Nalunaarutit

<p>2A. Borgmesterimit nalunaarutit.</p>

<p>2B. Ataatsimiititanit ataavartunit nalunaarutit</p>

<p>&nbsp;</p>

2A. Borgmesterimit nalunaarutit

 

  • Januaarip 25-ianni politikkikkut ataqatigiissaarisartoqatigiit Ilulissani ataatsimiipput. Kommuneqarfik Sermersooq sinnerlugu borgmesteriugallartoq Nivi Olsen ataatsimeeqataavoq aammalu kommunaldirektøri, Meeqqanut Ilaqutariinnullu Ingerlatsivimmi pisortaq, Isumaginninnermut Suliffeqarnermullu Ingerlatsivimmi pisortaagallartoq. Oqaluuserisassani immikkoortut pingaarnerit tassaapput inersimasut angerlarsimaffeqanngitsut aammalu inuit tarnimikkut nappaatillit innarluutillit, utoqqaat aammalu meeqqanut inuusuttunullu tunngasut. Ataatsimiinnissaq sioqqullugu, ullup aappaa avillugu qinikkat atorfillillu qulequttat pingaarnerit pillugit immikkut sammisaqartinneqarput.
     
  • Januaarip 27-ianni 2018 Aningaasaqarneq pillugu Siunnersuisoqatigiit isumasioqatigiissitsipput. Isumasioqatigiissitsineq Nuummi Hotel Hans Egedemi ingerlanneqarpoq. Ukioq manna qulequttat pingaarnerit tassaapput aalisakkanik pisuussutinik aqutsineq nutaaliornissamut qaffassaanissamullu piginnaasanik ineriartortitsineq. Borgmesterip tullia siulleq aammalu Aningaasaqarnermut Inuussutissarsiornermullu Ataatsimiititami ilaasortat tamarmik qaaqquneqarput.
     
  • Inuussutissarsiornermut, Suliffeqarnermut Niuernermullu Naalakkersuisoq Hans Enoksen borgmesterilu Asii C Narup ulluni 5-6 marsi 2018 Tasiilami inuussutissarsiornermut suliffeqarnermullu isumasioqatigiissitsinissamik pilersaaruteqarput. Kommunalbestyrelsimut ilaasortat Tasiilameersut isumasioqatigiinnissamut qaaqqusaapput.
     
  • Kommunit aqunneqarnerat pillugu inatsit nutaaq aamma Nuummi Najukkami Ataatsimiititaliortoqarnissaanik piumasaqaatitaqarpoq – suliaq aallartereerpoq.
     
     
  • Februaarip 13-iani borgmesterip Aalisarnermut Piniarnermullu Naalakkersuisoq Karl Kristian Kruse ataatsimeeqatigaa. Borgmesterip Aalisarnermut Piniarnermullu Naalakkersuisullu Tasiilami aalisarnerup ineriartortinnissaanut suleqatigiinnissamut nalunaarutaata killiffianik eqqartuisoqarpoq tassanilu kommunimit Namminersorlutik Oqartussaniillu suliniutit ingerlanneqartut ilisimatitsissutigineqarlutik.
     
  • Februaarip 13-iani borgmesterip PAPP  Paamiuniillu kommunalbestyrelsimut ilaasortat, Henrik Rachlev aamma Thiiooq Knudsen neqitsersuisarfiup nutarternissaa pillugu ataatsimeeqatigai. 
     
  • Priscella Josefsen, Kittanik 1982-imi pilersitseqataasimasut ilaat, novembarimi 2017-imi 90-inik ukioqalerpoq. Tamannalu februaarip 15-iani Kittani sulisunit Nuutoqqami Priscellap ilaqutai ikinngutaalu ilagalugit nalliuttorsiutigineqarpoq.  Borgmesteri qaaqqusaavoq kommunalbestyrelsilu sinnerlugu ilaalluni.
     
  • Nakuusap meeqqat kinguaassiuutitigut atornerlunneqartarnerat pinaveersaartinniarlugu qaammarsaanissaanut tunngasoq. Nakuusa Kommuneqarfik Sermersuullu ataatsimoorlutik qaammarsaaniarlutik suliniutaat "Ullut Tamaasa” aallartisartinnagu januaarip 29-ani ulluinnarni meeqqat pillugit suliaqartartunut suliniummik aallartitsinermut qaaqqusivoq.
     
  • Februaarip 15-iani borgmesteri Inatsisartut Aalisarnermut Piniarnermullu Ataatsimiititaliaanit ilisimatitsiniarluni ataatsimiinnissamut aggersarneqarpoq. Aalisarnermut Piniarnermullu Ataatsimiititaliaq Tunumi aalisarnermi piniarneq qaqileqqinniarlugu kissaatigisimavaat tassanilu aalisarnermi ineriartorfissatut periarfissaasut kiisalu taakkununnga unammillernartut pingaarnertut eqqartorusullugit.
     
