nunaminertat inuussutissarsiornermut atatillugu atugassat piumaneqaqigamik. Oktobarip qaammataani nunaminertanut makitsisoqarpoq, makitsinermilu makitaasut nunaminertanik atuinissamut inniminniinissamut atulersitsinissaq sulissutigineqarpoq.

Nunaminertani inuussutissarsiornermut tunngatillugu atugassani suli umiatsiaqarpoq allamut nuunneqartussanik.

Ataatsimiititap Aalborgimut angalanera:

Ataatsimiititap Aalborgimi sammisai Arctic Consensus suleqatigalugu aaqqissuunneqarput, ilaatigullu taassuma Aalborgimi ataatsimiinnerit ingerlateqqitaralugillu aaqqissuuppai:

  • Kommunimut pulaarneq, tassanilu attaveqarneq illoqarfimmillu kusassaaneq eqqartorneqarput. Matumani illoqarfiup qeqqani biilinut uninngasarfiit inunnut uummarissaanertallit ilanngullugit eqqartorneqarput.
  • Aalborgip kangiatungaanut angallanneqarneq – sumiiffik ajornartorsiorfiungaatsiarnikuusoq. Tamanna pillugu inissiaatileqatigiiffiit, kommune soqutigisaqaqatigiillu assiginngitsut akornanni suleqatigiinnerisigut illoqarfiup immikkoortua uummarissarneqarlunilu pilerinarsarneqarpoq. Silamiiffissat aallunneqarneri, inissiarpassuarnik aserfallatsaaliuineq – ilaannakortumik isaterineq nutaanillu sanaartorneq, ilaannakortumik sanaartorneq.
  • Sullissineq sunniuteqarluartoq – politikkikkut kiffartuussinissamik anguniakkat, atulersitsiniaanermi aningaasartuutit, digitalinngorsaaneq tamassuminngalu misilittakkat
  • Rådmandimut pulaarneq – inissiaqarfiit ajornartorsiuteqarfiusut pisoorsuaqarfiusullu ataqatigiinneri pillugit oqaloqatigiinneq. Assigiinngitsunik suliaqarneq aamma illunik portusuunik atuiunnaarneq.
  • Aalborg uni: aqqusinikkut angallanneq pillugu pilersaarusiorneq iluarsiissutillu, Nunami Issittumi ilisimatusarluni suleqatigiinneq sanaartukkanilu silaannaq pillugu unamminartut.

Ataatsimiititap Torshavnimi angalanera:

Ataatsimiititap Torshavnimi sammisai Torshavnip kommunia suleqatigalugu aaqqissuunneqarput, ilaatigut kommunip suliaasa (annerusumik Savalimmiuni kommunimut pilersaarut siullerpaamut tunngasoq) saqqummiunnerisa saniatigut pulaarnermi makku aaqqissuuppai:

  • Ilinniarnertuunngorniarfik ”Glasir”, qallunaat illussanik titartaasartup BIG-ip titartagaa, ilaatigut illorsuup iluata silataatalu torrallataanerata saniatigut ilinniarnertuunngorniartunut tamanut illorsuup iluani ammasumik inersuartaqarpoq.
  • Meeqqat atuarfiat ”Skulin a Flotum”, illussanik titartaasartumit titartagaavoq atuarfik angisooq, ilaatigullu iigai nipaallisaatilersugaalluarlutik.
  • Nipilersornermik Ilinniarfik
  • Pisortat aktieselskabiutaannit ”Eysturoyar- og Sandoyartunnil”-imit Eysturøyarimi sullorsuaq
  • Landsverk

Aqqusinikkut angallanneq pillugu pilersaarusiunnginnermi kingunerisinnaasai kommunimittaaq saqqummiunneqarput, tassami ilinniarnertuunngorniarfik, atuarfik nipilersornermillu ilinniarfik sumiiffimmi ataatsimi katersuutsinneqarmata ullaakkut tunuleriiaattorpassuanngortarmata.

Kalaallit Nunaannut sanilliullugu Savalimmiuni pisortanit inissialiortitsisarneq takussaanngingajappoq ataasiinnarmillu mittarfeqarluni. Pisortalli akerlianik atuarfiit akisuut, meeqqeriviit nunaannarmilu aqquserngit qeqertat akornanni sullorsualiorlutik aningaasaliiffigisarpaat.

 

Meeqqanut Ilaqutariinnermullu ataatsimiititaq: Avaaraq S. Olsen (IA)

Pikkorissaanerit ilinniartitseqqinnerillu piffissami kingullermi ingerlanneqarput. Kommunip Isumaginninnermut Aqutsisoqarfiup imaluunniit SPS ingerlatai qaleriiaartiterput. Ukiup tulliani ataqatigiissagaanerussapput.

Allarluinnarli ajornartorsiutinngoriartuinnartoq, ulloq unnuarlu angerlarsimaffinni pioreersuni nukissaqarfigineqanngitsut DK-mut innersuunneqaannartarnerat tunngaviusumik eqqartorneqartariaqartoq qulaajaavigileruttorparput tassani Isumaginninnermut Aqutsisoqarfik suleqatiseraarput.

Aappaatut anaanngujaartartut inuusuttuaqqat angerlarsimaffeqanngitsut imaluunniit suli ilaquttaminni toqqissimaffiunngitsumi najugallit immikkut iliuuseqarfigisariallit.

 

Suliffeqarnermut Isumaginninnermullu ataatsimiititaq, siulittaasup tullia Lone Rosengreen Pedersen:

Sap. ak. 44-mi angerlarsimaffimmi peqqissaasut angerlarsimaffimilu ikiortit Aqqusinersuaq 9-mut ataatsimuulerlutik nuupput. Nutsernissaq Peqqinnissaq pillugu isumaqatigiissummi 2017-2021-mi qaangiutilersumi suleqatigiissutigalugu piffissami sivisuumi anguniagaavoq. Maannakkut angerlarsimaffimmi peqqissaasut sisamaapput angerlarsimaffimmilu ikiortit 30-ullutik. Maannamiit allartillugu ataatsimoorluni sullitat qaninnerusumik suleqatigiissutigineqalissapput, tassani pingaarnerutissallugu ulloq unnuarlu isumassuineq, taamaalilluni innuttaasoq sapinngisamik sivisunerpaamik nammineq angerlarsimaffimminiissinnaaqqullugu.

Suliffeqarnermut Isumaginninnermullu Ataatsimiititaq piffissami novembarip 30-anniit decembarip aappaanut Paamiuniissaaq, Suliffeqarnermut Isumaginninnermullu Ingerlatsiviup immikkoortortai pulaassallugit, innuttaasunik oqaloqatiginninnerit ingerlatissallugit kiisalu Najukkami Ataatsimiititaliaq aamma Royal Greenland ataatsimeeqatigissallugit.