Nalunaarutit

<p>2A. Borgmesterimit</p>

<p>2B. Ataatsimiititanit ataavartunit</p>

2A. Borgmesterimit.

• Ulloq 21 aggusti 2017: Rubinisiorfimmut IBA-mut ataqatigiissaarisartoqatigiit, borgmesteri, Qeqertarsuatsiaani Nunaqarfimmi Aqutsisunut ilaasortaq, QAPP-mi siulittaasoq aammalu Greenland Ruby A/S-imi pisortap tullia (siornatigut LNS Greenland A/S), 2017-imi kommunalbestyrelsimut qinersinerup kingornagut IBA-mut ataqatigiissaarisartoqatigiinni ataatsimiipput. Ataqatigiissaarisartoqatigiinni ilaasortat saniatigut makku ataatsimiinnermi peqataapput: Greenland Ruby A/S-imi sulisoq ataaseq, suliamut tunngasunik suliaqartut pingasut, Kommuneqarfik Sermersuumilu allatsi ataaseq. IBA-mut ataqatigiissaarisartoqatigiit kvartalikkuutaartumik ataavartumik ataatsimiittarput.

• Ulloq 22 aggusti 2017: Kalaallit Nunaanni Kommuneqarfiit Nakkutilliisoqarfiannit Kommuneqarfik Sermersooq Siorarsiorfimmut pilersaarut pillugu nakkutilliisoqarfiup oqaaseqaataanik tigusaqarpoq. Allakkami allassimavoq nakkutilliisoqarfiup paasigaa borgmesterip kommunalbestyrelsimut innuttaasunullu paasissutissiissuteqarnissaminut pisussaaffini malissimagaa, aammalu Kommuneqarfik Sermersooq unioqqutitsinngitsumik pilersaarummut atatillugu siunnersortimik atorfinitsitsisimasoq. Taamaalilluni nakkutilliisoqarfiup suliamut tunngatillugu iliuuseqaqqinnissaq pisariaqarsorinngilaa (allakkap assinga agguaanneqarpoq).

• Ulloq 1 juli 2017 GrønlandsBANKEN ukiut 50-inngorlugit nalliuttorsiorpoq. Tassunga atatillugu borgmesteri siulittaasutut aalajangerpoq, CSR Greenland-imi sulinermut kommune 50.000 koruuninik tunissuteqassasoq. Tunissutigineqartut CSR Greenland-imi sulinermut iluaqutaassapput.

• Ulloq 23 aggusti 2017 Aningaasaqarnermut Inuussutissarsiornermullu Ataatsimiititaq Aalborgimi Kalaallit Illuutaannut pulaarpoq (DGH). DGH-mi pisortaq illumi suliarineqartartut pillugit saqqummiussaqarpoq, tamatumani pingaarnertut suliarineqartarlutik innuttaasunut ilinniartunullu siunnersuisarneq, isumaginninnermi siunnersuineq, aammalu kalaallinut Jyllandillu avannaani Kalaallit Nunaannut soqutiginnittunut katerittarfittut atuuffeqartumi. Erseqqissaatigineqarpoq DGH pisortaqarfiunani siunnersuisarfittut suliffeqarfiusoq, kisiannili Aalborg kommune suleqatigilluaraa. Tamatuma saniatigut isumaginninnikkut suliassat, innuttaasunut paasissutissiisarneq, kommunit akornanni nuttartarnerit aallartarnerillu eqqarsaatigalugit siusinaarluni suliniuteqarneq ataatsimoorussanullu allatut aaqqiissutaasartut eqqartorneqarput.

• Ulluni 24-26 aggusti Aalborgimi kalaallinut ulloqartitsinerit 2017 ingerlanneqarput. Aalborgimi kalaallinut ulloqartitsinermi siunertaavoq, Aalborg Kommune-lu illoqarfittut ikinngutigiittut suleqatigiinnerup malunnartinneqarnissaa.

Pingaarnertut pisussat ima isikkoqarput:

24.08.17: Politikkimut tunngasunik pilersaarut.

25.08.17: Inuussutissarsiornermut tunngasumik ulloq naallugu isumasioqatigiinneq.

26.08.17: Aaqqissuussat kulturimut tunngasut nipilersornermik tusarnaartitsinertalik Musikkens Hus-imilu saqqummersitsineq.

Aaqqissuussineq ukioq allortarlugu Nuummi (Nuummi Aalborgimiunut ulloqartitsineq) aamma Aalborgimi (Aalborgimi kalaallinut ulloqartitsineq) paarlakaalluni ingerlanneqartarpoq. Aningaasaqarnermut Inuussutissarsiornermullu Ataatsimiititami ilaasortanit arfineq-marluusunit tallimat Aalborgimi kalaallit ulloqartinneranni peqataapput.

• Ulloq 25 aggusti 2017 Aningaasaqarnermut Inuussutissarsiornermullu Ataatsimiititami ilaasortanit arfineq-marluusunit tallimat sermersooq Business Councilimi siulersuisut ataatsimeeqatigaat. Ataatsimiinnermi siunertaavoq Kommuneqarfik Sermersuup aamma Sermersooq Business Councilip siunissami inuussutissarsiornermut pilersaarusiassamut tunngatillugu sunik naatsorsuuteqartoqarneranik allorissaaqatigiinnissaq.

