Nalunaarutit

<p>2A. Siulittaasumit nalunaarutit.</p>

<p>2B. Ingerlatsivimmit nalunaarutit.</p>

2A. Siulittaasumit nalunaarutit

  1. Inatsisartunut qinersineq apriilip 24-ani ingerlanneqarpoq. Maanna qinersinermut allattuiviit tamarmik Nuummut tikissimalerput, taamaattumillu qinersinermut siulersuisuni ullumi kingusinnersukkut ataatsimiissaagut uagut nammineq qinersinermik allattuiffivut akuersissutigissallugit. Qinersinermut siulersuisut qinersinermut allattuiviit akuersissutigereerpagit, atortut tamarmik qinersinermut aalajangiisartunut nassiunneqassapput.
  2. Maajip 7-ani borgmesterip PANAM 2018-imi aqutsisoq ataatsimeeqatigaa. Unammersuarnissat pillugit borgmesteri sukumiisumik ilisimatitsiffigineqarpoq. Kommuneqarfik Sermersooq unammersuarnermi aningaasaliisut pingaarnerit ilagaat, aammalu pisussani assigiinngitsuni kommunalbestyrelsip peqataatinneqarnissani naatsorsuutigisinnaavaa.
  3. Ulloq 11. maaji 2018 Nuup Bussii A/S, Iserit A/S aamma Nuuk City Development A/S ataatsimeersuarput. Ataatsimeersuarnerit kommunalbestyrelsip ataatsimiittarfiani ingerlanneqarput.
  4. Ulluni 13.-15.maaji Nunaqarfimmi Aqutsisut isumasioqatigiissinneqarput.  Isumasioqatigiinneq Nuummi ingerlanneqarpoq, tassanilu nunaqarfimmi ilaasortanit 19-init 18-it peqataapput. Ataatsimiititani siulittaasut gruppinilu siulittaasut aggersarneqarsimapput, KANUNUPE-mi siulittaasoq ilanngullugu. Eqqartorneqartut amerlapput, nunaqarfinni inuussutissarsiutiniit meeqqanut inuusuttunullu. Isumasioqatigiittoqarsimanera iluarisimaarluarneqarpoq, angumerisassarpassuarnik ulikkaartoq. Nunaqarfimmi Aqutsisut isumasioqatigiinnerisa nalunaarusiorneqarnissaa aallartereerpoq, naammassippallu AIA-mut saqqummiunneqassaaq. Tamatuma saniatigut 2019-imut inuussutissarsiutinut pilersaarutissamut immersuisoqarpoq, taannalu AIA-p maajip 29-ianni SBC-mik ataatsimeeqateqarnermini eqqartussavaa.
  5. Ukiuni 47-ni qinikkatut sulereerluni Lars Emil Johansen Inatsisartunut upernaaq manna qinigassanngorteqqinngilaq. Lars Emil Johansen-ip ukiuni taakkunani nukini sulininilu inuiaqatigiinnut iluaqutissatut atorpai. Sulilluarsimaneranut qujassutitut, borgmesteri kommunalbestyrelse sinnerlugu Lars Emil Johansen qujassuteqarfiginiarlugu kommunalbestyrelsip ataatsimiittarfiani maajip 16-ianni 2018 ilassinnippoq.
  6. Maajip 16-ianni Katuaq A/S ukiumoortumik ataatsimiippoq. Borgmesteri Sanarfinermut Avatangiisinullu Ingerlatsivimmi pisortaq peqatigalugu ataatsimiinnermi peqataapput.
  7. Piffissami 10.-15 maaji. Nunatta Eqqumiitsulianik Saqqummersitsiviata siulersuisui Nuummi ataatsimiipput maajillu 13-ianni siulersuisuni ataatsimiillutik. Nunatta Eqqumiitsulianik Saqqummersitsiviani siulersuisut Nuummiinnerminni Kommuneqarfik Sermersooq maajip 21-ianni ataatsimeeqatigaat, ilaatigut saqqummersitsiviup inissisimaffissaa pillugu. 
  8.  Nuummi Kunngissaq Frederik hunnorujut affaannik ukioqalernera nalliuttorsiutigineqarpoq, ilaqutariinnut arpatsitsineq Royal Run aaqqissuunneqarluni. Kunngikkormiutut Ataqqinassusilik Kunngissaq Frederik 26. maaji 50-nik ukioqalissaaq. Inersimasut meerarpassuillu peqataapput, arpakkusuttut imaluunniit pisuinnartut 3,5 kilometerimik Kunngissaq Frederik inuuissiornera malunnartippaat. Borgmester Asii Chemnitz Narup arpannermik aallartitsisuuvoq.