  • Paamiuni utoqqaat illuata nutaap nappaanersiornissaanut atatillugu borgmesteri Isumaginninnermut Suliffeqarnermullu Ataatsimiititami Siulittaasorlu februaarip 21-22-anilu Paamiuniissapput. Borgmesteri Paamiuniinnermini ilaatigut neqitsersuisarfik alakkartissavaa, Paamiunilu Aalisartut Piniartullu Peqatigiiffiat (PAPP) ataatsimeeqatigissallugu "Utoqqaat Peqatigiit" ataatsimeeqatigissavai.
     
  •  Isak Nielsen Kleist Isumaginninnermut Suliffeqarnermullu Ingerlatsivimmi pisortatut atorfinippoq kingusinnerpaamik maajip aallaqqaataani 2018-imi atuutilertussamik.
  • Isak Nielsen Kleist Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfimmi, Namminersorlutik Oqartussat ataani naalakkersuisoqarfiusumi pisortap tullersortaatut atorfeqarsimavoq, suliffimmilu siuliani suliffittaaminut qanimut attaveqartarsimalluni.
     
  • Kunngikkormiusut Ataqqinassusilik Prins Henrik februaarip 13-iani toqukkut qimagunneranut atatillugu borgmesterimit misiginneqataanermut allattaavinnik kommunit allaffiini tamani allaffissaqarnissaa erfalasuttalu qiteqqusimanissaa aalajangerpaa. Borgmesterittaaq nammineq misiginneqatigissummik kunngikkormiunut nassiussivoq misiginneqataanermullu allattaavinnut Nuummiittunut allassimallunilu.
  • Nuummi Kunngikkormiusut Ataqqinassusillip Prins Henriup ullumi ilineqarnissaata tungaanut erfalasoq qiteqqusimatinneqarpoq.
     
  • Ulloq januaarip 29-ani Nakuusap meeqqat kinguaasiutitigut innarlernaveersaarneqarnissaat pillugu paasitisiniaasoqarpoq. Nakuusa Kommuneqarfik Sermersoorlu peqatigiillutit paasititsiniaaneq tusagassiutitigut aallartitsinnagu, meeqqanik sullissisunut ammasumik pisussamut ilisimatitseqatigiinniarlutik ataatsimiititseqatigiissivoq.
     

2B. Ataatsimiititanit ataavartunit nalunaarutit

Malene Lynge (IA), Sanarfinermut Avatangiisinullu Ataatsimiititami siulittaasoq

  • KNR-ip inuusuttunut oqallittarfiat nutaaq ”Kassoq”-mik taaguutilik 8. februar siullermeerluni aallakatitassiaani Sanarfinermut Avatangiisinullu Ataatsimiititami siulittaasutut Kommuninut, Nunaqarfinnut, Isorliunerusunut Attaveqatigiinnermut Ineqarnermullu Naalakkersuisoq Erik Jensen peqatigalugu peqataavunga. Oqallinneq inissaaleqinermik qulequtaqarluni ingerlanneqarpoq.

 

  • Nuussuarmi kalaaliaratoqaq atorunnaarsimasoq, aasanerani ingammik, innuttaasunik arlalinnik uannut maalaarutigineqartarsimavoq. Kalaaliaratoqaq ernguffiusarpoq eqqissiviilliortoqartaqalunilu. Kalaaliaratoqaq meeqqeriviup atuarfillu akornani inissisimavoq. Kalaaliaratoqqap isaterneqarnissaa 2015-mi eqqartorneqarpoq taamanikkulli kalaalimineerniarfiit pillugit isumaqatiginiarnerit ingerlammata  unitsinneqarallarpoq. Iliuuseqarfiginissaali maanna piffissanngorsoraara. Illup silataa annertuumik ernguffiusarlunilu perulluliorfiuvoq – kialuunniit akuttusuumilluunniit saneqqutartup maluginiartarsimassavaa – pissutsit taamaattut assut akueriuminaapput. Nalunngilara illu isaterneqarneratigut ajornartorsiutit qaangerneqarnavianngitsut, neriuutigaarali eqqissiviilliortitsinerit meeqqeriviup atuarfiullu eeqqaaninnganniit piissasut – meerartagullu eqqissillutik silami aneertinneqaleqqissinnaassasut. Suliaq 22. januar Sanarfinermut Avatangiisinullu Ataatsimiititami eqqartorneqarpoq aammalu 9. februar Aningaasaqarnermut Inuussutissarsiornermullu Ataatsimiititami sammineqareerluni akuerineqarpoq. Aputaarukkutta illu isaterneqalerpat tusagassiutinut nalunaaruteqartoqarumarpoq.