• Kommuneqarfik Sermersuumi Isumaginninnermut Suliffeqarnermullu Ingerlatsivimmi pisortaq, Grethe Nielsen, nutaamik atorfittaarpoq, Danmarkimi Tønder Kommunemi Social, Arbejdsmarkeds og Sundhedsdirektør-inngussagami. Grethe Nielsen Kommuneqarfik Sermersuumi 2013-imili atorfeqarpoq.. Piffissami tamatumani kommune utoqqarnut, inunnut innarluutilinnut suliffeqarnermullu tunngasut annertuumik siuariarfiupput. Grethe Nielsen Kommuneqarfik Sermersuumi septembarip 30-anni ulloq kingulleq sulissaaq.

• Ulloq 31 aggusti Kommuneqarfik Sermersooq/borgmesteri aningaaserivinnut nakkutilliisoqarfimmit aammalu Kalaallit Nunaanni taarsigassarsititsisarfinnit aallartitanit pulaartoqarpoq. Pingaartumik illoqarfiup ineriartortinneqarnissaanut pilersaarut soqutigineqarpoq, aammalu Kalaallit Nunaanni aningaasalersuinissamik soqutiginninneq kommunip tungaaniit qanoq isummersorfigineqarnersoq tusarusunneqarluni.

• Aqagu ulloq 6 septembari, Kommuneqarfik Sermersuumi innuttaasunik peqataatitsinermi-app nutaaq, Isumaga, nittarsaanneqassaaq. App’i Isumaga illoqarfimmi IT-mut suliffeqarfimmit ’LetItSnow´-imit ilusilersorneqarpoq, ukunanilu aaneqarsinnaalluni iTunes imaluunniit Androide Market.

Kommunalbestyrelsip siorna aalajangerpaa, Nuummi inuusuttut najukkami tamat oqartussaanerat pillugu immikkut iliuuseqarfigineqassasut, app´ilu taanna taamatut atorneqassaaq. Aammalu innuttaasut tamat oqartussaaneranni oqalliseqataanissaamut peqataatinneqarnissaannut kissaatigisanut naleqqussartussaanerata kingunerivaa. Nuuk App atorlugu kommunimi qinikkat toqqaannarnerusumik innuttaasunut attaveqartalernissaat periarfissanngussaaq.

Kommunimi qinikkat allaffeqarfillu apeqqutinik, misissuinernik taasinernillu toqqaannartumik innuttaasut mobiiliinut nassiussisalissapput, taamaasillutillu innuttaasut isummaminnik ajornannginnerusumik apuussisalersinnaassapput – uatsinnillu qinikkanit ajornannginnerusumik tusarnaarneqalissallutik.

Kommunalbestyrelsimut ilaasortat tamarmik kaammattorneqarput apeqqutinik sunik innuttaasunut APP nutaaq atorlugu ataavartumik nassiussisoqartassanersoq arajutsinaveersaartaqqullugu.

• Nunanit tamaneersunit peqataaffigineqartumik ataatsimeersuartitsineq "Polar and Alpine Microbiology 2017.." ulluni 8-12 septembari 2017 Nuummi ingerlanneqassaaq.. (http://pam2017.org/) . Ataatsimeersuarnermi inuit 150-200-it missaat qallunaat nunaanneersut pingaartumillu nunani tamalaani ilisimatusartut peqataassapput, tamakku tamarmik issittuni qaqqartuunilu tappiorannartunik suliaqartuupput. Ataatsimeersuartarneq manna tikillugu illoqarfinni ilisimatusarfeqarfiusuni (Banff – Canada, Ljubljana – Slovenien, Big Sky -USA aamma Tjekkiet) ingerlanneqartarpoq, aatsaallu siullerpaamik ataatsimeersuarneq issittumi ingerlanneqassaaq, matumani Nuummi. Borgmesteri septembarip arfineq-pingajuanni Katuami nal. 17.00 ataatsimeersuarnermik ammaasussatut toqqarneqarpoq.

2B. Ataatsimiititanit ataavartunit nalunaarutit

Malene Lynge (IA), Sanarfinermut Avatangiisinullu Ataatsimiititami siulittaasoq:

– Ataatsimiitaq aallartilluarpoq maannamullu susassaqarfigut ilai alakkartereerpagut, ilaalu suli amigaatigalutigit. Malugeqqunarpoq ataatsimiititami ilaasortat tallimaasuni sisamaasut nunatta kangiani najugaqartuummata ornigulluta ataatsimiittarnissagut killeqassapput. Taamaattumillu susassaqarfigut piffissaq sivisunerulaartoq isigalugu ornittarumaarlutigit.

– Kommunep pilersaarutaannut tapiliussat – KPT, 37-it tallimanngorpat, 8. september, ataatsimiititami sammisussanngorpagut. Pilersaarutit Nuup ineriartortinnissaanut pilersaarummut attuumassuteqarput tusagassiutitigut ilaatigut allaaserineqalereerlutik – suliaq pissanganartoq.

