Nalunaarutit

Siulittaasumiit nalunaarutit:

Ingerlatsivimmiit nalunaarutit:
 

Siulittaasumiit nalunaarutit:

Soqanngilaq.

Ingerlatsivimmiit nalunaarutit.

1. Ulluni kingullerni innaallagiaarunneq attaveqaatitigullu attaveerunnerup kingunerisaanik angerlarsimaffeqanngitsut pillugit upalungaarsimaneq annertusineqarpoq. Angerlarsimaffeqanngitsunut unnuisarfik ulloq unnuarlu ammatinneqarpoq, aqqusinermilu angalaartartut pisariaqartitsisoqarpat orniguttariaannanngorlutik sillimatinneqarput.

2. Angerlarsimaffeqanngitsut pillugit oqallittarfimmi sammisanik suleqatigiissitat ataatsimiinneri siulliit ingerlanneqareerput, taakkulu suliassatut aallaavigissallugu angerlarsimaffeqanngitsunut nuna tamakkerlugu periusissiornissaq. Oqallittarfik Isumaginninnermut Naalakkersuisumit Mimi Karlsenimit pilersinneqarpoq, angerlarsimaffeqanngitsut pillugit ajornartorsiut qitiutillugu ataatsimoorunneqarniassammat. Sammisat qulequtakkuutaarlugit suleqatigiissitanut agguataarneqarput:

  • Ineqarnermut tunngasut aamma nukingiussamik inissamik neqeroorut
  • Danmarkimut nutsertarneq
  • Paasissutissat ilisimasallu
  • Suliassaqarfiit assigiinngitsut akornanni suleqatigiinneq aamma tamakkiisumik isiginnittumik tapiissuteqartarneq
  • Angerlarsimaffeerunnissamik pitsaaliuinermi siusissukkut iliuuseqartarneq

Angerlarsimaffeqanngitsut pillugit oqallittarfimmi tullissaani ataatsimiinneq pissaaq u. 17 decembari.

3. Sap. ak. 44-mi angerlarsimaffimmi peqqissaasut angerlarsimaffimilu ikiortit Aqqusinersuaq 9-mut ataatsimuulerlutik nuupput. Nutsernissaq Peqqinnissaq pillugu isumaqatigiissummi 2017-2021-mi qaangiutilersumi suleqatigiissutigalugu piffissami sivisuumi anguniagaavoq. Maannakkut angerlarsimaffimmi peqqissaasut sisamaapput angerlarsimaffimmilu ikiortit 30-ullutik. Maannamiit allartillugu ataatsimoorluni sullitat qaninnerusumik suleqatigiissutigineqalissapput, tassani pingaarnerutissallugu ulloq unnuarlu isumassuineq, taamaalilluni innuttaasoq sapinngisamik sivisunerpaamik nammineq angerlarsimaffimminiissinnaaqqullugu.

4. Suliffeqarnermut Isumaginninnermullu Ingerlatsivimmi Innarluutilinnut tarnikkut nappaatilinnullu Immikkoortortaqarfimmi Mathias Knude Brusgaard decembarip aallaqqaataaniit fagchefitut sulilissaaq. Mathias Mariagerfjord Kommunimi Ilaqutariinnut Inuit innarluutilinnullu immikkoortortaqarfimmi aqutsisutut siusinnerusukkut atorfeqarpoq. Nuummi aqutsisutut sulinini aallartippaa, illoqarfimmullu uteqqinnissani qilanaaraa, kommunimilu sulisut peqatigalugit peqataatitsinikkut suliatigullu ineriartortitsinikkut innuttaasunut naleqartitsinerulerluni sulineq pitsaasoq nangissavaa.

5. Stabimut aqutsisoq Lise Buchardt qaammatini pingasuni erninerup kingorna sulinngiffeqassaaq. Peqannginnerani Asbjørn Hauge-Helgestad stabimut aqutsisutut atuuffeqassaaq. Asbjørn filosofimik ilinniagaqartuuvoq ukiunilu kingullerni marlunni AC-fuldmægtigitut atorfeqarluni. Sulisuuvoq pikkorittoq.