 

Uju Petersen (IA), Meeqqanut Ilaqutariinnermullu Ataatsimiititami siulittaasoq

  • Isumaginninnermut Aqutsisoqarfiup Ineriartortitsinermullu Ataatsimiititap (Udviklingsråd) Ilulissani januarimi ataatsimiisitsinerani Kommuneqarfik Sermersooq peqataatitsivoq, tassani annertuumik innarluutilinnut ikiorsiissutit eqqartorneqarput.
     
  • Ineriartortitsinermut pilersaarut suliniutigineqartuarsinnarpoq.
     
  • Martsip 20-ani ingerlativimmi sulisut seminareqassapput.
     
  • Immikkoortortami pisortaq nutaaq 1. marts aallartissaaq.
     
  • Ataatsimiititami ilaasortat 2. marts- 9. marts Tromsø-mut København-imullu ilisimasassarsiorlutik angalassapput.

 

Charlotte Ludvigsen (IA), Isumaginninnermut Suliffeqarnermullu Ataatsimiititami siulittaasoq.

  • Kofoeds Skole-p siulersuisortaavi 21. februar 2018 nal. 17:00 ataatsimiigiaqquneqassasut kalerrinneqarpugut. 

 

  • Peqqinnissamut Pitsaaliuinermullu Pisortaqarfimmik Kommuneqarfik Sermersuup suleqateqarnissamut isumaqatigiissutaa naapertorlugu peqqinnissaqarfiup kommunillu sulisui isumasioqatigiisinneqarput 5. februar 2018, immikkut suliniarfissatut qulequtsiussat arfineq-pingasut immikkut suleqatigiissitaliuunneqarlutik. Aaqqissuussinermut sulisutta siuttuulluarfigisaannut inuit 40-t peqqinnissaqarfimmi kommunimilu sulisut peqataapput. Sammineqartut ilarivaat piginnaanngorsaqqiineq, pinaveersaartitsineq, katsorsaasarneq, napparsimasunik ikiorsiineq assigisaallu. 

 

  • 23. februar suliffeqarnermut ingerlatsivitta pisortarigallagaa Tasiilamukassaaq Royal Greenland-ip nunatta avannaani aalisakkerivinnut 20-30-nik sulisussarsiornera pillugu, taakanilu aamma susassaqarfimminut tunngasut samminiarlugit. Royal Greenland-ip suliussarsiornera aallaavigalugu maannakkut aaqqissuunneqarpoq INUILI-p Tasiilamut aalisakkerivinni sulisussanik pikkorissaajartornissaa.

 

  • Paamiuni Utoqqaat illuat nutaaq nappaarnersiorneqarneranut atatillugu siulittaasutut peqataajartussaanga. Paamiuniinnera iluatsillugu pulaassavakka Majoriaq, Nuilaaq, maannamut atuuttoq Utoqqaat illuat aammalu Utoqqaat peqatigiiffiat naapissallugit aammalu innuttaasunik ataasiakkaarilluni oqaloqateqarneq ingerlassallugu.

 

  • Isumaginninnermut Suliffeqarnermullu ingerlatsivimmi pisortartaalerpoq tassa Isak Nielsen Kleist. Isak Namminersorlutik Oqartussani Inuussutissarsiornermut, Suliffeqarnermut, Niuernermut, Nukissaqarnermullu Naalakkersuisoqarfimmi pisortap tulliatut atorfeqarpoq, maanna atorfittaani tassani qanimut suleqatigisimallugu. Qilanaarpugut aallartinnissaanut. 

 

Nivi Olsen (D), Meeqqanut Atuarfeqarnermullu Ataatsimiititami siulittaasoq

  • Ataatsimiititaq Nuummi Kommunalbestyrelsip ataatsimiinnera iluatsillugu ulluni pingasuni pulaaqattaassapput. Tassani pulaarneqassallutik atuarfiit pingasut, meeqqeriviillu pingasut. Siulliullugit pulaarneqarput Atuarfik Samuel Kleinschmidt (ASK) aammalu Meeqqerivik Sisi. Meeqqat pikkorsissorpassuit naapinneqarput. Paasisat ilagaat nunani allanit nunnittut, filipinerit meerartaat arlallit ASK-imi atuarmata, tamannalu atuartunut tamarmiusunut tuluttut oqalunniarnerannut qaffassaataasimasut paasineqarsimavoq aammali tuluttut ilinniartitsiniarnermut unammillernartoqartitsisimalluni.

 

  • Angajoqqaat atuartuutillit kattuffittaarmata, taakkua pilluaqquneqarput. Suleqatigiinnissaq qilanaarineqarpoq.

 

  • Ingerlatsivimmit meeqqat atuartut atugarisaat pillugu suliniuteqartoqangajalersoq eqqaavaa, tamannalu pillugukingusinnerusukkut paasissutissiisoqarumaarpoq.