– WWF (World Wild Life) eqqagassanik passiussisarfik pulaarsimavaat, avatangiisit pillugit pilersaarutigut soqutigalugit ornippaatigut. Ingerlatsivimmi pisortaq tassani peqataavoq.

– Nuummi aqquserngit asfaltilersornerat pilersaarutit malillugit ingerlapput.

– Ataatsimiititaq angalaleruni illoqarfik tikitassaa siulleq tassaavoq Paamiut.

Charlotte Ludvigsen (IA) , Isumaginninnermut Suliffeqarnermullu Ataatsimiititami siulittaasoq:

– Ataatsimiititap akuersissutigisareerpaa ulloq unnuarlu angerlarsimaffimmi ukiaq mannamiit ikiorteqartitsisoqartalissasoq. Ulloq unnuarlu angerlarsimaffimmi ikiorteqartitsisarneq siullertut Nuummi Tasiilamilu aallartitinneqassaaq.

– Ataatsimiititap suliniut "Sulineq imminut akilersinnaasariaqarpoq"- Suliffissaaleqisut suliffeqaqqilernissaannut tunngasumik suliniut akuersissutigisareerpaa.

– Nuummi suliffissaaleqisut suli ikittuararsuupput, suliassaqarfiillu arlaqartut sulisussaaleqiffiullutik. Paamiuni aamma suliffeqarnermut tunngasut ilorraap tungaanut ingerlapput, upernaaq aasarlu tamaat suliffissaaleqisut malunnartumik ikileriarlutik.

– Peqqissaanermik Ilinniarfik suleqatigalugu Piviusunik ilisimasat tunngavigalugit ilinniarneq oktobarimi aallartinneqassaaq, tamatumani utoqqarnik sullissisut 20-it, ullumikkut ilinniarsimanngitsutut sulisorineqartut immikkut aaqqissuussamik ilinniartinneqassapput, taamaasillutik piffissap ilaani ilinniagalittut peqqinnissamut ikiortitut sulisorineqalissammata.

– Paamiuni utoqqarnik inunnillu innarluutilinnik sullissisut illoqarfimmi modulikkaartumik ilinniaqqitsinneqassapput.

Nivi Olsen (D), Meeqqanut Atuarfeqarnermullu Ataatsimiititami siulittaasoq:

– Ataatsimiititaq ingerlalluarpoq.

– Oktoberimi atuarfiit aqutsisuanut qinersisoqassooq. Ataatsimiititami ilaasortat agguartaarlutik qinersiffimmi najuutissapput.

– Ingerlatsivik peqatigalugu politikkikkut anguniakkat pillugit oqaloqatigiinnerit ingerlanneqarput, taakkulu saqqummiunneqartarumaarput.

– Nunap sinnera assigalugu kommuunitsinni ilinniarsimasunik sulisussaaleqisoqarpoq. Tamannalu IMAK allalu pisussaffillit peqatigalugit aaqqinniagassaavoq.

– Ataatsimiititaq angalassooq sap.ak. 44-mi, angalanissarlu nunatta kangianut ingerlassooq.

– Helene Berthelsen, Meeqqanut Atuarfeqarnermullu Ingerlatsivimmi pisortaq septemberimi Tasiilamut Tasiilallu pigisaanut sulilluni angalassaaq.

Uju Petersen (IA), Meeqqanut Ilaqutariinnullu Ataatsimiititami siulittaasoq.

– Meeqqanut Ilaqutariinnullu Ataatsimiititaq Meeqqanut Ilaqutariinnullu Ingerlatsivillu nutaatut pilersinneqaqqammersut, ilorraap tungaanut ingerlapput.

– Juulip arfineq aappaani Nuummut, Paamiunut Ittoqqortoormiinullu ingerlatsivik nakkutilliinikkut nalunaarusianik nassitsippoq. Taamatuttaaq juunip 20-ani Tasiilami nakkutilliinermut nalunaarutip malitseqaataa nassiunneqarluni. Nakkutilliinermut nalunaarusiat ataatsimiititami sammineqarput aggustip 20-ani. Taassumalu kinguneranik Ineriartornissamut pilersaarut qaammatip affaata ingerlanerani piareerneqarluni. Aggustip 25-ani Ineriartornissamut pilersaarut pillugu sulisunut 80-it missaaniittunut saqqumiisoqarpoq.

– Suliat meeqqat angerlasimaffiup avataanut inissiinermut tunngasut sisamat suliarineqarsimapput, ataatsimiinnissallu tulliani aamma suliat assingi suliarineqassallutik.

– Pinaveersaartitsineq pillugu NuiF peqatigalugu septemberip 9-ani isiginnaartitsisoqassaaq, aammalu septemerbip 10-ani Karen Berthelsen peqatigalugu imminut toquttarneq akiorniarlugu arpatsitsisoqassalluni.

– Nuuk Marathon ingerlanneqassooq septemberip 16-ani.

– Ingerlatsivimmi pisortassarsiorneq ingerlanneqarpoq.